konka coffee
KONKA

AMAKURU

UKWEZI

Busingye yasabye abagenzacyaha kurangwa n’ubunyamwuga no kutigira ibitangaza mu kazi

Busingye yasabye abagenzacyaha kurangwa n’ubunyamwuga no kutigira ibitangaza mu kazi
12-05-2018 saa 11:30' | By Vincent Nsengiyumva | Yasomwe n'abantu 664 | Ibitekerezo

Minisitiri w’Ubutabera akaba n’Intumwa Nkuru ya Leta y’u Rwanda, Johnston Busingye, yasabye abakozi b’ Urwego rw’Igihugu rushinzwe ubugenzacyaha ’RIB’, kurangwa n’ubunyamwuga mu kazi kabo ndetse no kwicisha bugufi bakirinda kwiremereza no kwigira ibitangaza kubera ububasha bafite.

Ibi yabigarutseho kuri uyu wa 11 Gicurasi 2018, ubwo yatangizaga umwiherero wa mbere w’iminsi itatu abakozi bakuru 28 b’urwo rwego bari gukorera i Nyamata mu Karere ka Bugesera.

Mu kiganiro Minisitiri Busingye yagiranye n’aba bayobozi ba RIB yagarutse cyane ku kubibutsa gukora akazi kabo kinyamwuga mu gushakisha ibimenyetso by’abakekwaho icyaha kandi byose bigakorwa ntawe uhutajwe.

Yagize ati “Icyo nasabye abayobozi bakuru ba RIB bari muri uyu mwwiherero ni ukuba abanyamwuga koko, bakamenya icyo itegeko rivuga bakamenya ko ariryo ribaha ububasha, bakamenya ikinyabupfura, bakamenya ubushishozi, bakamenya ubwenge bwo gukurikirana icyaha cyakozwe, bakamenya kudahutaza uwo bahamagaye cyangwa uwo bari kugenzaho icyaha kandi bakanamenya ko akazi barimo bakora katavanaho ko baguma kuba aria bantu.”

Yunzemo ati“ Ubunyamwuga mwa bantu mwe ni ikimenyetso cy’iterambere, ntabwo ntekereza ko gikwiye no kuranga RIB gusa, kikaranga Minisiteri runaka, kikaranga urundi rwego, ubunyamwuga ni ikimenyecyo cy’uko nshobora kugera kucyo nshaka kugeraho neza mu mahoro ntagize byinshi ntanga, ntagize byinshi nangiza, ntagize uwo mputaza bitari ngombwa.”

Yabasabye kwiyoroshya mu kazi kabo, bakirinda kwikomeza no kwigira ibitangaza bakaba abantu batanga serivise mu nzira nyazo ku buryo n’abo bahura nabo batazajya babafata nk’abantu badasanzwe.

Ati “ Abantu ba RIB mugomba kuba cool [Kuba abantu biyoroshya]. […] Gushyira umuntu mu buroko ntabwo bigomba kuzinga umunya. icyaha yagikoze cyangwa se aragikekwaho, ntabwo wamutumye kugikora ntabwo mwari kumwe agikora, wamuketse, ntabimenyetso ufite cyangwa se uragifite […] umujyanye mu buroko aho kumuhumuriza ukamujyana umutuka! Nizeye ko ibintu nk’ibyo mwabirenzeho.”

Umunyamabanga Mukuru w’Urwego rw’Igihugu rw’Ubugenzacyaha (RIB), Col. Jeannot Ruhunga, yavuze ko bagomba kuva muri uyu mwiherero bafashe ingamba zisobanutse zizabashoboza kuzuza neza inshingano bahawe nk’uko babyitezzweho n’abanyarwanda ndetse n’ubuyobozi bwabagiriye icyizere.

Yavuze urwego rwabo ruzubakira ku bunyamwuga kurusha ibindi byose nk’uko intego z’urwego zibivuga (Ukuri, ubunyamwuga n’ubwitange).

Yagize ati “Ibyo tuzaganira, harimo kureba igenamigambi ry’imyaka itanu ry’aho dushaka kuganisha RIB nk’urwego rushya no kureba amategeko azagenga abakozi bayo. Amategeko abaha ububasha bwinshi mu kazi kabo, ubwo bubasha rero butagendanye n’amategeko abaha ikinyabupfura bayakoresha nabi. Niyo mpamvu dushaka kwicara tukayareba, tukayumvikanaho kugira ngo inshingano badutezeho tuzabashe kuzigeraho.”

Umunyamabanga Mukuru w’Urwego rw’Igihugu rw’Ubugenzacyaha (RIB), Col. Jeannot Ruhunga yavuze ko uru rwego rugiye kubakira cyane ku ntego y’ubunyamwuga

Abayobozi bakuru b’uru rwego nibo bitabiriye uyu mwiherero uzamara iminsi 3


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...