konka coffee
KONKA

AMAKURU

UKWEZI

Gicumbi: Meya w’agateganyo nawe yeguye ataramara icyumweru kuri uyu mwanya

Gicumbi: Meya  w’agateganyo nawe yeguye ataramara icyumweru kuri uyu mwanya
1-06-2018 saa 08:58' | By Vincent Nsengiyumva | Yasomwe n'abantu 8075 | Ibitekerezo 4

Inkubiri y’ukwegura kwa komite nyobozi z’uturere yasubiye mu Karere ka Gicumbi,aho Umuyobozi w’aka karere by’agateganyo Jean Claude Karangwa Sewase nawe yaraye atanze ibaruwa y’ubwegure bwe.

Karangwa Sewase yemejwe na Njyanama y’Akarere ka Gicumbi kuwa 25 Gicurasi 2018, nyuma y’uko iyi njyanama yari imaze kweguza Meya Mudaheranwa Juvenal na ba Visi Meya bombi kubera amakosa imicungire mibi y’umutungo w’akarere.

Jean Claude Karangwa Sewase wari umaze igihe akora mu mirimo itandukanye irimo n’uburezi abaye umuyobozi w’akarere uyoboye igihe gito mu mateka y’u Rwanda kuko yeguye amaze iminsi 6 gusa kuri uyu mwanya, dore ko yari yahawe inshingano tariki 25 Gicurasi akaba yeguye tariki 31 Gicurasi 2018.

Mu kiganiro yagiranye n’ikinyamakuru Ukwezi.com Jean Claude Karangwa Sewase yavuze ko mu minsi mike amaze kuri aka kazi yaje gusanga hari ibyo atujuje, gusa ariko bitamubuza gukomeza gutanga umusanzu mu kubaka igihugu nk’uko asanzwe abikora mu bundi buryo.

Yagize ati “Nanditse ibaruwa nsaba guhagarika imirimo nari nashinzwe n’inama Njyanama yo kuyobora akarere by’agateganyo, kubera ko iyo umuntu amaze kugera mu kazi akareba akazi uko kangana ndetse n’ibyo gasaba, hari ubwo afata icyemezo kugira ngo wenda adatinda no mu nzira bikaba byabuza akandi kazi kugenda neza.

Yakomeje agira ati “ Mu by’ukuri ubuzima bw’umuntu ahuramo n’ibibazo byinshi nanjye rero ntabwo ndi muri paradizo ku buryo ntahura n’ibibazo.Hari urubanza nari mfite ngomba kubanza kurangiza namara kururangiza akaba aribwo nategura n’izindi gahunda zijyanye no gutanga umusanzu wanjye mu kubaka igihugu nk’uko nsanzwe mbikora n’ubundi."

Karangwa Sewase yakomeje avuga ko nk’umuyobozi aba agomba kuba inyangamugayo kandi ngo ubunyangamugayo buraharanirwa ari nayo mpamvu yahisemo kubanza gushyira ku ruhande ibijyanye n’izo manza akaba yabona gukomeza gutanga umusanzu mu kubaka igihugu igihe yaba yongeye kugirirwa icyizere.

Mu kiganiro Guverineri w’Intara y’Amajyaruguru Gatabazi Jean Marie Vianney yagiranye na City Radio, yemeje ko Meya Jean Claude Karangwa Sewase yaraye ashyikirije Njyanama y’akarere ka Gicumbi ibaruwa y’ubwegure bwe.

Yagize ati “Twasanze afite urubanza yaburanaga rw’inshinjabyaha . Kandi umuntu uri mu rubanza ntiwamenya uko bizarangira.Ubwo rero yaribwirije arasezera.”

Mu gihe kitarenze amezi abiri gusa abayobozi b’uturere twa Rusizi,Ruhango, Umujyi wa Kigali, Nyabihu,Gicumbi, Bugesera, Nyagatare, Huye na Nyaruguru barimo nab a Visi Meya babo bamaze kuva ku buyobozi, bamwe bavuga ko begujwe abandi bakaba baragaragaje ko beguye ku mpamvu zabo bwite.

Meya Karangwa akoze agashya ko kwegura ku buyobozi atarabumaraho n’icyumweru


INKURU ZA :
Tanga Igitekerezo
Ibitekerezo 4
Felix Kuya 2-06-2018

Nta gitangaje ko abayobozi bakegura kuko Nina badashoboye kubahiriza inshingano bahawe na rubanda cg akazi bakora kakaba kananiza cyane uwagakoze neza,birakwiye ko abantu baruhurana,bitabaye ngombwa ko umuntu aturika ubwonko.

Tuyizere Vianney Kuya 2-06-2018

Ubundi umuntu wese ashobora kwiyumva intege nke ku nshingano yarashinzwe bityo aho guhatiriza umuntu nkuwo yagakwiye gutanga umwanya, aho kigirango bage beguzwa bamaze kugwa mu makosa nibage bigaragaza hahiri Kare

Tuyizere Vianney Kuya 2-06-2018

Ubundi umuntu wese ashobora kwiyumva intege nke ku nshingano yarashinzwe bityo aho guhatiriza umuntu nkuwo yagakwiye gutanga umwanya, aho kigirango bage beguzwa bamaze kugwa mu makosa nibage bigaragaza hahiri Kare

MUNYEMBABAZI Diogene Kuya 1-06-2018

Politiki Niki?politiki ni uburyo bwo KUYOBORA,no GUCUNGA neza UMUTUNGO hakoreshejwe UBUHANGA.muri afurika mu bihugu bimwe na bimwe usanga hari abinjira muri politiki batazi neza icyaricyo bityo bakananirwa vuba,mu bindi bihugu byo Ku isi naho bibaho ariko hamwe na hamwe.usanga rero hari amashuli yigisha politiki,nandi abitangira amahugurwa yigihe kigufi.kenshi abiga ibijyanye n,umutekano ndetse n,amadini bakunda guhabwa n,inyigisho za politiki kgo bazafashe abo bazayobora kubaho neza.kuba umuntu yakurwa cg yasezera Ku kazi ka politiki ni ibintu bisanzwe nkuko umuzamu,umwubatsi,umushumba w,amatungo basezera Ku mirimo cg bagasezererwa.ubuzima burakomeza kdi nta gikuba gikwiriye gucika!itangazamakuru umurimo waryo ni ugushakira abakiliya inkuru zituma barikunda,bityo rero riragomba kujya ryandika ariko mu buryo bunoze budashyusha imitwe ibyo ritangaza.umuyobozi wese aba ari umugaragu wabo ayobora kdi kwicisha bugufi no gukora cyane bizana umusaruro umuntu iyo yirinze kuba nyamwigendaho.gufatanya n,abandi ,kumenya aho abo uyobora bava niyo bagana,kwemera kugirwa inama bijyanye n,umutima w,ubwitange bizatuma umuyobozi ajya mw’ijuru.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...