AMAKURU

UKWEZI

Iby’ingenzi wamenya kuri Louise Mushikiwabo ushobora kureka vuba umwanya wa Minisitiri

Iby’ingenzi wamenya kuri Louise Mushikiwabo ushobora kureka vuba umwanya wa Minisitiri
9-07-2018 saa 10:36' | By Chief Editor | Yasomwe n'abantu 11200 | Ibitekerezo 10

Louise Mushikiwabo, Minisitiri w’Ububanyi n’Amahanga n’Umuryango wa Afurika y’Uburasirazuba ndetse akaba ari n’umuvugizi wa Guverinoma y’u Rwanda, ni umunyapolitiki ukomeye mu Rwanda by’umwihariko akaba ari we umaze imyaka myinshi ku mwanya adasimburwa. Kugeza ubu ariko, birashoboka cyane ko yareka umwanya wo kuba Minisitiri ndetse no kuba Umuvugizi wa Guverinoma, mu gihe yaba atorewe kuba Umunyamabanga Mukuru w’Umuryango w’Ibihugu bikoresha ururimi rw’Igifaransa. Muri iyi nkuru, turagaruka mu by’ingenzi umuntu yamumenyaho binajyanye n’uyu mwanya ahabwa amahirwe yo kuzatorerwa.

Mu matora azaba mu kwezi k’Ukwakira uyu mwaka, Louise Mushikiwabo aziyamamariza kuyobora umuryango w’Ibihugu bikoresha ururimi rw’Igifaransa aho biteganyijwe ko azahatana na Michaëlle Jean ukomoka muri Canada akaba ari nawe umaze imyaka 4 ayobora uyu muryango. Perezida Emmanuel Macron w’u Bufaransa ndetse n’Abakuru b’ibihugu bya Afurika benshi, bamaze kugaragaza ko bashyigikiye byeruye Louise Mushikiwabo.

JPEG - 164.2 kb

Michaëlle Jean niwe uyobora uyu muryango kuva muri 2014 kandi azongera kwiyamamaza

Mu gihe Louise Mushikiwabo yaba atorewe uyu mwanya, byaba ngombwa ko areka umwanya wa Minisitiri ndetse n’umwanya w’Umuvugizi wa Guverinoma. Byaba bisobanuye kandi ko hagomba gushakwa undi ukomatanya izi nshingano zitoroshye yari amazeho igihe, cyangwa se hakajyaho babiri kuko byashoboka ko Minisitiri w’Ububanyi n’Amahanga mushya ataba ari we ugirwa Umuvugizi wa Guverinoma.

Louise Mushikiwabo asanzwe afitanye umubano umeze ute n’uyu muryango?

Minisitiri Louise Mushikiwabo, asanzwe abana bya hafi n’umuryango w’ibihugu bikoresha ururimi rw’igifaransa ndetse nka Minisitiri ufite ububanyi n’amahanga mu nshingano ze, yanagiye aganira n’ubuyobozi bw’uyu muryango. Nka tariki 5 Nzeri 2012, yagiranye ibiganiro na Abdou Diouf wigeze kuba Perezida wa Senegal, ariko muri icyo gihe akaba ari we wayoboraga Umuryango w’Ibihugu bikoresha ururimi rw’Igifaransa.

JPEG - 42.1 kb

Louise Mushikiwabo na Abdou Diouf muri 2012 bagiranye ibiganiro

Baganiriye icyo gihe ku bijyanye n’ibibazo mpuzamahanga by’umwihariko ibyo mu karere u Rwanda ruherereyemo, ariko by’umwihariko banibanga ku mibanire n’ubufatanye u Rwanda rufitanye n’uyu muryango n’uburyo byanozwa bikaba byiza kurushaho.

JPEG - 73.6 kb

Louise Mushikiwabo na Abdou Diouf mu kwezi gushize i Paris

Ubwo yari i Paris mu Bufaransa muri Kamena uyu mwaka, Minisitiri Louise Mushikiwabo, yagiranye ibiganiro n’uyu Abdou Diouf wayoboye uyu muryango mu gihe cy’imyaka 12, maze Mushikiwabo avuga ko yamugishije inama. Yagize ati “Muri gahunda ya kandidatire yanjye ku buyobozi bw’Umuryango w’Ibihugu bikoresha Igifaransa, nashimishijwe no kumva inama ze z’ingirakamaro no kwigira ku bunararibonye bwe bw’imyaka 12 yayoboye OIF.”

Mu mirimo yindi yagiye akora, Mushikiwabo afite ibigwi ku rwego mpuzamahanga...

Louise Mushikiwabo, yavukiye i Jabana mu karere ka Gasabo tariki 22 Gicurasi 1961, bivuga ko afite imyaka 57 y’amavuko. Ubu ni Minisitiri w’Ububanyi n’Amahanga n’Ubutwererane akaba n’Umuvugizi wa Guverinoma y’u Rwanda.

Louise Mushikiwabo yize muri Kaminuza Nkuru y’u Rwanda, aho yakuye impamyabumenyi mu bijyanye n’indimi. Muri Nyakanga 1985 yabonye akazi mu ishuri ryisumbuye rya Lycée de Kigali, aho yigishaga ururimi rw’icyongereza.

JPEG - 2.9 Mb

Mu mwaka w’i 1986, Louise Mushikiwabo yahawe buruse yo kujya kwiga muri Leta Zunze Ubumwe za Amerika muri Kaminuza ya Delaware aho yize ibijyanye n’indimi n’ubusemuzi (languages and interpretation). Arangije aha yabonye akazi i Washington D.C. ndetse ubwo Jenoside yakorewe abatutsi mu 1994 yabaga yari ari muri Amerika ariho agikora.

Afatanije na Jack Cramer, Louise Mushikiwabo yanditse igitabo kuri Jenoside yakorewe abatutsi mu Rwanda, bacyita “ Rwanda Means The Universe: A Native’s Memoir of Blood and Bloodlines”. Louise Mushikiwabo kandi ari mu bashinze umuryango Rwanda Children Found wafashaga imfubyi zasizwe iheruheru na Jenoside yakorewe abatutsi mu 1994.

Muri 2004 Mushikiwabo yahawe igihembo na kaminuza yo muri Amerika yigisha ibijyanye n’ububanyi n’amahanga, iki gihembo kikaba kitwa : “Outstanding Humanitarian Award” ku bw’ibikorwa by’ubumuntu byamuranze. Mushikiwabo yamaze imyaka 22 muri Amerika aza kugaruka mu Rwanda muri Werurwe 2008.

JPEG - 99.3 kb

Akigera mu Rwanda, Perezida Paul Kagame yahise amugira Minisitiri w’itangazamakuru, kuva tariki 7 Werurwe 2008 aba yinjiye mu bagize Guverinoma y’u Rwanda. Kuva mu kwezi k’Ukuboza 2009 kugeza ubu, Louise Mushikiwabo ni Minisitiri w’Ububanyi n’Amahanga n’Ubutwererane, umwanya amazeho imyaka ikabakaba 7. Ubu kandi ninawe muvugizi wa Guverinoma y’u Rwanda.

Mu mwaka wa 2014, Minisitiri Louise Mushikiwabo yashyizwe ku rutonde rw’abagore 10 b’Indashyikirwa ku mugabane wa Afurika, urutonde agaragaraho ari no muri 3 ba mbere. Ni urutonde rwakozwe na Radio Mpuzamahanga y’Abafaransa (RFI), hagendewe ku bikorwa bagezeho n’ibyo bagejeje kuri rubanda, ubuhanga n’uruhare bagira mu guhindura no gufasha abatuye isi.

Hari abantu benshi hirya no hino, bafata Minisitiri Louise Mushikiwabo nk’umuntu w’icyitegererezo mu buzima bwabo, kubera umuhati, kwigirira icyizere, guharanira guhesha ishema igihugu cye n’ibindi by’ubutwari bimuranga. Mu b’ibyamamare bagiye babitangaza ko bamufata nk’icyitegererezo mu buzima bwabo, harimo Miss Rwanda 2016, Mutesi Jolly ndetse n’umunyamakuru Isheja Sandrine Butera.


INKURU ZA :
Tanga Igitekerezo
Ibitekerezo 10
EPhrem Kuya 20-07-2018

Amahirwe masa kuri nyakubwa Minisitiri ndetse akaba n’Umuvugizi w’Abanyarwanda twese.

Sidon Kuya 18-07-2018

Tumwifurije insinzi

Silas Kuya 13-07-2018

Imana imuhe amahirwe atugireyo

Silas Kuya 13-07-2018

Imana imuhe amahirwe atugireyo

Silas Kuya 13-07-2018

Imana imuhe amahirwe atugireyo

Silas Kuya 13-07-2018

Imana imuhe amahirwe atugireyo

Silas Kuya 13-07-2018

Amahirwe masa kuri Mushikiwabo.

ildephonse Kuya 11-07-2018

Imana ishimwe cyane amahirwe Masa kuruwo mwanya

bimawuwa Kuya 11-07-2018

Ariko ntabwo muvuze ubuzima bwe bwa buri munsi nu mubyeyi se abite abana arubatse ese umugabo we akora iki.abayobozi benshi bacu muziko tutabazi neza mubacukumbure mubatubwire abaribo.

Aulerie Kuya 9-07-2018

Yewe Louise nanjye ndamwemera peeee musabira umugisha nokuzaramba ingoma igihumbiii Imana ijye imuhozaho imigisha yayo.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...