konka coffee
KONKA

AMAKURU

UKWEZI
Minijust

Iby’urupfu rwa Patrick Karegeya bigiye gutangira gukurikiranwa muri Afurika y’Epfo

Iby’urupfu rwa Patrick Karegeya bigiye gutangira gukurikiranwa muri Afurika y’Epfo
11-01-2019 saa 16:48' | By Chief Editor | Yasomwe n'abantu 6503 | Ibitekerezo 4

Mu ijoro rya tariki 31 Ukuboza 2013, nibwo Col Patrick Karegeya wahoze akuriye ibiro by’ubutasi mu Rwanda, yiciwe muri Hoteli yo mu mujyi wa Jonannesburg muri Afurika y’Epfo, akaba yari yarahungiye muri iki gihugu nyuma yo gukurikiranwa n’inkiko zo mu Rwanda. Nyuma y’imyaka itanu, hagiye gutangirwa kumvwa abatangabuhamya bavuga ko hari ibyo bazi ku rupfu rwe.

Tariki 16 Mutarama 2019, mu mujyi wa Johannesburg, abatangabuhamya barenga 30 bazatangira kugira ibyo bavuga ku rupfu rwa Patrick Karegeya, abashinjwa babiri bose bakazaba badahari kuko ngo bataba muri iki gihugu cyo mu majyepfo y’umugabane wa Afurika.

Kennedy Gihana wunganira mu mategeko umuryango wa Karegeya, avuga ko ibihugu byombi, u Rwanda na Afurika y’Epfo, bizaba ngombwa ko bikorana mu iburanishwa kuko ngo nihagira amakuru u Rwanda rusabwa ajyanye n’abakekwa, Leta ya Afurika y’Epfo izabivuganaho n’iy’u Rwanda.

Muri Werurwe 2014, nyuma y’amezi atatu Patrick Karegeya yishwe, Afurika y’Epfo yirukanye abadipolomate batatu b’Abanyarwanda, ibashinja kugira uruhare mu rupfu rwe, ndetse no gusagarira Abanyarwanda bahungiye muri iki gihugu. Ibi byahise byerekana ko ibihugu byombi bitabanye neza icyo gihe, ndetse bishimangirwa n’uko u Rwanda narwo rwahise rwirukana abadipolomate batandatu bo muri Afurika y’Epfo.

Gusa umubano w’ibihugu byombi wongeye kumera neza n’ubwo mu minsi ishize uwari ambasaderi wa Afrika y’Epfo yasubiye iwabo n’ubwo impamvu zatanzwe zo ntaho zihuriye n’iby’urupfu rwa Patrick Karegeya.

Patrick Karegeya yahoze afite umwanya ukomeye mu gisirikare cy’u Rwanda yari yarahawe na Perezida Kagame akaba n’umugaba w’Ikirenga w’ingabo z’u Rwanda, akaba yarigeze gukorera ishami rishinzwe iperereza ryo hanze y’igihugu. Nyuma yo gufungwa kabiri azira imyitwarire idahwitse, muri 2006 yaje kwamburwa ipeti rye rya Colonel.

Patrick Karegeya yaje guhungira muri Afurika y’epfo muri 2007 ndetse aza kuburanishwa adahari muri 2011, ahamwa n’ibyaha byo kurema umutwe w’abagizi ba nabi, gukurura amacakubiri n’ivangura; ibyaha bivutsa igihugu na Leta umudendezo no gusebanya, hanyuma akatirwa imyaka 20 y’igifungo. Yatangaje ku mugaragaro ko we na bagenzi be barimo Kayumba Nyamwasa barwanya ubutegetsi bw’u Rwanda mu buryo bweruye, kugeza ubwo yaje kwicirwa muri Afurika y’Epfo mu ijoro rishyira Ubunani bwa 2014.

Mu mpera za Mutarama 2014, Ikinyamakuru Jeune Afrique cyagiranye ikiganiro na Perezida Kagame, kimubaza uwishe Patrick Karegeya. Mu gusubiza umunyamakuru, Umukuru w’Igihugu yagaragaje ko abenshi bahise babimugerekaho bakavuga ko ari we wica abatavuga rumwe na we.

Perezida Kagame ati: "Mu bifatika, ntacyo bimbwiye. Kuva bikiba, nta kubanza gushakira ahandi ndetse nta no gutegereza ibiva mu iperereza rya Polisi, igisubizo cy’ibinyamakuru uko byagenda kose ni kimwe: Uwo bihama ni Kagame, yica abamurwanya, afite akamenyero ko kubikora..."

Perezida Kagame yakomeje agira ati: "Ku babaza icyo kibazo, bazi neza ko bene uriya muntu yihaye kwigira umuvugizi w’ubugizi bwa nabi n’iterabwoba, nsubiza ntya: Iterabwoba rigira ikiguzi, ubugambanyi bugira ikiguzi. Umuntu yicwa nk’uko nawe yishe. Buri wese agira urupfu rumukwiriye."


INKURU ZA :
Tanga Igitekerezo
Ibitekerezo 4
apple Kuya 12-01-2019

@ferdinand, ngo icyo wamuhora cyose?!! ubwose nsanze uguye kunyicira umwana cg ugiye kwiturikirizaho igisasu mwisoko nkakurasa ngo ntabare inzirakarengane kubwawe naho naba nkosheje?!!

maniraho Kuya 12-01-2019

Ndabaza uwitwa DONA.Ni bande batuma agents kujya kwica abantu?Abo hejuru uvuga ni bande?Ni president,ministers cyangwa senior officers?Wabavuze neza ko bazwi ndetse n’amazina yabo?Amaherezo bazabibazwa.

Dona Kuya 11-01-2019

Igisubizo cya H.E PK ni kiza kandi nanjye nicyo nsabira abantu bose b’ abicanyi bari mu gihugu cyacu. Kuva kubo hejuru babatuma kugeza kuri za nyakabwana zibishyira mu bikorwa.

furaha gaspard Kuya 11-01-2019

Nubwo abantu batazi uwishe Karegeya,Imana yo iramuzi neza kandi izamuhana.Uretse ko na Karegeya yishe abantu benshi kubera umwanya yari afite nka Maneko mukuru.Bavuga ko ari mu bicishije minister Sendashonga na Colonel Lizinde babasanze muli Kenya.Kwica umuntu Imana yiremeye kandi utazamuzura,it is stupid.Icyo wamuhora cyose.Imana niyo yonyine ifite uburenganzira bwo guhora (retribution) nkuko bible ivuga.Nta mwicanyi numwe uzaba muli paradizo dutegereje ivugwa muli 2 petero 3:13.Kugirango atazakomeza kumara abantu.Iyo wishe umuntu,ni nkaho uba wishe Imana,kubera ko "twaremwe mu ishusho y’Imana".

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...