AMAKURU

UKWEZI

Ibyo gutaburura ubwato Abadage batabye mu Kivu byabaye ingorabahizi

Ibyo gutaburura ubwato Abadage batabye mu Kivu byabaye ingorabahizi
6-12-2018 saa 12:36' | By Chief Editor | Yasomwe n'abantu 7133 | Ibitekerezo 1

Ubwato Abadage batabye mu Kiyaga cya Kivu mu gihe cy’Intambara ya mbere y’isi yose, bumaze imyaka myinshi buri mu butaka mu gihe byagiye bivugwa kenshi ko bugiye gucukurwa ariko kugeza ubu ngo byabaye ingorabahizi kuko habonetse imbogamizi nyinshi zatumye budacukurwa nk’uko byakomeje kuvugwa.

Ubu bwato butabye ku nkengero z’ikiyaga cya Kivu mu mudugudu wa Kagugu, mu Kagari ka Musure, mu Murenge wa Mushubati mu Karere ka Rutsiro, bukaba bwaratabwe n’Abadage mu Kivu nyuma yo gutsindwa intambara ya mbere y’isi kugirango Ababibiligi batazabwitwarira. Abaturage bahaturiye bemeza ko bajya babona imishumi y’ubwo bwato.

Hashize imyaka isaga ine abayobozi batandukanye bizeza ko ubu bwato bugiye gucukurwa bugashyira mu birango by’amateka y’u Rwanda, ariko Amb. Robert Masozera uyobora Ikigo cy’Ingoro z’Igihugu z’Umurage w’u Rwanda yatangarije Ukwezi.com ko imirimo yo gucukura ubu bwato yahuye n’imbogamizi.

Yagize ati: "Twasanze bigoranye, hari imbogamizi nyinshi twabonyemo. Icya mbere birahenze cyane mu bijyanye n’amafaranga, kuburyo n’ayakoreshwa mu kubucukura yaruta cyane agaciro kabwo mu mafaranga, ariko ntabwo turadohoka, biragoranye ariko turacyagerageza"

Muri 2014, Alphonse Umulisa wayoboraga Ikigo cy’Ingoro z’Igihugu z’Umurage w’u Rwanda yatangaje ko intara ya Rhenanie Palatinat yo mu Budage bafitanye imikoranire myiza bakaba bagiye no gufatanya gutaburura ubwo bwato mu kiyaga cya Kivu. Icyo gihe mu magambo ye yagize ati: "Ubu mu minsi ya vuba bagiye gutangira kudufasha kuvana mu Kiyaga cya Kivu ubwato bwarwanye mu Ntambara ya Mbere y’Isi."

Muri Nzeri 2014 kandi, ubwo Habineza Joseph wari Minisitiri w’Umuco na Siporo icyo gihe yasuraga ingoro ndangamurage yari yuzuye mu karere ka Karongi, yeretswe ubu bwato maze nabwo Alphonse Umulisa avuga ko harimo gushakishwa uburyo ubwo bwato bwazakurwa mu Kivu noneho bugashyirwa mu mutungo bazajya berekana cyane ko ngo bubitse amateka akomeye hagati y’u Rwanda n’u Budage.

JPEG - 90.3 kb

Aha ni muri 2014, Amb. Habineza Joseph wari Minisitiri w’Umuco na Siporo yerekwaga n’abaturage ahatabwe ubwo bwato

Icyo gihe yavuze ko barimo kuvugana na Minisiteri y’Ingabo kugira ngo bashakire hamwe uko ubwo bwato bwakurwa mu Kivu dore ko ngo bivugwa ko bwafashaga Abadage cyane mu ntambara ya mbere y’isi yose. Ibi Umulisa Alphonse yongeye kubisubiramo mu mpera za 2015 ariko nyuma yarafunzwe ndetse Inama y’Abaminisitiri yateranye kuwa Gatatu tariki 12 Ukwakira 2016, yemeza Iteka rya Perezida rimwirukana burundu mu bakozi ba Leta atarabasha kubigeraho.

Nyuma y’imyaka isaga ibiri Amb. Robert Masozera ahawe inshingano zo kumusimbura, byagaragaye ko imirimo yo gutaburura ubu bwato igoranye cyane kuburyo nta cyizere atanga cya vuba cyo kuba ubu bwato bwazatabururwa, ahubwo ngo hari amafoto yabwo yafashwe ubwo bwakurwaga mu Budage buzanwa mu Rwanda ari nayo yifashishwa mu ngoro ndangamateka mu kwerekana iby’ubwo bwato.

JPEG - 104.4 kb

Umuyobozi Mukuru w’Ikigo cy’Igihugu cy’Ingoro z’umurage w’u Rwanda, Ambasaderi Masozera Robert


INKURU ZA :
Tanga Igitekerezo
Ibitekerezo 1
gisagara Kuya 7-12-2018

Ubu bwato bw’Abadage bunyibukije Ubwato bwo ku gihe cya NOWA (Noah’s Ark).Nkuko Yesu yabivuze muli Matayo 24 imirongo ya 37-39,Umwuzure wo ku gihe cya Nowa wishe abantu bose bari batuye isi,hasigara abantu 8 gusa bumviraga Imana.Ubwo Bwato bwaruhukiye ahitwa Mount Ararat muli Turkey.
Kugeza n’ubu Abashakashatsi barabushatse barabubura.Yesu yarangije inkuru ye avuga yuko no ku Munsi w’Imperuka dutegereje,Imana izakura mu isi abantu bose bakora ibyo itubuza.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...