AMAKURU

UKWEZI

Inkiko z’Ubwongereza zinangiye kohereza mu Rwanda abakekwaho uruhare muri Jenoside

Inkiko z’Ubwongereza zinangiye kohereza mu Rwanda abakekwaho uruhare muri Jenoside
12-04-2018 saa 12:05' | By Akayezu Jean de Dieu | Yasomwe n'abantu 1782 | Ibitekerezo 1

Leta y’u Rwanda yagiranye ibiganiro n’Igihugu cy’Ubwongereza ku bijyanye n’ubutabera byibanze cyane ku bantu batanu bakekwaho uruhare muri Jenoside yakorewe Abatutsi bakaba bacumbikiwe n’iki gihugu. Aho kuri ubu hashize imyaka 11 u Rwanda ruburana n’inkiko zo mu Bwongereza ku iyoherezwa ry’aba bantu ariko izi nkiko zikaba zarakomeje kwinangira.

Kuri uyu wa Kane tariki 12 Mata 2018, ku cyicaro cya Minsiteri y’Ubutabera niho habereye ibi biganiro byahuje Uhagarariye Ubwongereza mu Rwanda Madamu Joanne Lomas na Minisitiri w’Ubutabera akaba n’Intumwa nkuru ya Leta, Busingye Johnston.

Amabasaderi w’Ubwongereza mu Rwanda, Joanne Lomas yabwiye itangazamakuru ko ibiganiro bagiranye byibanze cyane ku mubano w’ibihugu byombi mu bijyanye n’ubutabera ariko bakaba bagarutse by’umwihariko ku bantu batanu bakekwaho uruhare muri Jenoside yakorewe Abatutsi muri Mata 1994 kuri ubu bakaba bacumbikiwe n’igihugu cy’Ubwongereza.

Yagize ati “Twaganiriye kuri bamwe mu bakekwaho ibyaha bya Jenoside bari mu gihugu cyacu, nijeje Minisitiri ko ibi bibazo tugiye kubishyiramo ingufu mu kubikurikirana n’ubwo ibi ari ibibazo bijyanye n’ubutabera bikaba atari ibya Politiki twe tutabyivangamo ariko hari urwego rwashyizweho rushinzwe kubikurikirana kandi twijeje kurushyiramo ingufu no kwihutisha imikorere yarwo.”

Minisitiri Busingye yavuze ko mubyo baganiriye harimo kuba yamwijeje hari urwego rushinzwe iperereza bashyizeho rushinzwe gukurikirana aba bantu kandi ngo bemeranyije ko igihugu cy’Ubwongereza kigiye gushyira imbaraga mu kuba aba bantu bahabwa ubutabera mu gihe cya vuba

Yagize ati “Hashize imyaka 11 tugerageza kuburana nabo kugira ngo inkiko zo mu Bwongereza zibohereze kuburanira mu Rwanda, ntabwo byashobotse inkiko zo mu Bwongereza zagumye zitabyemera ubu rero twasabye ko niba zitabyemera nibafate umwanzuro wo kubaburanishiriza hariya.”

Yakomeje agira ati “Icyo yambwiye ni uko uwo mwanzuro bawakiriye, ikitwa urwego rwabo rw’ibanze rukora iperereza ku byaha nk’ibyo bakurikiranyweho, yambwiye ko uru rwego rwabihaye uburenere bwabyo.”

Minisitiri Busingye kandi yavuze ko ikindi kintu cya ngombwa baganiriye ni uko igihe gifite uruhare runini aho bagarutse kuri iyi myaka yose ishize aba bantu badahabwa ubutabera.

Aha ni mu Ugushyingo 2016, Ubwo Seyoboka Jean Claude nawe ukurikiranywho ibyaha bya Jenoside yagezwaga mu Rwanda yoherejwe n’Ubutabera bwa Canada.

Ubwongereza bwanze gushyikiriza u Rwanda abantu batanu bakekwaho uruhare muri Jenoside

Mubo Ubwongereza bwanze kurekura harimo uwitwa Bajinya Vincent akekwaho kuba mu itsinda ryari rifitanye isano rya hafi na Perezida Habyarimana Juvénal wari Perezida mu gutegura Jenoside no kwica Abatutsi benshi muri Kigali. Ubwo bwicanyi bwagiye bukorerwa kuri za bariyeri ku bufatanye n’interahamwe.

Bajinya yatawe muri yombi na Polisi yo mu Bwongereza kuya 28 Ukuboza 2006, nyuma y’ubusabe bwa Leta y’u Rwanda.

Bajinya yasabye ubuhungiro mu Bwongereza, mu gihugu yakoreye imyaka myinshi nk’Umuganga mu bitaro bya Praxis ndetse aza no guhindura izina rye yiyita Vincent Brown.

Hari kandi na Mutabaruka Célestin yahoze ari Pasiteri mu itorero ry’abapantekote, aregwa kugira uruhare mu gufatanya n’interahamwe mu gutegura, guhagarikira no gushyira mu bikorwa ubwicanyi bwakorewe abasaga ibihumbi 20 barimo abagabo abagore n’abana.

Munyaneza Charles yari Burugumesitiri w’iyahoze ari Komini Kinyamakara muri Perefegitura ya Gikongoro, na we aregwa kugira uruhare mu gutegura no gushyira mu bikorwa umugambi wa jenoside ndetse no kuyobora ibitero byagabwaga ku mugezi wa Mwogo muri Gikongoro byaguyemo abatutsi benshi.

Celestin Ugirashebuja yavutse mu 1953. Yahoze ari Burugumesitiri wa Komini Kigoma muri Perefegitura Gitarama, na we aregwa gutegura no gushyira mu bikorwa umugambi wa Jenoside, aho yari ayoboye. Bivugwa ko yatanze itegeko ku nterahamwe ryo kwica Abatutsi bari bajyanywe ku biro bye kuri komini, abaha n’amabwiriza yo kujya guhiga Abatutsi aho byakekwaga ko bihishe ngo bicwe.

Mu cyumweru cya kabiri cy’ukwezi kwa kane, 1994, Ugirashebuja yayoboye igitero cy’abagendaga bahiga ndetse bakanafata ku ngufu abagore.Akimara kugera mu buhungiro yakomeje gutangaza amagambo abiba urwango hagati y’Abanyarwanda.

Nteziryayo Emmanuel yahoze ari Burugumesitiri wa Komini Mudasomwa muri Gikongoro aregwa kugira uruhare mu itegurwa n’ishyirwa mu bikorwa ry’umugambi wa Jenoside.

Uyu mugabo kandi yayoboye interahamwe mu bwicanyi bwabereye muri ako gace bwaguyemo abatutsi benshi. Mu Bwongereza yabayeyo yihishahisha ndetse yiyita Emmanuel Ndikumana.


INKURU ZA :
Tanga Igitekerezo
Ibitekerezo 1
Bandira Charles Kuya 23-04-2018

Ariko nje ndareba kutohereza abo bishi, ari igikorwa gikomeza ku bihugu bya mpazibindi,abakoloni nubu ntabwo barunamura icumu, ubu barateregeje aho bamenera ngo bongere basenye, abayobozi b´Urwanda
bicare batekereze, basesengure, bashishoze, impamvu ziriya rapports zompi zabiyita imiryango iharanira uburenganzira bwa muntu ( ariko bigaragara ko bakina imikino ya politique, murebe ibiganiro bibera muri ziriya tangazamakuru za bo, haba amerika, ubufaransa, ubwongereza,
buriya n´utudirisha barunguruka igihugu cacu, bashaka gusebya no gutesha agaciro ibikorwa dukora kugira twame tubafukamira.
Ntabwo yewe baramenya ko aho ibintu bigeze byahindutse, mukaba muzi neza ko iyo bashya kwica no gusenya ibindi bihugu babyumvikanaho kandi bigatangira kunyura mumiyoboro yabo y´amaradiyo n´ibitangazamakuru, ndagira inama rero abayobozi b´igihugu kurikanura, bagahasha uwo wese agaragaweho uruhare rwo gufatanya nabo.

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...