konka coffee
KONKA

AMAKURU

UKWEZI

Kuba Kizito Mihigo yararetse kujurira, bivuze iki ku mbabazi yasabye Perezida Kagame?

Kuba Kizito Mihigo yararetse kujurira, bivuze iki ku mbabazi yasabye Perezida Kagame?
12-09-2018 saa 10:41' | By Chief Editor | Yasomwe n'abantu 6257 | Ibitekerezo 4

Nyuma yo gukatirwa imyaka 10 y’igifungo azira ibyaha bitatu birimo kurema umutwe w’iterabwoba, kugambirira kugirira nabi ubutegetsi buriho n’icyaha cyo gucura umugambi w’ubwicanyi, Kizito Mihigo yari yahise ajuririra iki gihano mu rukiko rw’ikirenga ariko kuri uyu wa Mbere tariki 10 Nzeri 2018 nibwo byemejwe n’Urukiko ko yafashe icyemezo cyo kureka ubujurire bwe agakomeza igihano yahawe. Muri iyi nkuru turarebera hamwe inyungu ashobora gukura muri iki cyemezo yafashe ndetse n’icyo bivuze ku mbabazi yakunze gusaba Perezida Paul Kagame.

Ubwo Kizito Mihigo yagezwaga bwa mbere imbere y’urukiko, yahise yemera ibyaha byose aregwa ndetse aboneraho no gusaba imbabazi umukuru w’igihugu.

JPEG - 55.1 kb

Icyo gihe yagize ati: “Nsabye imbabazi. Nzi ko igihugu cyacu kiyoborwa n’abantu bafite umutima ntabwo kiyoborwa n’ibikoko, bababariye kugeza no kubishe abandi muri Jenoside. Nongera gusaba imbabazi mpereye ku buyobozi bw’igihugu, Perezida wa Repubulika musaba imbabazi mubwira ko nta kibi mwifuriza. Mbizeza ko nkiri wa wundi n’ubwo icyaha cyaje kikankubita hasi, nimbona imbabazi, nzereka Abanyarwanda imigambi yanjye no kurushaho gushimangira ibyiza nakoze mbere.”

Tariki 29 Ukuboza 2014, Kizito Mihigo na Ntamuhanga Cassien bari basabiwe n’ubushinjacyaha gufungwa burundu naho Dukuzumuremyi Jean Paul asabirwa imyaka 50 y’igifungo, mu gihe Agnes Niyibizi we yasabiwe imyaka 25 y’igifungo.

Ubwo yasabirwaga gufungwa burundu, Kizito Mihigo yongeye kugaragaza ko agisaba imbabazi Perezida wa Repubulika n’umufasha we ku magambo mabi yabavuzeho, asaba imbabazi abacitse ku icumu rya Jenoside bose, ndetse anisegura ku buyobozi bw’igihugu n’Abanyarwanda muri rusange, aho yasabaga ko yahabwa amahirwe agasubira mu muryango nyarwanda gukosora amakosa yakoze.

JPEG - 53 kb

Tariki 27 Gashyantare 2015, nibwo Kizito Mihigo yakatiwe igifungo cy’imyaka 10, igihano byanavuzwe ko ari gito kuko yemeye ibyaha akanabisabira imbabazi. Iki gihano yahise akijuririra kandi nubundi akomeza kuburana yemera ibyaha byose aregwa, bivuga ko icyo yasabaga ari ukugabanyirizwa igihano kuko ataruhije ubutabera.

Kwemera icyaha kwa Kizito Mihigo, biri mu bigize impamvu zikomeye z’inyoroshyacyaha, mu ngingo ya 71 n’iya 77 y’itegeko ngenga, bivuga ko yagabanyirijwe ibihano ugereranyije n’ibyo yari guhabwa iyo ahakana ibyaha kandi ubushinjacyaha butanga ibimenyetso simusiga bimuhamya ibyo byaha. Imbabazi zemewe n’urukiko yarazihawe, ni izo kumugabanyiriza ibihano ku bwo kutaruhanya n’abacamanza.

Ibi binashimangira ko Kizito Mihigo, ibyo yasabaga mu bujurire bwe yari yaramaze kubihabwa kuko iyo arushya ubutabera yari guhabwa ibihano byisumbuyeho, umunyamategeko twaganiriye akaba yadutangarije ko abona Kizito Mihigo nawe yanzuye kureka gukomeza kujurira nyuma yo kubona ko ntacyo we atakorewe mu byo amategeko ateganyiriza aborohereje ubutabera.

Imbabazi za burundu Kizito Mihigo yasabaga Perezida ngo arekurwe atahe, zo ntabwo urukiko ruzifiteho ububasha, ariko na nyirubwite Perezida Paul Kagame kuva Kizito yatangira kuburana kugeza, ntabwo amategeko yamwemereraga kuba yazitanga, kuko iteka rya Perezida ritanga imbabazi rireba abahawe ibihano ndetse banabitangiye, ritareba abarimo gukurikiranwa n’ubutabera cyangwa ababihawe bakajurira.

Iteka rya Perezida rimwemerera gutanga imbabazi, ubu rishobora gutangira gukora kuko Kizito Mihigo yamaze kwemera ibyaha yakatiwe n’urukiko, kuko imyanzuro y’urubanza byemezwa ko yabaye itegeko mu gihe nta gahunda yo kujurira ihari, uregwa yamara gukatirwa akaba aribwo ashobora guhabwa imbabazi na Perezida wa Repubulika nk’uko ububasha ahabwa n’amategeko bubimwemerera.

JPEG - 42 kb

N’ubwo abifitiye ububasha ahabwa n’amategeko, Perezida ntiyababarira umuntu utarahabwa igihano ntakuka n’urukiko

Aha ariko byumvikabe neza, icyemezo cya Perezida wa Repubulika cyo gutanga imbabazi ku wamaze guhamwa n’icyaha ndetse wanatangiye gukora ibihano yakatiwe n’urukiko, nta ruhare na ruto urukiko rubigiramo ndetse binaba ari uko urukiko rwamaze gukora akazi karwo n’urubanza rwararangije gucibwa uregwa yarahamwe n’ibyaha akanatangira ibihano, bisobanura neza ko icyemezo cyo kuba Perezida wa Repubulika yababarira Kizito Mihigo ari icyemezo cye bwite yafata akoresheje umutimanama we ndetse n’ububasha ahabwa n’amategeko, iki cyemezo kikaba cyakwemerwa n’amategeko nyuma y’uko Kizito yemeye igihano yahawe akareka ubujurire bwe.

Ikindi Kizito Mihigo yakungukira mu kuba yaremeye gukomeza igihano yahawe, ni uko byatumye ashobora kuzahabwa insubikagifungo cyangwa insimburagifungo nabyo biteganywa n’amategeko kandi ibi ntiyabihabwa mu gihe yaba akirimo kuburana ajurira ku bihano yahawe.

Kizito Mihigo wizihiza w’imyaka 37, ubu biteganyijwe ko azarangiza igihano cye muri 2024, ni ukuvuga igihe azaba afite imyaka isaga 43 y’amavuko. Gusa ibi byaba mu gihe nta nsimburagifungo, insubikagifungo cyangwa imbabazi yaba yahawe. Kuba yaratangiye igihano cye, biranashoboka ko yafungurwa mbere y’uwo mwaka aramutse ahawe kimwe muri ibyo bitatu twavuze haruguru.


INKURU ZA :
Tanga Igitekerezo
Ibitekerezo 4
Liliane Kuya 15-09-2018

Nababarirwe

Judae Kuya 13-09-2018

Uwo Kizito muhoza mu tangazamakuru ninde?
Murashaka gutera imbabaxi ngo arekurwe?
Akaga yari agiye guteza abanyarwanda se ni umukino?

Byishimo Kuya 13-09-2018

Nukuri nababarirwe

kabano Kuya 13-09-2018

Ni aha nyagasani! umuntu wavuze ngo ikiruta ni uko hapfa umuntu umwe agahindukira uwo yashakaga ko apfa akaba ari we asaba imbabazi!!!!

nyirimpuhwe z igisagirane Kagame ngaho nabikore twongere tumwemere!

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...