AMAKURU

UKWEZI
Canal+ christmax

Ubushinjacyaha bwasubiyemo amagambo aremereye yavuzwe na Idamange, we avuga ko bwari uburenganzira bwe

Ubushinjacyaha bwasubiyemo amagambo aremereye yavuzwe na Idamange, we avuga ko bwari uburenganzira bwe
4-03-2021 saa 10:51' | By Martin Niyonkuru | Yasomwe n'abantu 2086 | Ibitekerezo 1

Mu gitondo cyo kuri uyu wa Kane Tariki 04 Werurwe 2021, Urukiko rw’Ibanze rwa Gasabo rwaburanishije ifunga n’ifungurwa by’agateganyo Idamange Iryamugwiza Yvonne ukurikiranyweho ibyaha birimo gukwirakwiza ibihuha muri rubanda, wahakanye ibyaha byose aregwa gusa agasaba imbabazi niba ibyo yavuze hari uwo byakomerekeje gusa ngo yabivuze ari uburenganzira bwe bwo gutanga ibitekerezo.

Muri iri buranisha ryabaye hifashishijwe uburyo bw’Ikoranabuhanga, Idamange ukurikiranyweho ibyaha bitandatu, yaburaniye aho afungiye kuri Station ya RIB mu gihe Inteko y’Urukiko ndetse n’iy’Ubushinjacyaha zari ku kicaro cy’Urukiko rw’Ibanze rwa Gasabo ahari Abanyamakuru benshi ndetse na bamwe mu baturage batari benshi.

Idamange wabanje kubazwa niba aburana yemera ibyaha akekwaho, yavuze ko atabyemera ubundi Urukiko ruha umwanya Ubushinjacyaha ngo busobanure impamvu bwifuza ko uregwa akurikiranwa afunzwe by’agateganyo.

Ubushinjacyaha bwasobanuye impamvu zikomeye busabira Idamange gukurikiranwa afunzwe by’agateganyo, bwasubiyemo amagambo aremereye yagiye avugwa n’uyu mugore ukekwaho gukora biriya byaha yifashishihe urubuga rwa Youtube.

Buvuga ko hari Video yatambukije asaba Abanyarwanda kujya kwigaragambya ku biro by’Umukuru w’Igihugu tariki ya 16 Gashyantare ngo bamagana ibyemezo bafatirwa na Leta we yavugaga ko bidahwitse.

Icyo gihe ngo yagize ati “Igihe kirageze ngo Abanyarwanda bose n’abari mu mahanga bahuguruke bigobotore ndetse n’abatazifatanya natwe bazahura n’ishyano.”

Ubushinjacyaha buvuga ko ariya magambo yo guteza imvururu muri rubanda, yo guhamagarira abantu kujya kwigaragambya, kabone nubwo izo mvururu zitabaye ariko ariya magambo yakoresheje ubwayo ashobora guteza izo mvururu.

Ku cyaha cyo gutangaza amakuru y’ibihuha hakoreshejwe ikoranabuhanga, Ubushinjacyaha buvuga ko ku wa 15 yatambukije Video avuga ko umukuru w’Igihugu “yapfuye Cyera ko Abanyarwanda bayobowe n’umuzimu.”

Umushinjacyaha yagize ati “Uretse n’ibihuha, ni imvugo nyandagazi, ikojeje isoni…”

Umushinjacyaha wavuze ko iyi mvugo ubwayo inateye igahinda itari ikwiye kuvugwa n’umuntu muzima muri iki gihe, yaguze ati “Ni imvugo y’ibihuha ishobora gutera ubwoba abaturage, ni imvugo iteye isoni, iharabika Perezida.”

Ubushinjacyaha kandi bwavuze ko Idamange yavuze ko Leta yirirwa yica abantu, ariko "ntawamubaza ese aba bantu bose utondekanya wabona gihamya ko bishwe na Leta. Ikintu cyose uvuga nta gihamya gifatwa nk’ibihuha.”

Ngo yanavuze ko Leta y’u Rwanda “isigaye ari baringa, na byo ni ibihuha, ntawamutumye, ndetse akongeraho ko Leta iyobowe n’amabandi.”

Ku cyaha cyo gutesha agaciro ibimenyetso byerekeye Jenoside yakorewe Abatutsi, Ubushinjacyaha buvuga ko Idamange yavuze ko imibiri y’abishwe muri Jenoside yagizwe ibicuruza ngo “Iyitondeka nk’isukari icuruzwa." Yavugaga ko Leta icuruza imibiri y’abishwe muri Jenoside.

Umushinjacyaha ati “Aya magambo rero yumvikanamo ko yatesheje agaciro imibiri iri mu nzibutso ndetse na zo ubwazo azitesha agaciro.”

Ku cyaha cyo gutambamira imirimo yategetswe, Ubushinjacyaha buvuga ko ubwo inzego zirimo Polisi ndetse n’Urwego rw’Ubugenzacyaha n’inzego z’Ibanze zajyaga kumufata, yazirwanyije.

Ubushinjacyaha buvuga ko ibi byaha bikekwa kuri Idamange bikomeye kandi ibyagezweho mu iperereza bigize impamvu zo kumukekaho ko yabikoze, bityo ko bwifuza ko afungwa by’agateganyo iminsi 30.

Ndasaba imbabazi

Idamange Iryamugwiza wahawe umwanya ngo avuge ku byo Ubushinjacyaha bwari bumaze kuvuga, yavuze ko biriya biganiro yatambutsaga yabitewe n’agahinda yatewe n’ibihe bya Guma mu Rugo.

Uyu mugore uvuga ko asanzwe ari umukristu ndetse mu biganiro yanyujije kuri Youtube yabaga acigatiye Bibiliya, yavuze ko ngo ubwo Guma mu rugo yazaga, yibajije impamvu buri gihe hafungwa insengero mbere.

Idamange kandi yisobanuye avuga ko adashobora gutesha agaciro Jenoside yakorewe Abatutsi ndetse ko n’uwabikora na we ari mu baza imbere mu kumurwanya.

Yagendaga yisobanura ku cyaha ku kindi, nko ku cyo gutambamira imirimo ya Leta, yavuze ko atigeza atesha agaciro ingamba zo kurwanya icyorezo cya COVID ahubwo ko yariho avugira Abanyarwanda bagizweho ingaruka na zo kandi ngo anabashishikariza kubuhiriza ziriya ngamba.

Yanahakanye icyaha cyo gutanga Sheki Itazigamiye yahaye uwitwa Nsabimana Emmanuel y’ibihumbi 400 Frw, yavuze ko yayihaye uriya muntu babiziranyeho ko kuri kunti ye hatariho amafaranga ariko ko yari iyo kwizera ko azishyirwa kandi ko yaje kumwishyura.

Yanahakanye gukomeretsa umupolisi ahubwo ko ngo ashobora kuba yarakomerekejwe n’urugi cyangwa umwe mu bo bari kumwe.

Ajya gusoza ijambo rye, Idamange yasabye imbabazi ku baba barafashe imvugo ze nk’iziremereye.

Idamange wabajijwe niba uri mu mashusho avugwa niba ari we koko, akabyemera ko ari we, yagize ati “Ndabisabira imbabazi nk’umunyarwanda utifuza gukomeretsa abandi.”

Abunganira uregwa, bavuga ko nta mpamvu zikomeye zituma umukiliya we akikwaho ibyaha kuko nta byaha byabayeho ndetse ko Ubushinjacyaha butagaragaza abantu bagizweho ingaruka na biriya bikorwa bumukurikinyeho.

Buvuga kandi ko ibyatangajwe na Idamange akurikiranyweho nk’ibyaha, ari ibitekerezo bye bwite kandi amategeko y’u Rwanda arimo n’Itegeko Nshinga aha umuturage kugaragaza ibitekerezo bye bityo ko Ubushinjacyaha bugaragaza ko mu Rwanda hari amategeko abuza umuntu kuvuga.

Umunyamategeko kandi yavuze ko mu magambo yavuzwe n’umukiliya we akwiye kugaragazwa uko yakabaye aho gukuramo ijambo rimwe.

Ku cyaha cyo gutanga sheik itazigamiwe, umunyamategeko yavuze ko iriya sheik ari iyo muri 2018 bityo ko icyaha cyashaje, akavuga ko atumva ukuntu Ubushinjacyaha bukizanye muri 2021 kuko uregwa agaragaweho ibindi bibazo.

Abunganira uregwa basabye ko umukiliya wabo arekurwa agakurikiranwa ari hanze kuko afite aho atuye hazwi kandi ko adashobora gutoroka dore ko isi iri mu bihe bidasanzwe by’icyorezo cya COVID-19.

Ubushinjacyaha bwongeye guhabwa umwanya ngo buvuge ku byatangajwe n’uruhande rw’uregwa, bwavuze ko kugira ngo ikintu kitwe icyaha, bidasaba gusa ko hari abantu bagizweho ingaruka na byo ahubwo ko ari ibikorwa ubwabyo biba bigize icyaha nk’uko biteganywa n’amategeko.

Bwavuze kandi ko bwemera ko hariho ubwisanzure bwo gutanga ibitekerezo ariko ko bugira aho bugarukira ku buryo ubwo burenganzira butakwitwaza ngo umuntu abukoreshe mu gukora ibyaha cyangwa gushishikariza abandi kubikora.

Ku kuba Idamange n’abamwunganira basabye ko arekurwa, Ubushinjacyaha bwavuze ko kuba afunzwe ari bwo buryo bwonyine bwaba bwizewe ko ibyaha akekwaho atazakomeza kubikora ndetse ko ari bwo buryo bwonyine bwizewe ko yakomeza kuba mu maboko y’ubutabera.

Idamange na we wongeye guhabwa umwanya, yavuze ko ibya ashinjwa n’ubushinjacyaha ari ibihimbano ndetse ko nta n’icyo ari cyo ku buryo yahamagarira abantu ngo bamuyoboke kuko atagira ishyaka kandi akaba atari n’umuyobozi.

Yavuze ko nta muntu wishwe n’amagambo yavuze, kandi ko nta n’icyaha cyabayeho, ndetse ko ibyo yavuze byari “uburenganzira” bwe.

Yavuze ko ibyo yavugaga yabiterwaga no gukunda igihugu, agasaba urukiko kudaha agaciro ibyo avuga ko bamubeshyera ahubwo rukamurekura agasubira mu rugo akaba ari kumwe n’abana be.

Urukiko rwumvise ibisobanuro by’imande zombi, rukaba rwahise rusoza uru rubanza ku ifunga n’ifungurwa by’agateganyo, rukazasoma icyemezo cyarwo ku wa Kabiri w’icyumweru gitaha tariki 09 Werurwe 2021.

UKWEZI.RW


INKURU ZA :
Tanga Igitekerezo
Ibitekerezo 1
Jeann pierr nshimiyimana Kuya 7-03-2021

 !

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA