konka coffee
KONKA

AMAKURU

UKWEZI
ubumwe

‘Maj. Cobra’ yabwiye Perezida Kagame icyo yabajije abakomeye muri FDLR cyabananira akitahira

‘Maj. Cobra’ yabwiye Perezida Kagame icyo yabajije abakomeye  muri FDLR cyabananira akitahira
9-05-2019 saa 22:40' | By Nsanzimana Ernest | Yasomwe n'abantu 5295 | Ibitekerezo

Bimenyimana Bonavanture wari umusirikare mu ngabo zatsinzwe (EX-FAR), yagiye muri FDLR abona ubuzima abayemo ntaho buzamugeza asubira mu Rwanda. Avuga ko ubu abayeho neza ndetse yanagaragaje umusanzu ufatika ari gutanga mu iterambere ry’ u Rwanda. Yabwiye Perezida Kagame ikibazo yabajije bagenzi be cyabananira agahita afata icyemezo cyo gutaha.

Ni mu buhamya yatanze kuri uyu wa Kane ubwo Perezida Kagame yari yasuye akarere ka Musanze. Mu buhamya bwe yavuze amazina y’ abajenerali bamuyoboraga akiri mu mashyamba yo muri Repubulika ya Demukarasi ya Kongo abasaba gutaha.

Uyu mugabo uvuga ko akiba muri FDLR bamuhimbaga Major Cobra, yatahutse afite ipeti rya Majoro. Ngo mu 1994 ingabo zo ku gihe cyo’ubutegetsi bwa Perezida Juvenal Habyarimana zimaze gutsindwa, ari mu zahungiye muri Kongo zitangira gutera u Rwanda zicengeye mu 1997.

Ahamya ko abari mu mashyamba ya Kongo bumva Radiyo Rwanda. Bimenyimana ati “Nk’ uko nakomeje kubivuga abasigaye mu mashyamba banyumve”.

Perezida Kagame ati “Bakumve kuko hari abagishaka gutera ibibazo, bariya bazahura n’ ibintu bibi cyane.”

Uyu mugabo kuri ubu utuye mu karere ka Musanze, yavuze ko ibikorwa bibi bakoze mu ntambara y’ abacengezi mu misozi y’ u Rwanda ntacyo byabagejejeho.

Ati “Ibyo twakoze byose ni politiki mbi y’abanyenda nini. Mu 1997 ibyo twakoze byaratunaniye ingabo za RDF ziratwirukankana dusubira mu mashyamba. 1999 nibwo twavuye muri iki gihugu dusubira muri Kongo”.

Ubuzima bwo mu mashyamba…

Avuga ko muri Kongo abana babo batigaga, inyeshyamba zitandukanye zikabarasaho amanywa n’ ijoro, bakabura imiti yo kwivuza. Ngo kugeza n’ uyu munsi abariyo nibwo buzima babayemo.

Ati “Twari dutunzwe no kwiba iby’ Abanyekongo, aho tutabonye ibyo kurya tugatwika amazu yabo. Abo nasize inyuma ninako ubu bameze”

Uko yafashe icyemezo cyo gutaha…

Muri 2009, kugirango afate icyemezo cyo gutaha , ngo yahuye n’ umugabo witwa Rugema na Colonel Ndengeyinka Baltazar, bagarutse kubabwira ngo bongere bisuganye batere u Rwanda.

Perezida Kagame ati “Ndengeyinka , ubu yagiye mu ishyamba ry’ i Burayi niho acyakiriza”.

Avuga ko Rugema wari Caporal na Ndengeyinka wari Colonel bari bagiye muri FDLR bavuye muri RDF.

Bimenyimana avuga ko yababajije ati “Ko mwari mwafashe igihugu mukaba mugarutse mu mashyamba murumva muzarwana imyaka ingahe ko mushaje, tugafata igihugu tukagisubiramo?. Iki kibazo ngo yakibajije umwe arongera arahindukira akibaza undi.

Kuri iki kibazo ngo babuze icyo bamusubiza. Agendeye no kubutumwa yahabwaga na Radiyo Rwanda n’ abantu yajyaga avugana nabo bari mu Rwanda bituma afata icyemezo cyo gutaha.

Ageze mu Rwanda…

Bimenyimana avuga ko ageze mu Rwanda yagiye mu kigo cya Mutobo cyakira kikanasubiza mu buzima busanzwe abari abasirikare. Ngo nyuma y’ umwaka umwe yahise ajya muri Darfur ajyanye n’ ingabo za RDF. Bariyo ngo umwe mu bayobozi ba FDLR yaramuhamagaye amubaza niba ari muri M23, amusubiza ko ari mu butumwa bw’ akazi I Darfur yongeraho ko ingabo za RDF zidafite umwanya wo kujya kurwana muri Kongo muri M23”.

Uko yatangiye kugira uruhare mu guteza imbere Abanyarwanda

Bimenyimana avuye I Darfur yatangiye kwiteza imbere. Reserve Force yamuhaye akazi , ubu ni site Manager wa Reserve Force. Yakoze igishanga avuga ko cyari cyarananiranye cya Mugogo, ati “Ubu abaturage bari guhinga nyakubahwa Perezida wa Repubulika”.

Akomeza avuga ko yubatse imihanda, umudugudu n’ Ikigo mbonezamikurire y’ abana bato, magingo aya ari kubaka amakusanyirizo y’ ibirayi.

Yagize ati “Nubatse umuhanda wa Ndabanyurahe – Kanyereza. Ubu imodoka ziragenda Nyakubahwa Perezida wa Repubulika. Nubatse umudugudu wa Mutuzo, abaturage baratuye nyakubahwa Perezida wa Repubulika. Nubatse ECD abarana bariga nyakubahwa Perezida wa Repubulika. Ubu muri aka kanya ndikubaka amakusanyirizo y’ ibirayi”.

Inama ku bari muri Kongo no ku rubyiruko…

Bimenyimana yashishikarije gutaha abagenerali bari muri FDLR barimo General Iyamuremye Gaston bahimba Rumuli, wo muri Nyakinama, avuga ko babanye barya babyibe, Rumuli akaba aribyo agikora. Abandi ni Gen. Busogo na Gen. Omega.

Bimenyimana avuga ko aba bagabo ahora abahamagara bakavugana ariko ngo banze gutaha kubera ibyo basize bakoze mu Rwanda.

Bimenyimana wemeza ko abayeho neza mu Rwanda akaba atekanye nta kibazo afite agira urubyiruko inama yo kutishuka ngo bage muri FDLR kuko yemeza ko ‘abantu bo muri FDLR babayeho ubuzima bubi budafite icyerekezo’.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...