AMAKURU

UKWEZI
RPF

Minisitiri Mushikiwabo yagaragaje imigabo n’imigambi nk’umukandida wa OIF

Minisitiri Mushikiwabo yagaragaje imigabo n’imigambi nk’umukandida wa OIF
2-08-2018 saa 11:37' | By Vincent Nsengiyumva | Yasomwe n'abantu 1956 | Ibitekerezo

Minisitiri w’Ububanyi n’Amahanga, Ubutwererane n’Ibikorwa by’Umuryango wa Afurika y’Uburasirazuba, Louise Mushikiwabo, yagaragaje imwe mu migabo n’imigambi y’ibikorwa azashyiramo ingufu naramuka atorewe kuba Umunyamabanga Mukuru w’Umuryango w’Ibihugu bikoresha Igifaransa (OIF).

Abinyujije ku rubuga rwe rwa ‘lmfrancophonie’, azajya akoresha mu bikorwa bye byo kwiyamamaza, Minisitiri Louise Mushikiwabo yagaragaje ko mu byo azashiramo imbaraga zidasanzwe harimo guharanira ko indangagaciro z’umuryango wa OIF, kwita ku rubyiruko n’ibindi.

Minisitiri Louise Mushikiwabo umaze imyaka isaga icyeko kuri uyu mwanya w’ububanyi n’amahanga, avuga ko nagirirwa icyizere cyo gutorerwa umwanya w’Umunyamabanga Mukuru w’Umuryango w’Ibihugu bikoresha Igifaransa (OIF), azita cyane ku gushaka ibisubizo by’ibibazo bya za guverinoma ziri muri uyu muryango.

Yagize ati “ Mu byo nzibandaho cyane harimo kuzamura indangagaciro z’umuryango wa OIF no gushaka ibisubizo by’ibibazo bya za guverinoma ziri muri uyu muryango.Umushinga wanjye muri OIF ushingiye ku nkingi enye zirimo kuzamura Ururimi rw’Igifaransa, kongerera Umuryango icyizere ugirirwa, guhanga imirimo mu rubyiruko no gusangizanya ubunararibonye.’’

Louise Mushikiwabo ahanganye kuri uyu mwanya n’Umunya-Canada Michaëlle Jean, wari usanzwe ari Umunyamabanga Mukuru wa OIF guhera mu mwaka wa 2014.

Abayobozi b’ibihugu bitandukanye byo ku mugabane wa Afurika bagiye bagaragariza Minisitiri Mushikiwabo ko bamuri inyuma, ndetse nawe ubwe akaba ari gukorera ingendo zitandukanye mu bihugu binyuranye mu rwego rwo kwiyamamaza.

Mu bayobozi bamaze kumugaragariza ko bammushyigikiye nta shiti, harimo Perezida wa Repubulika Iharanira Demokarasi ya Congo Joseph Kabila , Perezida Ali Bongo Ondimba wa Gabon ndetse na Perezida w’u Bufaransa, Emmanuel Macron akaba yaravuze ko igihugu cye kiri inyuma ya Mushikiwabo.

Radio Mpuzamahanga y’Abafaransa (RFI) iherutse gutangaza ko umuvugizi wa Michaelle Jean, yagaragaje ubwoba bafitiye Louise Mushikiwabo. Uyu ni Bertin Leblanc, wemeye ko uwo avugira atabona Mushikiwabo nk’ikipe yoroshye bazahatana. Mu magambo ye icyo gihe yagize ati: "Bigaragara ko igitego cya mbere cyatsinzwe na Louise Mushikiwabo hamwe n’abamuri inyuma ariko natwe ntabwo turakurayo amaso burundu"

Michaelle Jean, nawe aherutse gutangaza amagambo benshi babonye nk’igihunga cy’ubwoba yaba yaratewe no guhatana na Louise Mushikiwabo. Ubwo yaganiraga na Radio Canada, yavuze ko azi neza Louise Mushikiwabo, kuko ngo yabaye ambasaderi w’u Rwanda mu gihugu cya Canada, ndetse ko yabaye igihe kirekire muri Ottawa nyamara atarigeze aba umuyobozi kuri uwo mwanya ataranahabaye nk’uko yabivuze.

Amatora y’Umunyamabanga Nshingwabikorwa wa OIF ategerejwe mu Nteko Rusange yawo ya 17 izabera muri Arménie ku wa 11 na 12 Ukwakira 2018.

JPEG - 52.9 kb

Perezida wa Reppubulika Iharanira Demokarasi ya Congo mu baherutse kubwira Mushikiwabo ko bamushyigikiye


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...