AMAKURU

UKWEZI
Canal+ christmax

Rusesabagina ati “Sindi Umunyarwanda”, Sankara ati “Wari kuyobora u Rwanda ute utari we ?”

Rusesabagina ati “Sindi Umunyarwanda”, Sankara ati “Wari kuyobora u Rwanda ute utari we ?”
17-02-2021 saa 10:48' | By Martin Niyonkuru | Yasomwe n'abantu 8204 | Ibitekerezo 4

Paul Rusesabagina uregwa ibyaha bifitanye isano n’ibitero byagabwe mu Majyepfo y’u Rwanda bikanahitana bamwe mu Banyarwanda, uyu munsi ubwo yatangiraga kuburana mu mizi, yongeye kuvuga ko atari Umunyarwanda, abivuga mu kinyarwanda gitomoye.

Iburanisha rya mbere mu rubanza rwo mu mizi, Urukiko rwatangiye rusoma imyirondoro y’abaregwa uko ari 21 barimo Paul Rusesabagina ufatwa nk’uyoboye iri tsinda kuko ari we wari uyoboye impuzamashyaka MRCD ari na ryo ryari rikuriye umutwe wa FLN wagabye biriya bitero.

Mu gusoma umwirondoro, Urukiko rwavuze ko Rusesabagina ari Umunyarwanda wavukiye mu Rwanda ndetse runavuga ababyeyi be n’agace akomokamo. Rusesabagina Paul yabajijwe niba uwo mwirondoro ari uwe, yongera kuwuhakana avuga ko atari Umunyarwanda.

Mu magambo y’Ikinyarwanda, Paul Rusesabagina yagize ati “Ndabisubiramo ku nshuro ya gatanu. Njyewe si ndi Umunyarwanda. Ndi Umubiligi.’’

Uyu mugabo ukekwaho gushakira inkunga abahungabanya Umutekano w’u Rwanda, yabajijwe niba ibyaha basomye ko akurikiranyweho ari byo, yagize ati “Ibyaha byose ni byo.’’

KURIKIRA IBURANISHA RYOSE :

Abaregwa bose uko ari 21 basomewe imyirondoro yabo ndetse n’ibyaha bakekwaho, ndetse n’abanyamategeko bahagarariye abaregera indishyi bakaba basomye imyirondoro yabo.

Mu baregera indishyi, harimo abagizweho ingaruka na biriya bitero byagabwe mu Majyepfo ndetse n’ababuze ababo babipfiriyemo.

Rusesabagina ngo yarashimuswe

Umucamanza yagaragaje uko imigendekere y’uru rubanza izagenda, ahita asaba ababuranyi niba hari inzitiZI zibanziriza urubanza zihari.

Paul Rusesabagina yahise yaka ijambo, agira ati "Njyewe nk’umuntu w’Umubiligi nkaba naraje mu Rwanda nkaza nk’umuntu ushimuswe nkaba narafashwe bugwate, nkaba mbona uru rukiko rudafite ububasha bwo kumburanisha."

Yahise aha ijambo Me Gatera Gashabana ngo asobanure ibirambuye kuri izi nzitizi ze.

Me Gatera Gashabana yavuze ko uru rugereko rw’Urukiko Rukuru ruburanisha ibyaha mpuzamahanga n’ibyambukiranya imipaka rudafite ububasha bwo kuburanisha uru rubanza.

Yavuze ko Ingingo ya 84 y’Itegeko ryerekeye imiburanishirize y’imanza mbonezamubano, iz’ubucuruzi n’ubutegetsi iteganya ko umuburanyi agomba kugaragaza mu myanzuro inzitizi zisobanura uko ikirego cye kitakirwa kubera iburabubasha ry’urukiko.

REBA VIDEO ABIVUGA HANO :

Yagize ati "Inyandiko itanga ikirego ku wa 10 Mutarama 2021 hamaze gusuzumwa ko Paul Rusesabagina afite ubwenegihugu bw’u Bubiligi, Ubushinjacyaha bw’u Rwanda bwoherereje Ubushinjacyaha bw’u Bubili ikirego kugira ngo buburanishe uyu mugabo. Iki cyifuzo cy’Umushinjacyaha turagira ngo tubagaragarize ko cyatangiye gushyirwa mu bikorwa, muzasanga ku ntangiro ya paje ya 35 hari ibyo Ubushinjacyaha bwakoze."

Yakomeje agira ati “Twemeranya n’Ubushinjacyaha ko Rusesabagina afite ubwenegihugu bw’u Bubiligi tukaba dusaba ko yaburanishwa n’Inkiko z’u Bubiligi... Impande zombi zari zaratangiye gukorana mu buryo bw’ubutabera, Rusesabagina yaje gufatirwa mu Rwanda mu buryo budasobanutse... Kuko Ubushinjacyaha bwari bubizi ko atazoherezwa n’u Bubiligi, kuba rero Rusesabagina yarafashwe akagezwa imbere yanyu, turasanga bitarubahirije ayo mahame..."

Yakomeje agira ati : "Dushingiye ku kuba Ubushinjacyaha bwariyemereye ko Rusesabagina afite ubwenegihugu bw’u Bubiligi, turasanga yakoherezwa kuburanira mu Bubiligi mu rukiko rwitwa Tribunal de Premiere Instance de Bruxelles."

Yanavuze ko hari umugabo w’Umubiligi witwa Guy Tenice wari wafashwe n’inkiko zo mu Rwanda ndetse yaranaciriwe urubanza n’Inkiko Gacaca, ariko nyuma akaza koherezwa mu Bubiligi kuburanishirizwayo.

Umucamanza yamubajije icyo ashingiraho avuga ko umuntu ufite ubwenegihugu bw’Ubunyarwanda bw’inkomoko adashobora kuburanishwa mu Rwanda ngo ni uko afite ubwenegihugu bw’ikindi gihugu.

Me Gatera Gashabana ati “Ubundi ni ibintu bidakwiye kugibwaho impaka, kuko Ubushinjacyaha bwiyemereye ko Rusesabagina atari Umunyarwanda.”

Avuga kandi ko Igihugu kidashobora kohereza umwenegihugu wacyo kuburanira mu kindi gihugu. Yavuze kandi ko impande zombi zashyizeho komisiyo ihuriweho iri gukurikirana uru rubanza ndetse ko na n’ubu igikomeje imirimo yayo.

Ati "Ubushinjacyaha ntibunavuga uko yafashwe, ese ni uburyo bwemewe n’amategeko, aha ni indi shapitre kuko na yo izasuzumwa mu buryo buhagije.
Akavuga ko hashyizeho n’impapuro zita muri yombi ariko kuko u Bubiligi butashoboraga kohereza umwenegihugu wabwo. Kuba yaje kubaregera imbere yanyu arabikora arenze ku byo yari yemeranyijweho n’ubushinjacyaha bw’u Bubiligi."

Umucamanza yabajije Me Gashabana, niba Umubiligi ufatiwe mu Rwanda yarakoze ibyaha mu Rwanda adashobora kuburanishirizwa mu Rwanda. Amusubiza agira ati “Byaterwa n’uburyo yahageze.”

Rusesabagina yahise yaka ijambo, avuga ko atoherejwe n’u Bubiligi yita igihugu cye.

Yagize ati “Ubushinjacyaha bwa hano bwasabye ababiligi kunyohereza barabyanga, basaba kunkurikirana hariya mu Bubiligi kandi bari baratangiye, mu gihe bari batangiye kubitegura, ni bwo njye nashimuswe kandi na byo ni ikindi cyaha.”

Me Gashabana ati “Umuntu w’Umubiligi yaraje mu Rwanda mu buryo bwemewe n’amategeko ashobora gufatirwa mu Rwanda akanaburanishwa, ese ni ko byagenze kuri Rusesabagina ?”

Yakomeje agira ati “Iyo Ubushinjacyaha buvuga ngo bwafatiye Rusesabagina i Kigali, muzarebe nta nyandiko y’ifatwa”, Umucamanza ahita amubwira ko ibyo by’ifatwa babiburanye bihagije.

Me Gashabana avuga ko ibyashingiweho mu gufata Rusesabagina ari imfabusa kuko Ubushinjacyaha butagaragaza inyandiko imufata n’imufunga. Umucamanza yahise amubaza niba bari kujurira icyemezo cyafashwe kuri iyi ngingo avuga ko yashakaga gusobanura ingingo zabo.

Me Gatera Gashabana avuga ko ifatwa n’ifungwa bishingiye ku bintu by’uburiganya ku buryo n’Urukiko rudashobora kubishingiraho ruburanisha uwo muntu.

Nagaragaze ko yatakaje Ubunyarwanda

Ubushinjacyaha buvuga ko bwamureze nk’Umunyarwanda ufite ubwenegihugu bwa kabiri bw’u Bubiligi ndetse mu mwirondoro we bavuze aho avuka ababyeyi be, byose ngo ni ibyo mu Rwanda.

Umushinjacyaha ati “Kuba muri 2000 yaragize ubwenegihugu bw’u Bubiligi bitamukuraho ubwenegihugu bw’u Rwanda yagombye kugaragaza uko yatakaje ubwenegigu kavukire."

Umushinjacyaha avuga ko hari inzira zikoreshwa mu gutakaza ubwenegihugu kavukire ariko ko Rusesabagina atagaragaza ikimenyetso ko izi nzira yaba yarazubahirije.

Ubushinjacyaha buvuga ko izi nzitizi zitangwa n’uruhande rw’uregwa kugira ngo rutinze urubanza rwo mu mizi.

Umushinjacyaha kandi yavuze ko yaba Umunyarwanda cyangwa umunyamahanga ufatiwe mu Rwanda yarakoreye ibyaha muri iki gihugu agomba kuburanishwa n’inkiko zo mu Rwanda.

Ubushinjacyaha bwemera ko bwakoranye n’ubw’u Bubiligi bukanabuha ububasha bwo kumukurikirana muri 2010, kuva icyo gihe ubushinjacyaha bw’u Bubiligi bwakomeje kumukurikirana nka Perezida wa PDR-Ihumure.

Muri 2018 Ubushinjacyaha bw’u Rwanda bwafunguye indi dosiye ya MRCD-FLN irimo abantu batandukanye barimo Rusesabagina uri ku isonga na Nsabimana Callixte.

Iyi dosiye ntiyigeze yoherezwa mu Bubiligi, na none Ubushinjacyaha busaba ubw’u Bubiligi ko Rusesabagina abazwa ariko ko iyo dosiye itigeze ihabwa u Bubiligi.

Tariki 22 Nzeri 2020, Umushinjacyaha Mukuru yandikiye Ubushinjacyaha bw’u Bubiligi ko Rusesabagina yafatiwe mu Rwanda ari gukurikiranwa n’Inkiko zo mu Rwanda asaba ko Ubushinjacyaha bwoherereza ubw’u Rwanda dosiye yose bwohererejwe ndetse n’ibimenyetso byose bwabuhaye n’ibyo bwaba bwariboneye.

Ubushinjacyaha kandi buvuga ko Rusesabagina yarezwe ibyaha byo muri dosiye ya 2018 ndetse ibyo muri dosiye ya 2010 butigeze buyiregera uru rukiko rwatangiye kumuburanisha uyu munsi.

Ubushinjacyaha bwagarutse ku ngingo ya 42 y’itegeko riteganya ububasha bw’inkiko, ivuga ku bubasha bw’uru rugereko rw’Urukiko Rukuru ruburanisha ibyaha mpuzamahanga n’ibyambukiranya imipaka.

Iyi ngingo ivuga ko uru rugereko rufite ububasha bwo kuburanisha umuntu wese yaba ari umunyarwanda, umunyamahanga ukekwaho ibyaha byakorewe ku ifasi yo mu Rwanda birimo ibyaha by’iterabwoba.

Buvuga ko butumva impamvu uruhande rw’uregwa rwatanze biriya bisobanuro ariko bukirengagiza iri tegeko ku buryo ibyavuzwe byoze babona nta shingiro bifite.

Buvuga kandi ko ububasha bw’inkiko butagenwa n’ibijyanye no kohereza ukekwaho ibyaha ahubwo ko igihe cyose ububasha bw’urukiko bugomba kubahirizwa harebwe ku miterere y’ikirego.

Ubushinjacyaha kandi bwavuze ko Paul Rusesabagina n’umwunganizi we bitangiye ikirego mu Rukiko rw’Umuryango wa Africa y’Iburasirazuba kandi ko bagitanze nk’Umunyarwanda wo muri kimwe mu bihugu bigize uyu muryango ku buryo batari bakwiye guhakana ko ari Umunyarwanda.

Umushinjacyaha ati “Turibaza tuti ‘ese mu rukiko rwa East Africa aba Umunyarwanda hanyuma mu nkiko zo mu Rwanda akaba Umubiligi ?’.”

Kuki nagirwa Umunyarwanda ku gitugu ?

Paul Rusesabagina yongeye kwaka ijambo avuga ko Ubushinjacyaha bushaka kumugira Umunyarwanda ku gitugu.

Rusesabagina avuga ko yahunze mu 1996, ati “Ibintu bya mbere nabanje gutanga ni irangamuntu yanjye na Pasiporo.”

Akavuga ko kuva icyo gihe yahise abura ubwenegihugu ku buryo u Bubiligi bwamufashe nk’umuturage udafite ubwenegihugu ahubwo nk’umuntu w’Umuryango w’Abibumbye “nk’umuntu w’imfubyi utagira ababyeyi.”

U Bubiligi bwamuhaye Pasiporo y’Umuryango w’Abibumbye yamwemereraga kujya ahantu hose uretse mu Rwanda.

Nyuma u Bubiligi bwaje kumuha ubwenegihugu muri 2000. Ati “maze kubona ubwenegihugu bw’u Bubiligi ntabwo ubw’u Rwanda bwagarutse.”

Yavuze ko muri 2003 yagiye kwaka uburenganzira bwo kuza mu Rwanda bakamwemerera kuko icyo gihe yari afite pasiporo y’u Bubiligi aza no mu Rwanda, ati mwanyakiriye nk’Umubiligi ntabwo mwanyakiriye nk’Umunyarwanda.

Avuga ndetse ko nyuma yaje izindi nshuro ebyiri kandi ko zose yazaga nk’Umubiligi, ubu akaba ari mu Rwanda nk’umuntu washimuswe ku buryo ahari mu buryo butemewe ati “Cyeretse ari cyo mumpaniye.”

Sankara ati “Wari kuba Perezida w’u Rwanda ute utari Umunyarwanda ?”

Callixte Nsabimana wari wariyise Majoro Sankara yavuze ko amaze imyaka ibiri imbere y’urukiko kandi we yifuza ko urubanza rwihuta rukava mu nzira akamenya aho ahagaze.

Sankara avuga ko hari ibyo yumvise Paul Rusesabagina we akagira isoni kuko ari we wari ukuriye uriya mutwe we (MRCD-FLN) we akamwungiriza nka Visi Perezida, kandi yifuzaga kuba Perezida w’u Rwanda.

Avuga ko bagabye biriya bitero bagamije guhirika ubutegetsi buriho mu Rwanda kandi ko Rusesabagina nk’uwari ubayoboye yavugaga ko azahita aba Umukuru w’Igihugu.

Yagize ati “Njye nkibaza nti ese yari kuba Perezida ate atari Umunyarwanda ese ni ya politiki ya mpatsibihugu cyangwa ya Neocolonialisme ?”

Nyuma y’impaka z’impande zombi kuri izi ntitizi zazamuwe na Paul Rusesabagina, Urukiko rwahise rusubika urubanza, rukazasoma imyanzuro kuri izi nzitizi tariki 26 Gashyantare 2021.

REBA VIDEO ABIVUGA HANO :


INKURU ZA :
Tanga Igitekerezo
Ibitekerezo 4
GATABAZI FRANCE OLIVIER Kuya 17-02-2021

Ku giti cyanjye nta buhanga mfite mu mategeko nta nubumenyi nyafitemo ariko nkoresheje ibushishozi harimo ibintu bitatu nasobanuza 1) RUSESABAGINA ni Umunyarwanda w’umubirigi (afite ubwo bwene gihugu bwose) ? Niba Ari uko ubicamanza bw’u Rwanda n’ubwubibirigi bumufiyeho ubirenganzira bungana 2) niba Ari umubirigi gusa yaba yaranyuze mu mategeko asaba kireka ibinyarwanda ? niba atarabikoze yabiranishwa ! 3) ariko nkuko avuga ko ibyo aregwa aribyo nkiko byanditse mu nyandiko yanyu abo yabikoreye bamugashe bamuburanisha ingero:CARLOS (CHACAL) ntiyaburaniye mi bufaransa Kandi Atari umifaransa ?! ariko kuko yategwaga iterabwoba baramuburanishije urindi rugero iyo Bin laden abanyamerika bamufata matekwa ntibati kumuburanisha nkuko abari gwantabnamo byagenze ? Uko njue mbyunva uko yafashwe ,so ngombwa cyane (ninjye uko mbibona)ahubwo ibyo aregwa nibyo ? Kuko nibyo bihangayikishije abantu ninabyo yagombye kwireguraho !! Nyuma yatsinda akarega abamufashe !!! Murakoze

GATABAZI FRANCE OLIVIER Kuya 17-02-2021

Ku giti cyanjye nta buhanga mfite mu mategeko nta nubumenyi nyafitemo ariko nkoresheje ibushishozi harimo ibintu bitatu nasobanuza 1) RUSESABAGINA ni Umunyarwanda w’umubirigi (afite ubwo bwene gihugu bwose) ? Niba Ari uko ubicamanza bw’u Rwanda n’ubwubibirigi bumufiyeho ubirenganzira bungana 2) niba Ari umubirigi gusa yaba yaranyuze mu mategeko asaba kireka ibinyarwanda ? niba atarabikoze yabiranishwa ! 3) ariko nkuko avuga ko ibyo aregwa aribyo nkiko byanditse mu nyandiko yanyu abo yabikoreye bamugashe bamuburanisha ingero:CARLOS (CHACAL) ntiyaburaniye mi bufaransa Kandi Atari umifaransa ?! ariko kuko yategwaga iterabwoba baramuburanishije urindi rugero iyo Bin laden abanyamerika bamufata matekwa ntibati kumuburanisha nkuko abari gwantabnamo byagenze ? Uko njue mbyunva uko yafashwe ,so ngombwa cyane (ninjye uko mbibona)ahubwo ibyo aregwa nibyo ? Kuko nibyo bihangayikishije abantu ninabyo yagombye kwireguraho !! Nyuma yatsinda akarega abamufashe !!! Murakoze

GATABAZI FRANCE OLIVIER Kuya 17-02-2021

Ku giti cyanjye nta buhanga mfite mu mategeko nta nubumenyi nyafitemo ariko nkoresheje ibushishozi harimo ibintu bitatu nasobanuza 1) RUSESABAGINA ni Umunyarwanda w’umubirigi (afite ubwo bwene gihugu bwose) ? Niba Ari uko ubicamanza bw’u Rwanda n’ubwubibirigi bumufiyeho ubirenganzira bungana 2) niba Ari umubirigi gusa yaba yaranyuze mu mategeko asaba kireka ibinyarwanda ? niba atarabikoze yabiranishwa ! 3) ariko nkuko avuga ko ibyo aregwa aribyo nkiko byanditse mu nyandiko yanyu abo yabikoreye bamugashe bamuburanisha ingero:CARLOS (CHACAL) ntiyaburaniye mi bufaransa Kandi Atari umifaransa ?! ariko kuko yategwaga iterabwoba baramuburanishije urindi rugero iyo Bin laden abanyamerika bamufata matekwa ntibati kumuburanisha nkuko abari gwantabnamo byagenze ? Uko njue mbyunva uko yafashwe ,so ngombwa cyane (ninjye uko mbibona)ahubwo ibyo aregwa nibyo ? Kuko nibyo bihangayikishije abantu ninabyo yagombye kwireguraho !! Nyuma yatsinda akarega abamufashe !!! Murakoze

GATABAZI FRANCE OLIVIER Kuya 17-02-2021

Ku giti cyanjye nta buhanga mfite mu mategeko nta nubumenyi nyafitemo ariko nkoresheje ibushishozi harimo ibintu bitatu nasobanuza 1) RUSESABAGINA ni Umunyarwanda w’umubirigi (afite ubwo bwene gihugu bwose) ? Niba Ari uko ubicamanza bw’u Rwanda n’ubwubibirigi bumufiyeho ubirenganzira bungana 2) niba Ari umubirigi gusa yaba yaranyuze mu mategeko asaba kireka ibinyarwanda ? niba atarabikoze yabiranishwa ! 3) ariko nkuko avuga ko ibyo aregwa aribyo nkiko byanditse mu nyandiko yanyu abo yabikoreye bamugashe bamuburanisha ingero:CARLOS (CHACAL) ntiyaburaniye mi bufaransa Kandi Atari umifaransa ?! ariko kuko yategwaga iterabwoba baramuburanishije urindi rugero iyo Bin laden abanyamerika bamufata matekwa ntibati kumuburanisha nkuko abari gwantabnamo byagenze ? Uko njue mbyunva uko yafashwe ,so ngombwa cyane (ninjye uko mbibona)ahubwo ibyo aregwa nibyo ? Kuko nibyo bihangayikishije abantu ninabyo yagombye kwireguraho !! Nyuma yatsinda akarega abamufashe !!! Murakoze

IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA