AMAKURU

UKWEZI
pax

Nibwo bwa mbere ngiye kuvuga ku mugaragaro ko nashyizwe mu byitso by’Inkotanyi - Rucagu

Nibwo bwa mbere ngiye kuvuga ku mugaragaro ko nashyizwe mu byitso by’Inkotanyi - Rucagu
26-05-2020 saa 11:14' | By Akayezu Jean de Dieu | Yasomwe n'abantu 8436 | Ibitekerezo 1

Rucagu Boniface ufite amateka yo kuba ari umwe mu bakoreye igihugu aho yakoze inshingano zitandukanye kuva kuri Repubulika ya mbere, ndetse akaza no kugirirwa icyizere na FPR Inkotanyi yahagaritse Jenoside, yavuze ko kuva mu 1990 atigeze yoroherwa n’Ubutegetsi bwa Habyarimana kuko abo mu ishyaka yabagamo rya MRND banamushyize mu byitso by’Inkotanyi.

Uyu mugabo w’imyaka 74, kuri ubu ni umwe mu bagize Urubuga Ngishwanama rw’Inararibonye z’u Rwanda, rwitwa “REAF” mu magambo ahinnye y’icyongereza (Rwandan Elders Advisory Forum), aho yagiye avuye ku buyobozi bwa Komisiyo y’Itorero ry’Igihugu yamazeho imyaka isaga umunani.

Rucagu wavukiye mu yahoze ari Chefferie ya Kibare (Burera y’ubu), ku wa 1 Ukuboza 1946, yinjiye muri politiki mu 1959 afite imyaka 13, icyo gihe nibwo Abatutsi benshi bameneshwaga bagahunga.

Yahawe inshingano nyinshi zirimo kuba umwarimu mu 1967, mbere yo kugirwa umujyanama wa komini, umuyobozi muri Minisiteri y’Uburezi n’iy’Ubutegetsi bw’igihugu.

Mu 1970 yagizwe Sous-Préfet wa Byumba, nyuma y’imyaka itatu agirwa uwa Ruhengeri, nyuma yaho gato Ubutegetsi bwa Perezida Kayibanda buba burahiritswe.

Amateka ye ntasanzwe kuko yabaye ku ngoma zitandukanye ndetse na nyuma ya Jenoside yakorewe Abatutsi yakomeje kugirirwa icyizere na FPR Inkotanyi ashyirwa mu buyobozi aho yagizwe Perefe wa Ruhengeri mu 1997.

Umwaka wa 1993 usa n’utaragenze neza kuri Rucagu wari Depite mu Nteko Ishinga Amategeko, kuko yagiriwe ishyari abamurwanya bakora iyo bwabaga bashaka kumuharabika no kumuteranya n’Inkotanyi, icyo gihe zari mu rugendo rwo kubohora igihugu.

Yavuzwe mu byitso by’Inkotanyi


Mu 1990 ubwo Ingabo zari iza FPR-Inkotanyi, zatangiraga urugamba rwo kubohora igihugu, hari bamwe mu banyarwanda batangiye gutotezwa ndetse bamwe baricwa bashinjwa kuba ibyitso by’Inkotanyi.

Mu kiganiro yagiranye na UKWEZI, Rucagu yavuze ko ku butegetsi bwa Habyarimana nta ruhande na rumwe yigeze yemerwamo ari urwa MRND cyangwa MDR na nyuma bose bihurije hamwe muri HUTU Power bose baramurwanya.

Rucagu avuga ko nawe binyuze mu nyandiko ihamagarira Abanyaruhengeri guhaguruka bakarwanya Rucagu bavugaga ko yashakaga kwiyoberanya mu karasisi k’amashyaka menshi.

Rucagu avuga ko byageze aho bakavuga ko ari mu byitso by’Inkotanyi, ahanini biturutse ku kuba barashakaga ko atajya muri komite nyobozi ya MRND.

Yakomeje agira ati “Ngira ngo ahari nibwo bwa mbere ngiye kuvuga ku mugaragaro neruye ko nashyizwe mu byitso by’Inkotanyi noneho kuvuga ibyo bintu ngo Rucagu yambaye uruhu rw’intama inyuma kandi imbere ari ikirura.”

Yakomeje agira ati “Icyatumye bitagira agaciro ni uko Abanyaruhengeri bo ku ivuko banzi bazi ubwoko navutsemo ariko igituma iyi nyandiko bayanditse bagiraga ngo ntazajya muri komite nyobozi ya MRND.”

Rucagu avuga ko kuba barakoze ibishoboka byose ngo atajya muri Komite ya MRND byamubereye umugisha kuko iyo aza kuyijyamo kuri ubu nawe aba ari mu bakoze Jenoside yakorewe Abatutsi.

Ati “Nari nzwi cyane mu Rwanda ariko amatora nasohotse ndi uwa gatandatu kuko bashakaga abantu bane bajya muri komite, uko kumparabika byatumye abantu batantora. Ariko nyuma bagize neza kuba batarantoye, kuko iyo bantora nari kuba ndi mu bateguye Jenoside.”

Uyu mugabo yavuze kandi akagambane gakomeye yashatse gukorerwa n’uwari Minisitiri Nzirorera wari igihangange muri Perefegitura ya Ruhengeri no mu gihugu hose.

Nzirorera yahamagaye abantu bane batandukanye abasaba kwiyamamariza ubudepite bw’inzibacyuho kugirango abashyigikire batsinde Rucagu aveho.

Gusa uyu mugambi wa Nzirorera warapfubye bitewe n’uburyo abaturage bakundaga Rucagu bityo abo bantu bane barimo uwitwaga Nahimana Ferdinand, ndetse na Butera Jean Baptitse wavukaga muri Komine Nyakinama akora muri Banki y’Igihugu bose baramutsembera bavuga ko batabasha kwiyamamaza ngo batsinde Rucagu mu matora.

Uko yatumijweho na Karenzi Karake

Mu gihe Inkotanyi zari zaratangiye urugamba rwo kubohora igihugu, mu gitero cyo ku wa 8 Gashyantare 1993, zafashe ibice byo mu Majyaruguru kugera muri Rulindo.
Icyo gihe Rucagu wari Depite, imodoka ze ebyiri zari muri ako gace ariko aza guhamagazwa na Karenzi Karake wari Comanda w’’Inkotanyi ngo ahabwe imwe muri zo.
Yakomeje agira ati “Icyo gihe nanditse akandiko mbwira Comanda Karenzi Karake mubwira ko kubera imirimo myinshi ntabashije kuboneka ndasinya ngahereza umushoferi wanjye aragenda agezeyo barayimuha. Imodoka yaragiye barayimuha, igeze mu Mujyi abantu bose barahurura baza kureba imodoka ivuye mu Nkotanyi.”

Iyo modoka yo mu bwoko bwa Mazda 323 (yari yarayiguze miliyoni n’igice y’amanyarwanda y’icyo gihe), akiyibona yanditse amabaruwa ayohereza mu baturage ku wa 15 Nyakanga 1993, abashimira ko bamuvuganiye mu nama ya FPR.
Nyuma yo kubona imodoka ye Rucagu yongeye kwandikira Inkotanyi abashimira kuba bamuhaye imodoka ye.

Muri uru rwandiko UKWEZI ifitiye kopi rufite umutwe w’amagambo ugira uti ‘Gushimira’ hari aho agira ati “Ntabashimiye rero naba mbaye indashima ! Kuki rero mbashimira impamvu ni uko mu nama mwakoze ahitwa I Gitanga ho muri Komini ya Nyamugari iyobowe n’umuyobozi wa FPR Kanyarengwe.”

“Mwamvuganiye ku Nkotanyi ko Depite Rucagu atari umugira nabi, atari umwicanyi nk’uko abanzi be babimugerekaho mu binyamakuru byabo.”

Muri uru rwandiko kandi Rucagu ashimira Inkotanyi agira ati “Nanone kandi mu muco wacu, ikibi kiragawa icyiza kigashimwa. Niyo mpamvu nshimiye Inkotanyi zabaretse mukavuga Rucagu uko mumuzi.

Iyi nyandiko yasembuye benshi batangira kuvuga ko ari kwifatanya n’umwanzi [FPR] ; abo mu ishyaka rya MDR Parmehutu bari bamufitiye amahari kuko yanze kubiyungaho babyuririraho.

Nyuma y’icyumweru asohoye iyi baruwa, Kangura yashyize hanze inyandiko yamwitiriye yibasira Inkotanyi, irimo imvugo nyandagazi ndetse n’amagambo ya gishumba nkuko yakomeje abivuga.

Rucagu atangaza ko abacuruzaga ibinyamakuru ahazwi nko kwa Rubangura n’ahandi bamufashije iyo baruwa bakayishyira muri iyo nimero yizihirwa n’ubufasha bamuhaye abagurira fanta (icyo gihe ikaziye yaguraga nka 2500 Frw).

Rucagu Boniface avuga ko kuva na cyera yahoranye umuco wo gushima no kunenga aho abona bitagenze neza ari nayo mpamvu akenshi abo muri MRND bakundaga kumwibasira kuko hari igihe yabanengaga akenshi.

Reba hano ikiganiro cyose Rucagu avuga uko yagize ibihe bikomeye kuva mu 1990


INKURU ZA :
Tanga Igitekerezo
Ibitekerezo 1
Frank Kuya 27-05-2020

Kujijisha.com

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...