AMAKURU

UKWEZI

Nimudutora ntimuzicuza kuko tutazaba za ntumwa mubona zaje gusaba amajwi gusa- Dr Frank Habineza

Nimudutora ntimuzicuza kuko tutazaba za ntumwa mubona zaje gusaba amajwi gusa- Dr Frank Habineza
1-09-2018 saa 10:11' | By Vincent Nsengiyumva | Yasomwe n'abantu 1359 | Ibitekerezo

Umuyobozi Mukuru w’Ishyaka riharanira Demokarasi no kurengera ibidukikije mu Rwanda ( Green Party), Dr Frank Habineza yijeje abaturage bo mu Majyaruguru ko nibaramuka babagiriye icyizere bakabatorera kujya mu Nteko bazabereka ko batibeshye kuko bazagerageza kubaba hafi no kumva ibibazo bahura nabyo.

Dr Frank Habineza yabigarutseho kuri uyu wa Gatanu tariki 31 Kanama 2018 ubwo we na bagenzi be 32 bo muri Green Party biyamamariza mu turere twa Gakenke, Musanze na Burera.

Ibi bikorwa byo kwiyamamaza kw’aba bakandida-Depite ba Green Party byabereye mu mirenge ya Gakenke mu Karere ka Gakenke, Umurenge wa Busogo mu Karere ka Musanze no mu murenge wa Gahunga mu Karere ka Burera, aho abaturage bari bitabiriye kuza kumva imigabo n’imigambi y’aba biyamamaza.

Abafashe umwanya wo kugaragariza abaturage bo mu Ntara y’Amajyaruguru imigabo n’imigambi babafitiye, abenshi bagiye bakomoza ku kajagari kari mu buhinzi by’umwihariko ubw’ibirayi, babizeza ko nibaramuka batowe bazashyiraho amategeko ahamye y’ubuhinzi ku buryo abaturage batazongera kujya baura n’ibibazo.

Babijeje ko bazaha uburenganzira busesuye abahinga ibirayi, maze bajye babigurishiriza igihe bashakiye banabigurishe n’abo bashatse ngo kuko basanga kubategeka uwo babigurishaho n’aho babigurishiriza bitera abahinzi ibihombo.

Ku kijyanye n’ubuhinzi kandi ngo Green Party nigirirwa icyizere abakandida bayo bagatorerwa kujya mu Nteko, ngo bazashyiraho ikigega gikomeye kizajya gifasha abahinzi ku buryo aazajya bashaka gushoramo imari bazajya babona aho bafata inguzanyo ku buryo bworoshye.

Dr Habineza yagize ati “Dufite gahunda yo gushyiraho ikigega kizajya gifasha abahinzi n’aborozi bo ku rwego ruciriritse, abashaka kwihangira imirimo mu buhinzi n’ubworozi nabo bakore batagowe maze nabo biteze imbere ubushomeri bucike.”

Umuyobozi Mukuru wa Green Party Dr Frank kandi yaboneyeho kwizeza abaturage bo mu Majyaruguru ko nibaramuka batoye Green Party batazicuza, ngo kuko biteguye kuzababera intumwa nziza.

Yagize ati “Nimudutuma ntabwo tuzabatenguha. Mutugiriye icyizere tuzashyiraho uburyo abo muzaba mwatoye bazababera intumwa nyazo. Ntabwo muzicuza kuko tutazamera nka ba bandi muheruka baje kwiyamamaza[….] Tuzajya tumanuka tubasange tuganire maze mutugezeho ibibazo byanyu tubibajyanire mu Nteko.”

Ishyaka riharanira Demokarasi no kurengera ibidukikije(Green Party) mu Rwanda rifite abakandida-Depite 32 bari kwiyamamariza kwinjira mu Nteko Ishinga Amategeko, mu matora azaba tariki ya 2 Nzeri ku banyarwanda baba mu mahanga na tariki 3 Nzeri uyu mwaka ku banyarwanda bose baba imbere mu gihugu.

JPEG - 223.2 kb

Abaturage b’i Musanze bakiriye Green Party ari benshi

JPEG - 197.4 kb

Abakandida ba Green Party basabanye bikomeye n’abaturage bo muri Byangabo mu murenge wa Busogo i Musanze

JPEG - 201.2 kb

Morale yari yose ku bakandida ba Green Party bari mu bikorwa byo kwiyamamariza mu Ntara y’Amajyaruguru

JPEG - 214.3 kb

Abo mu Gahunga ka Burera bahaye Umuyobozi wa Green Party impano


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...