AMAKURU

UKWEZI
ubumwe

‘Ntabwo bikwiye ko umukirisitu ava gusenga ngo agatahe mu nzu imwe n’amatungo’ Hon. Mukabalisa

‘Ntabwo bikwiye ko umukirisitu ava gusenga ngo agatahe mu nzu imwe n’amatungo’ Hon. Mukabalisa
9-09-2019 saa 09:51' | By Nsanzimana Ernest | Yasomwe n'abantu 1439 | Ibitekerezo

Perezida w’ Inteko ishinga amategeko Umutwe w’ Abadepite Mukabalisa Donatille yasabye abihaye Imana bo muri Kiriziya Gatolika mu Rwanda gutoza abakirisitu babo umuco w’ isuku no gutanga ubwisungane mu kwivuza.

Ubu butumwa yabutangiye I Save mu karere ka Gisagara mu ishuri rya St Bernadette kuri uyu wa 8 Nzeri 2019, mu muhango wo kwizihiza yubile y’ imyaka 100 umuryango w’ Abebikira umaze ushinzwe.

Mu myaka 100 ishize, Umuryango wa Benebikira waranzwe n’ibikorwa bitandukanye ahanini birimo guteza imbere uburezi by’umwihariko ubw’abana b’abakobwa, kwita ku buzima n’imibereho y’abaturage mu Gihugu cyose. Ishuri G.S. Ste Bernadette riherereye i Save niryo rya mbere ryabo.

Mu izina rya Perezida Kagame, Mukabalisa Donatille yifurije abihaye Imana bose, n’ abitabiriye ibi birori Yubile nziza y’imyaka 100 y’Umuryango w’ Abenebikira.

Mukabalisa yavuze ko umuryango w’ Abenebikiga wagabye amashami hirya no hino awushimira umusanzu utanga mu guteza imbere imibereho myiza y’ Abanyarwanda, mu buvuzi, uburezi no mu gufasha abatishoboye.

Perezida w’ Abadepite yabwiye Abenebikira ko nk’ uko bakangurira abakirisitu kuvuga rozari no kujya mu miryango remezo bakwiye no kubakangurira kugira isuku kuko bidakwiye ko umukirisitu ararana n’ amatungo.

Ati “ Uko mukangurira abakirisitu gusenga, kuvuga rozali, kujya mu miryango remezo, munabakangurire kugira isuku kuko ntabwo bikwiye ko umukirisitu ava gusenga yahawe inyigisho nziza, agataha mu nzu imwe n’amatungo, bikamuteza umwanda n’indwara za hato na hato”.

Yakomeje agira ati “ Mubakangurire kugira ubwishingizi bwo kwivuza kuko abenshi baza babagana kwa muganga, kujyana abana mu ishuri cyane cyane no kwita ku burere bwabo, kubatoza indangagaciro, kubatoza kumvira ababyeyi n’ababaruta kandi “Kumvira” ni ihame kuri Benebikira. Mubakangurire kwita ku mirire iboneye y’abana babo, bibarinde kugwingira kuko iyo bagwingiye ku mubiri, bagwingira no mu bwonko no muri roho, kandi aribo bayobozi, abihayimana cyane cyane na Benebikira bazakomeza ikivi cya Mama Mariya Yohana Nyirabayovu.”

Iyi Yubile yitabiriwe n’Abayobozi barimo abagize Inteko Ishinga Amategeko, abo mu Guverinoma, mu nzego z’umutekano, abayobozi bakuru muri Kiliziya yo mu Rwanda no hanze, Abihayimana n’imbaga y’abakristu. Igitambo cya misa cyayobowe n’Umwepiskopi wa Diyosezi ya Butare, Myr Filipo Rukamba.




INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...