AMAKURU

UKWEZI

Nyagatare na Gatsibo: Green Party yijeje abaturage impinduka nabo bayisaba kutazabatenguha

Nyagatare na Gatsibo: Green Party yijeje abaturage impinduka nabo bayisaba kutazabatenguha
21-08-2018 saa 00:00' | By Vincent Nsengiyumva | Yasomwe n'abantu 1625 | Ibitekerezo

Abakandida b’Ishyaka riharanira Demukarasi no kurengera Ibidukikije mu Rwanda (Democratic Green Party of Rwanda) bakomereje ibikorwa byo kwiyamamaza mu turere twa Nyagatare na Gatsibo two mu Burasirazuba bw’u Rwanda, bagaragariza abaturage baho imigabo n’imigambi babafitiye mu gihe baramutse batowe. Abaturage bo muri utu turere nabo babasabye kuzashyira ibyo babemereye mu bikorwa ngo kuko akenshi abiyamamaza biyemeza ibyo batazakora.

Kuri uyu wa Mbere tariki 20 Kanama 2018 nibwo abakandida ba Green Party barangajwe imbere n’Umuyobozi mukuru w’iri shyaka Dr Frank Habineza, biyamamarije mu mirenge ya Rwimiyaga ho mu karere ka Nyagatare n’umurenge wa Kiramuruzi muri Gatsibo.

Kimwe n’aho babanje muri ibi bikorwa byo gushaka amajwi azabinjiza mu Nteko Ishinga Amategeko, abakandida ba Green Party, bagarutse kubyo bazakorera abaturage nibagirirwa icyizere bagatorerwa kuba Abadepite.

Umuyobozi mukuru w’Ishyaka rya Green Party Dr Frank Habineza yabwiye imbaga y’abaturage ba Nyagatare na Gatsibo ko babafitiye byinshi bateganya kubakorera mu gihe babagiriye icyizere bakabatorera kwinjira mu Nteko ishinga Amategeko.

Yavuze ko Green Party izi neza ibibazo biri mu Ntara y’Uburasirazuba, abizeza ko bagiye mu Nteko babishakira ibisubizo vuba na bwangu.

Yagize ati “Ibibazo byanyu ndabizi ndabisobanukiwe kuko twese tubibamo.”

Yakomeje avuga ko ibibazo by’ibura ry’amazi mu bice byo mu Burasirazuba ko ari bimwe mu byakibandwaho mu gushakirwa ibisubizo, ayo kunywa akaboneka, ay’amatungo ndetse bakabona n’ayo kuhirira imyaka mu buryo bworoheye buri wese.

Yagize ati “ Ndabizi ko hari gahunda zakozwe ariko ibibazo ntibikemuke.Kuba ibibazo bidakemuka ni uko abadepite batabahagarariye neza. Tuzabashyiriraho amategeko mudutumye azabahesha ibisubizo birambye. Tuzafata amazi tuyakuye mu butaka no mu migezi, tuyahindure meza. Tuzashyiraho n’uburyo bwo gufata amazi y’imvura.”

Yanavuze ko bafite igisubizo kirambye ku bakora ubuhinzi n’ubworozi aho ngo bazashyirirwaho Banki yo kubaguriza hatabayeho kubasaba inyungu, maze n’urubyiruko rubone igishoro nta ngwate rusabwe.

Dr Habineza Frank yanavuze ko bazahagurukira kurwanya no guca burundu ibibazo by’ingutu bigaragara mu mitangire y’akazi ka Leta.

Ati ” Mu by’akazi hajya habamo ibibazo by’ikimenyane, ugasanga n’ubwo amategeko aba avuga ko umuntu abona akazi bitewe n’ubushobozi n’ubumenyi afite, ariko hari igihe usanga ibibazo by’ibimenyane bihari , cyangwa ugasanga hari abatanga itangazo ry’akazi ariko umwanya waratanzwe kera.Ibyo bintu birahari tuzareba ukuntu tubirwanya kugirango buri wese ufite ubushobozi n’ubumenyi ajye abona akazi mu buryo bukwiye.”

Nyuma yo kumva imigabo n’imigambi y’abiyamamariza kuba abadepite bo muri Green Party, abaturage bo muri iyi mirenge ya Rwimiyaga na Kiramuruzi baboneyeho kugira ibyo basaba aba bakandida mu gihe bageze mu Nteko.

Uwitwa Mukamurigo Esperance yavuze ko yishimiye imigabo n’imigambi ya Green Party, avuga ko niramuka ishyizwe mu bikorwa bizatuma bagera ku iterambere ntawe usigaye inyuma.

Yagize ati “ Twebwe icyo twasaba ni iterambere koko nk’uko baritwijeje. Nk’ubu ikibazo cy’amazi ni ingutu. Amazi turayagura kandi araduhenda. Nibaramuka babaye abadepite bazadukemurire iki kibazo kuko kiradukomereye.”

Avuga ko hari abiyamamaza bakizeza abaturage ibyo batazakora, avuga ko bizeye ko Green Party itazabatenguha.

Nzabimana we asaba ko bazahabwa uburenganzira bwo guhinga ibishanga banyazwe maze bigire icyo bibamarira ngo kuko leta yabibanyaze bikaba biri gupfa ubusa.

Abakandida ba Green Party bafatanyije n’abaturage ba Rwimiyaga gucinya akadiho Abaturage baje kubashyigikira ari benshi


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...