AMAKURU

UKWEZI
ubumwe

Perezida Kagame yakuriye inzira ku murima abagitera u Rwanda amacumu

Perezida Kagame yakuriye inzira ku murima abagitera u Rwanda amacumu
6-10-2019 saa 07:57' | By Nsanzimana Ernest | Yasomwe n'abantu 3609 | Ibitekerezo

Perezida w’ u Rwanda Paul Kagame yavuze ko abarwanya u Rwanda bagihanyanyaza gusa kuko ngo nabo barabizi ko ibyo batashoboye mu myaka yashize batazabigeraho ubu kuko u Rwanda rwiyubatse.

Avuga ko igituma avuga ko abarwanya u Rwanda batazabishobora abishingira ku bumwe bukomeye bw’ Abanyarwanda.

Yabivugiye I Bonn mu Budage ahabereye Rwanda Day ya 2019, kuri uyu wa Gatandatu tariki 5 Ukwakira.

Perezida Kagame yavuze ko Leta y’ u Rwanda yari ifitiye umwenda Abanyarwanda baba mu Budage kuko Rwanda Day yari itaraberayo.

Umukuru w’ igihugu yavuze ko u Rwanda ruri kwiyubaka, avuga ko rwasenyutse rusenyuka rutari ruriho icyo yagereranyije no guhuhuka.

Perezida Kagame yabwiye Abanyarwanda n’ inshuti zabo bari bateraniye I Bonn mu Budage mu ihuriro rizwi nka Rwanda Day ko uko u Rwanda rumeze ubu bitandukanye nuko rwari rumeze mu myaka 10, 15 ishize. Yongeraho ko u Rwanda rugenda rwiyubaka ku buryo abarutera amacumu bigenda bibagora.

Yagize ati “U Rwanda ibyo rumaze kunyuramo muri uko kwiyubaka, ruterwa amacumu atari make hirya no hino, amwe rukayizibukira ayandi akarufata rugakomereka, ariko rugakomeza ruhagaze n’ aho ruguye ntiruhere hasi”.

Akomeza agira ati “Imyaka 25 ishize ibyo byagiye bigabanyuka mu myaka 10 , 15 ishize, bigaragaza uko kwiyubaka. Ndetse navuga ko abarukoreraga ibyo uko imyaka igenda ihita bigenda bibagora kurukora uko barukoraga. Ntibashyirwa n’ ubu baracyageragera, ariko ni uguhanyanyaza ni ukwanga kuva ku izima, baziko ikitarashobotse icyo gihe, ubu bwo bakwihebera”

Perezida Kagame yagereranyije u Rwanda n’ indege, avuga ko iyo indege igenda mu kirere ihura n’ imiyaga myinshi irimo usunika uturutse imbere n’ usunika ututse inyuma.

Avuga ko u Rwanda ruhura n’ imiyaga irusunika ngo rusubire inyuma, ariko mu bundi buryo rukaba rufite n’ undi umuyaga urusunika ngo rukomeze imbere ariwo ‘Abanyarwanda’.

Umukuru w’ igihugu yijeje Abanyarwanda ko nk’ uko indege ihura n’ imiyaga iyisunika ngo idakomeza ariko ikagera aho igiye ariko n’ u Rwanda ruzakomeza rukagera aho rugana, ngo ahubwo igisigaye ni ukongera umuvuduko ntibibe kugerayo gusa ahubwo rukagerayo vuba.

Tubahaye ikaze mu Rwanda rw’ u Budaye…

Ambasaderi w’u Rwanda mu Budage, Igor Cesar yabwiye abitabiriye Rwanda Day ya 10 ati “Tubahaye ikaze mu Rwanda rw’ u Budaye”. Abanyarwanda baba mu Budage ni 1295, abitabiriye Rwanda Day ya 2019 barenga 700.

Ambasaderi Igor yavuze ko bakimenya ko Rwanda Day izabera mu Budage babyakiranye ibyishimo ariko ngo byanabateye ubwoba gato kuko Rwanda Day ari umunsi ukomeye ugoye kuwutegura.

Yavuze ko nubwo gutegura Rwanda Day bigoye ngo kuba barabashije kuyitegura bigaragaza ko Abanyarwanda bashoboye.

Ambasaderi w’ u Rwanda mu Budage yavuze ko iyi Rwanda Day itumye Abanyarwanda baba mu Budage batora komite yubatse kugera ku rwego rwo hasi.

Amb. Igor yakomoje ku musaruro wa Rwanda Day avuga ko amafaranga yavuye mu Banyarwanda baba mu mahanga ari miliyoni 250 z’ amadorali.

Perezida Kagame yahaye abitabiriye Rwanda Day umwanya urambuye bamugezaho ibibazo n’ ibyifuzo, ibibazo abiha umurongo byakemurwamo, ibyifuzo abikorera ubugororangingo ari nako yereka ababitanze uko byashyirwa mu bikorwa.

Rwanda Day ya 2019 yitabiriwe n’ abagera kuri 3500 barimo abagera ku 1000 baturutse mu Rwanda n’ abandi baturutse hirya no hino ku Isi biganjemo Abanyarwanda baba mu bihugu by’ I Burayi.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...