konka coffee
KONKA

AMAKURU

UKWEZI

‘Perezida Kagame yatweretse uko twatsinda urugamba mu bwitonzi n’ ubushishozi’ Gen. Kabarebe

‘Perezida Kagame yatweretse uko twatsinda urugamba mu bwitonzi n’ ubushishozi’ Gen. Kabarebe
31-01-2019 saa 16:32' | By Nsanzimana Ernest | Yasomwe n'abantu 1989 | Ibitekerezo

Umunjyanama wa Perezida wa Repubulika y’ u Rwanda mu byerekeye ingabo n’ umutekano General James Kabarebe yabwiye abasore n’ inkumi ko bafite amahirwe kuba bajya bumva impanuro za Perezida Kagame anababwira uko Kagame atangiye kuyobora urugamba ibintu byahise bihinduka.

Yabikomojeho mu kiganiro kibanze ku butwari bw’ ingabo zahagaritse jenoside yakorewe abatutsi yagejeje ku ihuriro ry’ urubyiruko rwo mu ntara y’ amagepfo rwateraniye muri Sitade ya Huye kuri uyu wa 31 Mutarama 2019.
Gen. Kabarebe yabwiye uru rubyiruko ko ubutwari butandukanye n’ ubuhazi, bugatandukana no gutinyuka.

Ati “Ushobora kuba igihazi ugakoresha imbaraga udakoresheje ubwenge ntugere ku cyo washakaga”.

Yakomeje agira ati “Ubutwari bwubakwa mundangagaciro nzima, mu mico batojwe noneho bakagira ubutwari. Iyo mufite ubuyobozi bubi nk’ ubwagejeje u Rwanda kuri jenoside ubutwari burasenyuka”.

Gen. Kabarebe yavuze ko k’ urugamba bagize umuyobozi mwiza w’ urugamba(Perezida Paul Kagame) abereka ko icyo barwanira gifite agaciro.

Yavuze ko mu byumweru bine bya mbere byakurikiye tariki 1 Ukwakira 1990 abasirikare ba RPA bapfaga abandi bagakomereka ku bwinshi kuko barwanaga bitanga.

Ngo Perezida Kagame atangiye kuyobora ingabo za RPA nibwo ibintu byahindutse kuko yaberetse uko barwana n’ icyo barwanira.

Yagize ati “Perezida Kagame yashoboye kubaka ubutwari mu basirikare b’ Inkotanyi abereka uko bagomba kurwana neza, abereka uko batsinda urugamba mu bwitonzi no mu bushishozi. Muri make ubutwari bwiza bw’ abasirikare bahagaritse jenoside babukomora kubuyobozi bwiza bwabaremyemo ubwo butwari”

Gen. Kabarebe yabwiye urubyiruko, abasore n’ inkumi, ko bafite amahirwe kuko Perezida Kagame abaganiriza.

Umuyobozi w’ Itorero ry’ Igihugu Edouard Bamporiki yavuze ko kuba intwari atari igitangaza kuko ibyanditswe bigaragaza ko igitangaza umuntu akigiramo uruhare ruto ibindi bigakorwa n’ imbaraga z’ umwuka cyangwa z’ imyuka.

Bamporiki yavuze ko urubyiruko rufite amahirwe yo kuba intwari kuko ibyo gukora bigihari.

Yagize ati “Iyo u Rwanda rufite ibirugoye biba ari umwanya mwiza w’ uko buri wese yagaragaza ubutwari bwe. Hari ibitubangamiye muri iyi minsi ndavuga cyane cyane ku ikoranabuhanga. Kuva kera intwaro yose yabaga ireba umwanzi aho aturuka”.

Yakomeje agira ati “Muri iyi minsi intwaro y’ ikoranabuhanga nituyikoresha nabi turaba dutangiye guhinyuza abakurambere, niturikoresha nabi turaba twiyerekejeho intwaro, ikoranabuhanga iyo rikoreshejwe nabi ni nko kwiyerekezaho umwambi cyangwa isasu ukaba uriyishe kandi u Rwanda rudukeneye twese”.

Umuyobozi w’ Itorero ry’ Igihugu yavuze ko ibigwari 1000 ntacyo byamarira igihugu ariko intwari imwe igakiza igihugu.

Urubyiruko rwiganjemo abanyeshuri barimo abo mu mashuri yishumbuye na Kaminuza ziri mu magepfo bashyimye ubutwari bwaranze ingabo zahagaritse jenoside rwiyemeza guharanira kuba intwari.

Icyumweru cy’ ubutwari cyatangiye tariki 25 cyasojwe none tariki 31 Mutarama 2019, ejo tariki 1 Gashyantare ni umunsi mukuru w’ intwari z’ u Rwanda.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...