AMAKURU

UKWEZI

Ruhango imaze kubona Meya na ba Visi Meya bashya basimbuye abaherutse kweguzwa

Ruhango imaze kubona Meya na ba Visi Meya bashya basimbuye abaherutse kweguzwa
25-05-2018 saa 13:17' | By Vincent Nsengiyumva | Yasomwe n'abantu 4645 | Ibitekerezo 3

Kuri uyu wa Gatanu tariki 25 Gicurasi 2018, nibwo njyanama y’akarere ka Ruhango yatoye abayobozi basimbura abaherutse kweguzwa aho Habarurema Valens yatorewe kuyobora aka karere, Rusilibana Jean Marie atorerwa kuba Umuyobozi w’Akarere wungirije ushinzwe ubukungu naho Mukangenzi Alphonsine aba ariwe utorerwa kuba Umuyobozi w’Akarere wungirije ushinzwe imibereho myiza.

Habarurema Valens yahataniraga uyu mwanya na Rukundo Felix amatora arangiye Habarurema Valens ari we utowe ku bwiganze bw’amajwi 180 ku majwi 17 gusa ya Rukundo Felix maze ahita aba umuyobozi mushya w’akarere ka Ruhango.

Ku mwanya w’Umuyobozi w’Akarere wungirije ushinzwe ubukungu, nawo wahatanirwaga na Jean Marie Vianney ndetse na Ufitemariya Olive, waje kwegukanwa na Rusilibana Jean Marie Vianney watowe ku bwiganze bw’amajwi 168 mu gihe Ufitemariya Olive bari bahanganye yagize amajwi 31 gusa.

Ku mwanya w’ Umuyobozi w’Akarere wungirije ushinzwe imibereho myiza nawo wahatanirwaga na Mukangenzi Alphonsine ndetse na Uzamukunda Marie Josée, amatora akaba arangiye hatowe Mukangenzi Alphonsine ku majwi 169 mu gihe Uzamukunda Marie agize amajwi 28 gusa.

Aba bayobozi bashya batowe bagiye gusimbura uwari Meya Mbabazi Francois Xavier, uwari Umuyobozi w’aka karere wungirije ushinzwe iterambere ry’ubukungu, Twagirimana Epimaque ndetse n’ uwari umuyobozi w’Akarere wungirije ushinzwe imibereho myiza y’abaturage, Anonciata Kambayire bakuweho icyizere n’Inama Njyanama y’Akarere ka Ruhango kubera ibibazo by’imicungire mibi y’umutungo w’akarere urimo amafaranga ashorwa mu mishinga igamije guteza imbere abaturage ndetse n’ibikorwaremezo bishorwamo amafaranga arenze ayo biba bijyanye.

Mbere y’uko aba bagize Komite nyobozi bose birukanwa hari hashije igihe bavugwaho kutumvikana mu kazi kabo ka buri munsi, ibintu njyanama yasanze byaradindije cyane iterambere ry’akarere ka Ruhango ndetse bikanasubiza inyuma akarere muri rusange.

Icyo gihe Njyanama y’aka Karere yakuyeho icyizere Meya n’abamwungirije babiri, maze ihita inategura raporo igomba gushyikirizwa ubuyobozi bw’Intara y’Amajyepfo igaragaza ko banirukanywe ku rutonde rw’abagize Njyanama y’aka karere ka Ruhango.

Abagize njyanama y’Akarere ka ruhango bitabiriye umuhango wo gutora Komite nyobozi nshya


INKURU ZA :
Tanga Igitekerezo
Ibitekerezo 3
-xxxx- Kuya 25-05-2018

felecitation valens

didi Kuya 25-05-2018

Ariko c koko muntu uduhaye iyi nkuru urabona yuzuye koko?Mayor uvuga arihe?

Tera Kuya 25-05-2018

Turabishimiye kdi muzace bugufi mwumvire Imana, Imana yonyine niyo izabashoboza gushyira mu bikorwa ibyo mwarahiriye. Ubwo nimunyuranya no gushaka kwayo muzamera nkabababanjirije

English
IGURIRE
Reba Ibindi Byinshi
netlink
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...