AMAKURU

UKWEZI
ubumwe

U Rwanda rugiye kwakira impunzi 500 zizava muri Libya

U Rwanda rugiye kwakira impunzi 500 zizava muri Libya
10-09-2019 saa 14:50' | By Nsanzimana Ernest | Yasomwe n'abantu 1178 | Ibitekerezo 1

Leta y’ u Rwanda ibinyujije muri Minisiteri y’ ubutabazi yatangaje ko igiye kwakira impunzi 500 z’ Abanyafurika ikazazituza mu karere ka Bugesera mu nkambi y’ agateganyo ahasanzwe hakirirwa impunzi z’ Abarundi mbere y’ uko zijyanwa mu nkambi ya Mahama.

Minisitiri Germaine Kamayirese yabitangaje mu kiganiro yagiranye n’ abanyamakuru uyu wa Kabili tariki 10 Nzeri 2019 nyuma y’ uko guverinoma y’ u Rwanda isinyanye amasezerano n’ Ishami ry’ Umuryango w’ Abibumbye ryita ku mpunzi yo kwakira izi mpunzi. Aya masezerano yashyiriweho umukono Addis Ababa muri Ethiopia.

Kamayirese avuga ko ikibazo cy’ impunzi z’ Abanyafurika kireba Afurika bityo ko Afurika ariyo ikwiye kwakira izi mpunzi aho kugira ngo zige kugwa mu Nyanja ya Mediterane zijya I Burayi.

Avuga ko nta mafaranga u Rwanda rwahawe ngo rubone kwemera kwakira izi mpunzi.
Ati “Nta mafaranga na makeya u Rwanda rwigeze rwakira kugira ngo rwemere kwakira impunzi z’ Abanyafurika. Ikibazo cy’ Abanyafurika nk’ uko nabibabwiye gikwiye gukemurwa n’ Abanyafurika ubwabo. Abanyafurika bagwa mu mazi muri Mediterane bashaka kujya I Burayi, ni ikibazo cy’ Abanyafurika, buri Munyafurika wese yakagombye kumva ko kimureba”.

Ku mpungenge z’ uko kuko aba Banyafurika bashobora kwaga kuza mu Rwanda kuko bashakaga kujya I Burayi, Minisitiri Germaine Kamayirese avuga ko nta mpunzi izazanwa ku gahato hazaza ibishaka.

Uhagarariye UNCHR mu Rwanda Ahmed Baba Fall yagize ati “Ndashimira guverinoma ku mutima yagize ikemera kwakira izi mpunzi. Itanze urugero rwiza ku bindi bihugu by’ Afurika”

Kugeza ubu muri Libya hari abimukira n’ impunzi bagera ku bihumbi 800, abenshi bava mu bihugu byabo bafite inyota yo kujya I Burayi.

Amasezerano izi mpande zasinye avuga ko hari n’abashobora guhabwa uburenganzira bwo kuguma mu Rwanda.

Umuryango wa Afurika yunze ubumwe niwo uzatanga ibikenerwa mu kohereza izi mpunzi mu Rwanda, UNHCR izabaha ibiribwa, amazi, aho kuba, uburezi n’ubuvuzi.

Hari izindi mpunzi zigera ku 4,400 zamaze kuvanwa muri Libya zijyanwa mu bindi bihugu kuva mu 2017. Harimo 2,900 bashyizwe muri Niger, na 425 bashyizwe muri Romania.


INKURU ZA :
Tanga Igitekerezo
Ibitekerezo 1
Kazungushaje Kuya 13-09-2019

Nibaze mureatubyaye biturize

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...