AMAKURU

UKWEZI
ubumwe

Ubuhamya bw’uko Col Patrick Karegeya na Lt Mutabazi bapanze kwica Perezida Kagame

Ubuhamya bw’uko Col Patrick Karegeya na Lt Mutabazi bapanze kwica Perezida Kagame
24-07-2019 saa 09:43' | By Chief Editor | Yasomwe n'abantu 16232 | Ibitekerezo

Kalisa Innocent wahoze mu itsinda ry’Abasirikare barinda Perezida Kagame ubu akaba amaze imyaka itandatu afunzwe kubera ibyaha birimo iby’iterabwoba n’umugambi wo kugirira nabi igihugu n’umukuru w’igihugu, yatanze ubuhamya bushimangira ko Col Patrick Karegeya na Lt Joel Mutabazi bari mu itsinda ryacuze umugambi wo guhirika no kwica Perezida Kagame.

Kalisa Innocent aregwa mu rubanza rumwe na Lt Joel Mutabazi, hamwe n’irindi tsinda ry’abandi bantu 8. Uko ari abantu 10, mu kwezi k’Ukwakira 2014 bahamijwe n’Urukiko rukuru rwa gisirikare ibyaha bitandukanye, banahabwa ibihano by’igifungo bigiye bitandukanye. Lt Joel Mutabazi we yahamwe n’ibyaha birimo iby’iterabwoba n’umugambi wo kugirira nabi igihugu n’umukuru w’igihugu, ahanishwa igifungo cya burundu.

Mu iburanisha mu rukiko rw’ubujurire ryabaye kuwa Mbere, nibwo Kalisa Innocent wahoze mu itsinda ry’abasirikare barinda umutekano w’umukuru w’igihugu, yatanze ubuhamya avuga ko imyaka 6 amaze muri gereza yicujije, akaba anasaba imbabazi ari nabwo yahishuye ukuri kwe gutandukanye n’uko mbere yaburanaga ahakana ibyaha.

JPEG - 67.4 kb

Aha Kalisa Innocent wambaye impunzankano y’imfungwa za gisirikare (mu ibara ry’icyatsi) aha yicaranye na Lt Joel Mutabazi wahoze amuyobora

Kalisa Innocent kuwa Mbere yasabye ko yafungurwa agasubira mu muryango nyarwanda, kuko ngo imyaka itandatu amaze muri gereza agororwa yize byinshi. Uyu musore yavuze ko Lt Joel Mutabazi yari mu itsinda ryahawe inshingano na Col Patrick Karegeya z’uko banoza umugambi wo kwica Perezida Paul Kagame, ndetse ngo bagiye bagirana ibiganiro bitandukanye bigamije gutegura uwo mugambi.

Kalisa Innocent na Lt Joel Mutabazi wamuyoboraga mu itsinda ry’abasirikare barinda umukuru w’igihugu, mbere bahakanaga ibyo bashinjwaga n’ubushinjacyaha bijyanye n’umugambi wo guhirika no kwica Perezida Kagame ariko ubu uyu Kalisa aremera icyo cyaha akanashinja Lt Joel Mutabazi ko bagambiriye kugirira nabi Perezida mu gihe bari bashinzwe kumurindira umutekano.

JPEG - 61.2 kb

Kalisa Innocent mu mwenda w’impuzankano z’abasirikare bo mu itsinda ririnda umutekano w’umukuru w’igihugu, mbere y’uko afungwa.

Mu ijoro rya tariki 31 Ukuboza 2013 rishyira ku Bunani bwa 2014, nibwo Col Patrick Karegeya wahoze akuriye ibiro by’ubutasi mu Rwanda, yiciwe muri Hoteli yo mu mujyi wa Jonannesburg muri Afurika y’Epfo, akaba yari yarahungiye muri iki gihugu nyuma yo gukurikiranwa n’inkiko zo mu Rwanda.

Col Karegeya yishwe nyuma y’amezi macye Lt Joel Mutabazi n’abo bareganwa hamwe batawe muri yombi. Lt Joel Mutabazi yatawe muri yombi ku mugoroba wa tariki 20 Kanama 2013, avanywe muri hoteli iri hafi y’umujyi wa Kampala. Yatawe muri yombi na Polisi ya Uganda hagendewe ku mpapuro zatanzwe n’u Rwanda, ariko ntiyahita yoherezwa mu Rwanda kuko Leta ya Uganda n’Ishami ry’Umuryango w’Abibumbye ryita ku mpunzi bavuze ko yari impunzi.

Mu kwezi k’Ukwakira 2013 nibwo yaje kugezwa mu Rwanda, aho inzego z’ubutegetsi muri Uganda zavuze ko ’yashimuswe’ n’itsinda ry’Abanyarwanda ryabifashijwemo na bamwe mu bashinzwe umutekano muri Uganda. Akimara gufatwa, nyuma y’amezi hafi atatu nibwo Col Patrick Karegeya yabonywe muri hoteli yapfuye, gusa nta makuru ashimangira ko itabwa muri yombi rya Lt Joel Mutabazi hari aho ryaba rihuriye n’urupfu rwa Col Patrick Karegeya.

Lt Joel Mutabazi na Nshimiyimana Joseph bakunda kwita Camarade, nibwo bonyine bagitsimbaraye bahakana ibyaha baregwa mu gihe abandi 8 bareganwa hamwe bahinduye ibyo bavugaga mbere, bakaba aho guhakana bafasha ubushinjacyaha bemera ibyaha banashinja Lt Joel Mutabazi.

Col Patrick Karegeya yahoze afite umwanya ukomeye yahawe na Perezida Kagame, akaba yarigeze gukorera ishami rishinzwe iperereza ryo hanze y’igihugu. Nyuma yo gufungwa kabiri azira imyitwarire idahwitse, muri 2006 yaje kwamburwa ipeti rye rya Colonel.

Yaje guhungira muri Afurika y’epfo muri 2007 ndetse aza kuburanishwa adahari muri 2011, ahamwa n’ibyaha byo kurema umutwe w’abagizi ba nabi, gukurura amacakubiri n’ivangura; ibyaha bivutsa igihugu na Leta umudendezo no gusebanya, hanyuma akatirwa imyaka 20 y’igifungo. Nyuma y’imyaka micye nibwo yasanzwe yiciwe muri hoteli muri iki gihugu yari yarahungiyemo.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...