konka coffee
KONKA

AMAKURU

UKWEZI

Uko abakandida bakiriye ibyavuye mu matora, Nsengiyumva ngo NEC ifite uruhare mu kudatorwa kwe

Uko abakandida bakiriye ibyavuye mu matora, Nsengiyumva ngo NEC ifite uruhare mu kudatorwa kwe
4-09-2018 saa 09:54' | By Vincent Nsengiyumva | Yasomwe n'abantu 4818 | Ibitekerezo

Abakandida bigenga ndetse na bamwe mu bahagarariye imitwe ya politike biyamamarizaga imyanya y’Abadepite, bagaragaje uko bakiriye ibyatangajwe na Komisiyo y’Igihugu y’amatora mu buryo bw’agateganyo. Umukandida wigenga witwa Nsengiyumva Janvier avuga ko atemeranya n’ibyatangajwe ngo kuko atari no kuri lisiti y’itora.

Nsengiyumva Janvier avuga ko nta mpamvu yo kuvuga ko atatorewe kujya mu Nteko mu gihe we ubwe kimwe n’abari bamushyigikiye batigeze bamubona kuri lisiti yariho abakandida bagombaga gutorwa.

Ibi Janvier yabitangarije Radio10 mu gitondo cyo kuri uyu wa Kabiri tariki ya 4 Nzeri 2018, ubwo we na bagenzi be biyamamazaga babazwaga uko bakiriye ibyatangajwe na NEC mu buryo bw’agateganyo.

Kandida Nsengiyumva Janvier yatangaje ibi nyuma y’uko kuri lisiti y’abiyamamazaga habayemo ikosa ry’imyandikire, aho kwandika Nengiyumva handikwa Nsengimana.

Perezida wa Komisiyo y’Igihugu y’amatora Prof. Kalisa Mbanda , kuri uyu wa 3 Nzeri 2018 yatangarije itangazamakuru ko ibyabayeho ari agakosa gatoya kakorewe mu icapiro katabuza igikorwa kuba cyane ko ifoto ye n’ibirango bye byagaragaraga.

Nsengiyumva Janvier we ntakozwa ibivugwa na NEC ndetse akaba yemeza ko we abona ataraje kuri lisiti y’itora. Avuga ko akurikije amakuru afite ngo yari kurenza amajwi ku 5% y’abagombaga kumutora iyo bikiza gukorwa mu mucyo.

Yagize ati “ Ubu mfitanye gahunda na Perezida wa Komisiyo y’amatora kugira ngo twige ku kibazo cyabayeho kuko nabonye ntaraje kuri lisiti y’itora. Habayeho impinduka kuko abo twabashije kuvugana bambwiye ko uwo bashakaga gukora batamubonye ku ilisiti.”

Yunzemo ati “ Ibyatangajwe n’ibyatowe ntekereza ko mwabonye ko bitandukanye. Amajwi 5% nari kuyarenza, kuko nkurikije ibyo mfite n’amakuru yandi umuntu agenda yumva ku bagiye badutora nari kuyarenza.”

Akomeza avuga ko hakiri icyizere ngo kuko ibyatangajwe ari agateganyo, ngo kuri we atekereza ko ibintu bishobora guhinduka.

Nsengiyumva Janvier arashinja NEC kuba imarutso yo kudatorwa kwe

Kandida Sebagenzi Ally Hussein we yatangaje ko yakiriye neza ibyavuye mu ibarura mu buryo bw’agateganyo, avuga ko kuba atatsinze bitagomba kumuca intenge cyane ko politike ari urugendo.

Kandida Ntibanyendera Elissam Salim yavuze n’ubwo atagize amahirwe yo kwinjira mu Nteko, ngo ntiyabura gushimira abamutoye ngo kuko atagize ubusa. Yemeza ko amatora yagenze neza ngo akaba anashimira FPR Inkotanyi ku bw’insinzi yabonye.

Kandida Mpayimana Phillipe wanatsinzwe mu matora y’umukuru w’igihugu umwaka ushize, yavuze ko nta byinshi yatangaza ngo kuko ibarura ry’amajwi ritararangira.

Umuyobozi Mukuru w’Ishyaka riharanira Demokarasi no kurengera ibidukikije (Green Party) Dr.Frank Habineza yavuze ko ishyaka rye rigifite icyizere cyo kuba ryabona amajwi asigaye kugira ngo babone 5% agomba kubinjiza mu Nteko.

Ati “ Haracyari 30% ataratangazwa, tugomba kugira icyizere ko havamo ibice tubura. Nta mpamvu yo gucika intege haracyari icyizere. Uko byagenda kose twatsindwa cyangwa twatsindwa turabyakira nk’Abademokarate. Abademokarate bemera ibivuye mu matora, byabashimisha bitabashimisha. Kuri uyu munota twe twizeye insinzi.”

Umuyobozi w’ishyaka PS Imberakuri, Mukabunani Christine, nawe yatangaje ko hakiri icyizere cy’uko ibice babura bishobora kuboneka muri 30% by’amajwi atarabarurwa.

Komisiyo y’Igihugu y’Amatora, yatangaje amajwi y’agateganyo ku matora y’abadepite yabaye kuri uyu wa 3 Nzeri 2018, aho 70% by’ayabaruwe, FPR Inkotanyi iri ku isonga n’amajwi 75%, PSD igakurikira na 8.5%, PL 7%, Democratic Green Party 4.5% na PS Imberakuri 4.5% mu gihe abakandida bigenga bose uko ari bane nta n’umwe wagejeje kuri 1% mu gihe basabwa 5% kugira ngo bajye mu Nteko.

Umuyobozi mukuru wa Green Party, Dr Frank Habineza avuga ko hakiri icyizere cy’uko bashobora kubona amajwi 5%, ngo kandi batanayabonye babyakira nk’Abademokarate


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...