konka coffee
KONKA

AMAKURU

UKWEZI

Urugamba rwo guteza imbere igihugu ntawe uzarusubiza inyuma- Min. Kabarebe

Urugamba rwo guteza imbere igihugu ntawe uzarusubiza inyuma- Min. Kabarebe
21-06-2018 saa 09:42' | By Akayezu Jean de Dieu | Yasomwe n'abantu 1817 | Ibitekerezo

Minisitiri w’Ingabo z’u Rwanda, Gen. James Kabarebe wagezaga ikiganiro ku ntore z’Imbaturabukungu zo mu ntara y’Uburasirazuba, kuri uyu wa Gatatu tariki 20 Kamena 2018, yavuze ko urugamba rwo kubohora igihugu no guhagarika Jenoside rwarangiye ubu urugezweho ari urwo kubaka igihugu kandi ngo ntawe uzarusubiza inyuma abanyarwanda bamurebera.

Izi ntore z’Imbaturabukungu ziri gutorezwa mu karere ka Nyagatare kuva ku wa 17 Kamena kuzageza kuri 23 Kamena 2018, by’umwihariko ariko kuri uyu wa Gatatu zikaba zasuye Ingoro y’Umurage y’Amateka yo guhagarika Jenoside aho bongeye gusobanurirwa ko impamvu kubohora igihugu no guhagarika Jenoside byabayeho ari ugushyira hamwe, ubwitange, umurava no gukunda igihugu kw’abarwanye urwo rugamba.

Habakurama Oreste umwe mu bikorera ukomoka mu karere ka Ngoma yavuze ko iri torero ry’Imbaturabukungu hari byinshi bamaze kungukiramo n’ubwo ritararangira ariko ngo igikomeye bungutse ni uko abishyize hamwe bagera kuri byinshi.

Yagize ati “Icyo twashoboye gufata kandi gikomeye, uhereye ku mateka yagiye aranga igihugu cyacu ni uko icya mbere ari ikintu kijyanye no gukorera hamwe, gukorera hamwe tukumva ko arizo zikwiriye kuba indangagaciro zacu nk’uko mu muco nyarwanda ukwiriye kujyana n’indangagaciro na kirazira z’umuco nyarwanda, icyo ni kimwe mubyo twungukiyemo kandi ntekereza ko twagifashe nk’ihame rikomeye kuko tuzava muri iri torero hari byinshi tugiye gushiraho kugira ngo tube twakorera hamwe tugire aho twageza igihugu cyacu”

Perezida w’Urugaga rw’Abikorera mu Ntara y’Uburasirazuba, Ndungutse Jean Bosco yavuze ko muri iri torero bari kwigishwa cyane indangagaciro zijyanye no gukorera hamwe ariko anashiangira ko hari n’isomo rikomeye bakuye kuri iyi nzu ndangamurage y’urugamba rwo kubohora igihugu no guhagarika Jenoside

Yagize ati “Icyo byongereye mu bucuruzi bwacu cyangwa icyo twashakaga ko bagenzi bacu babasha kumenya , ni icy’uko bagomba kwiyemeza, nibyo twigiye hariya, twabonye ko iyo hatagira abantu bafata icyemezo igihugu ntabwo cyari kubohorwa ngo bicare bavuge bati tugomba guhagarika Jenoside”

Yakomeje agira ati “Aho rero twebwe nk’abikorera turavuga ngo niba abantu baricaye bakavuga ngo dukore iki kintu kandi bakakigeraho birashoboka ko natwe twakwicara tukavuga ngo twubake isoko rya Kayonza, twubake hoteli I Kirehe, twubake iwacu I Gatsibo”
Perezida w’Urugaga rw’Abikorera (PSF), mu Ntara y’Uburasirazuba, Ndungutse Jean Bosco

Guverineri w’Intara y’Uburasirazuba, Mufulukye Fred we yavuze ko abikorera muri iyi Ntara bagira uruhare rukomeye mu iterambere ryayo cyane ko usanga ibikorwa birimo by’ubucuruzi, amahoteli n’ibindi ariko ngo ikintu cy’ingenzi baburaga ni ugukorera hamwe no guhuza za mbaraga buri umwe ku giti cye afite mu rugamba rwo kubaka iyi Ntara n’Igihugu cyabo muri rusange.

‘Ubumwe bw’Intore bunoza Intambwe’

Umuyobozi w’Itorero ry’Igihugu akaba n’umutoza mukuru w’Intore, Bamporiki Edouard yavuze ko impamvu nyamukuru y’iri torero ry’abikorera by’umwihariko muri iyi ntara, ari ukugira ngo basobanurirwe banigishwe indangagaciro by’umwihariko indangagaciro yo gukunda igihugu no kugikorera

Yagize ati “Buriya indangagaciro ikomeye cyane ni indangagaciro yo gukunda igihugu. Gukunda igihugu rero tugikunda tugikorera tukitangira mu buryo butandukanye nk’uko Nyakubahwa Minisitiri w’Ingabo yamaze kubibabwira hari abo usanga bacuruza agatekereza ko ibyo akora mu bucuruzi ari ukwiyubaka no kuba umuryango we, iyo ahereye aho ngaho bimukoresha amakosa menshi ariko iyo atekereje gucuruza nko gukorera igihugu nawe aba arimo muri cya gihugu we n’umuryango we baba bari muri kwa kubaka igihugu”

Yakomeje agira ati “Ni ukuvuga ngo rero turiho turubaka indangagaciro ishamikiyeho nyinshi yo gukunda igihugu kugira ngo ibyo bakora byose babikore nk’ibintu bizaramba, urabona umuntu iyo aramye aramba imyaka 90, ariko iyo umuntu avuze ngo ubu bucuruzi ngiye kubwubaka mu buryo nimbi ntahari umwana wange atazagira ingorane zo gutuma bagurisha ibye ahubwo azakomereze kubyo natangiye. Haba harimo gukunda igihugu gukunda uwo utarabona ariko uzaba uhari wowe udahari”

Hon. Bamporiki yakomeje avuga ko kandi mu ndangagaciro izi ntore ziri guhabwa harimo gukangurirwa kwirinda ruswa no kwibutswa ko ahari ruswa igihugu kitatera imbere. Yanavuze ko iyo bashyizwe mu masibo baba babubakamo ubumwe ku buryo n’iyo batashye babikomerezaho

Yagize ati “Iyo tuvuze ngo ubumwe bw’Intore bunoza intambwe ntabwo biguma mu magambo gusa ahubwo bijya mu bikorwa noneho bafata bwa bucuruzi bwabo babushyize hamwe bakunguka nk’abantu, igihugu kikunguka, tugatunga abaturage bacu twihagije tudatekereza ibiva hanze.

Minisitiri w’Ingabo mu Rwanda, James Kabarebe wavuze ko urugamba rwo kubohora igihugu no guhagarika Jenoside rwarangiye kuri ubu hasigaye urwo kubaka igihugu yasabye izi ntore z’imbaturabukungu kumenya ko kubaka igihugu bidasaba gutanga ubuzima gusa ariko nanone ashimangira ko bigoye n’ubwo atari urugamba rusaba imbunda ariko bisaba imbaraga,ubwitange n’ibitekerezo bizima bizira ruswa n’andi manyanga .

Min. Kabarebe yakomeje avuga kandi ko uru rugamba rwo kubaka igihugu ntawe uteze kuzaruhagarika abanyarwanda bamurebera n’ubwo hari benshi batanezezwa n’ibyo u Rwanda rugeraho umunsi ku munsi. Minisitiri w’Ingabo z’u Rwanda, Gen. James Kabarebe yasabye izi ntore kurangwa no gukorera hamwe
Guverineri w’Intara y’Uburasirazuba, Mufulukye Fred Umuyobozi w’Itorero ry’Igihugu akaba n’umutoza mukuru w’Intore, Bamporiki Edouard ati ’Ubumwe bw’Intore bunoza Intambwe’
Iri torero riri kubera muri Nyagatare rihuriyemo abikorera basaga 400 baturutse mu turere twose tw’Intara y’Uburasirazuba


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...