konka coffee
KONKA

AMAKURU

UKWEZI

Nyamasheke: Abakobwa biga muri TTC Mwezi babangamiwe no gukarabira ku karubanda

Nyamasheke: Abakobwa biga muri TTC Mwezi babangamiwe no gukarabira ku karubanda
15-02-2018 saa 17:06' | By Karegeya Jean Baptiste | Yasomwe n'abantu 1436 | Ibitekerezo

Abakobwa biga muri TTC Mwezi, babangamiwe bikomeye no kubura ubwogero, aho bavuga ko bakarabira aho abahisi n’abagenzi babareba ubwambure ariko ubuyobozi bw’ishuri ntibugire icyo bubikoraho.

Ubusanzwe Ishuri rya TTC Mwezi riherereye mu murenge wa Karengera Akarere Nyamasheke, ku muhanda uva mu Kabuga ugana i Mwezi, mu birometero 20 uvuye ku muhanda wa kaburimbo Kivu Belt.

Iri shuri rigizwe n’inyubako zishaje kandi zidahagije, kuko rikorera ahahoze CERAI. Iki kigo ntabwo kizitiye usibye ibigori bahinga ahagana ku muhanda bikabera agakingirizo abakobwa bakarabira hanze, nabyo byasarurwa bagasubira ku kabo.

Iki kigo cyigaho akobwa 235, bafite ibyumba by’ubwogero umunani bwubakishije imbaho zishaje. Usibye gutinya umubyigano, ngo banatinya ko bwabagwira mu gihe baba bari kubwogeramo.

Mu masaha ya mu gitondo babyutse, ndetse na nimugoroba barangije amasomo, baba batonze imirongo bakarabira hafi y’umuhanda, abhisi n’abagenzi babacaho babarunguruka, bareba amabere yabo n’uko bateye umubiri wose.

Umwe mu bakobwa wiga mu mwaka wa Gatanu waganiriye na Ukwezzi.com, yavuze ko aterwa ipfunwe no kuba rubanda izi uko ateye, ngo ndetse n’abahungu bigana baza mu gitondo bamubwira uko bagenzi be bameze.

Agira ati “ Ahantu twogera ni ku karubanda, sinzi ko hari umubyeyi wakwishimira ko umwana we w’umukobwa ahogera. Twogera hanze kandi nta ruzitiro ruhari, abahisi n’abagenzi bagatambuka batwitegereza twambaye ubusa kandi nta handi twakogera kuko n’utuzu tw’imbaho twogeramo ntitwajyamo abarenga bane kandi turi abakobwa 235. Utwo tuzu natwo twanga kutujyamo kubera ubwoba ko twatugwaho, turashaje cyane.”

Umuyobozi w’iri shuli nawe udahakana ikibazo kiri mu kigo ayoboye avuga ko bidahesha ishema umwana w’umukobwa kogera hanze.

Ati “Abakobwa bacu bogera hanze kubera kubura ahandi bogera, kandi koko ishuri ntirizitiye, ni ku muhanda w’abajya mu isoko. Biragayitse mu by’ukuri ntitubihisha kandi biragaragara.”

Ushinzwe uburezi mu karere ka Nyamasheke, Sinabajije Alphonse avuga ko n’ubwo iri shuri ryashyizwe mu mazu ashaje, ngo ntiyari ashaje byo gupfushwa ubusa.

Sinabajije akomeza avuga ko muri gahunda akarere kihaye, mu myaka itandatatu iri shuri rizaba rimaze kugira ibyangombwa byose. Ikibazo cy’ubwiherero n’ubwogero bw’abakobwa ngo kizakemuka mu mwaka wa 2021.

Uburezi butekaniye buri wese

Mu gikorwa cy’Iminsi 16 cyo kurwanya ihohoterwa rishingiye ku gitsina (16 days of activism against GBV), insanganyamatsiko y’uyu mwaka yasabaga kugira “Uburezi butekaniye bose” (Make Education Safer for All).

Mu kuyihitamo, ni uko bazirikanaga ko inyubako ubwazo zishobora kuba imbogamizi ku myigire ya bamwe. Ihohoterwa rishingiye ku gitsina mu bijyanye n’uburezi rigaragarira cyane mu bikoresho n’inyubako nk’izi z’i Mwezi, amayira, amashuri n’amacumbi bitajyanye n’imyigire ya buri wese.

Umukozi wa Minisiteri y’Uburezi ushinzwe uburere bw’umwana w’umukobwa, Mitali Lydia, ashimangira ko aba bakobwa bahohoterwa, kuko bitari bikwiye ko bogera hanze. Akomeza avuga ko agiye gukora ubuvugizi n’inzego z’abagore n’akarere ka Nyamasheke, hakarebwa uburyo aba bana babona aho bogera vuba, mbere y’uko hari ibindi bikorwa muri iki kigo.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...