AMAKURU

UKWEZI
ubumwe

CHUB yagabiye inka abarokotse Jenoside bati ‘zizadufasha gukira ibikomere’

CHUB yagabiye inka abarokotse Jenoside bati ‘zizadufasha gukira ibikomere’
9-09-2019 saa 12:20' | By Nsanzimana Ernest | Yasomwe n'abantu 387 | Ibitekerezo

Abaganga n’ abakozi bo mu Bitaro bya Kaminuza bya Butare CHUB mu mpera z’ icyumweru gishize bagabiye inka 10 imiryango 10 itishoboye yarokotse Jenoside yakorewe abatutsi.

Iki gikorwa cyabaye tariki 7 Nzeri 2019 cyakomatanyijwe no kuvura abaturage ku Kigo Nderabuzima cya Mukura giherereye mu murenge wa Mukura akarere ka Huye.

Mukamurera Chritsine, umwe mu bagabiwe inka avuga ko nta nka yagiraga kuko izo kwa sebukwe bari bafite zariwe n’ iterahamwe muri Jenoside yakorewe abatutsi.

Uyu mugore wagizwe umupfakazi na Jenoside yakorewe abatutsi avuga ko inka yahawe igiye kumuteza imbere we n’ abo baturanye kuko azajya abaha amata.

Uyu mubyeyi w’ imyaka 52 avuga ko ubuzima bubi yari abayemo bwatumaga atiyubaka ngo akire ibikomere byo ku mutima yatewe na Jenoside yakorewe abatutsi.

Mu ijwi ryumvikanamo ikiniga ati “Ubu muradufashije umutima wacu murawururukije, ibibazo bizajya bigenda bivaho. Burya inzara nayo itera ibitekerezo byinshi. Ubukene bwakwica ugatekereza byinshi. Hari igihe uvuga uti ubu iyo ngira umugabo aba agiye kumpahira”.

Ngendahimana Pascal, utuye mu kagari ka Rango A yavuze ko inka yahawe izamufasha ibintu bitatu: kubona ifumbire, kubona amata no kwigira.

Umuyobozi mukuru w’ Ibitaro bya CHUB Dr Augustin Sendegeya yavuze ko kuva muri 2011 batangira igikorwa cyo kugabira inka abarokotse Jenoside yakorewe abatutsi bamaze gutanga inka 138 mu mirenge itandukanye y’ akarere ka Huye.

Abaganga ba CHUB uretse kugabira inka 10 imiryango 10 yo mu murenge wa Mukura banavuye abarwayi barenga 300 basanze ku kigo nderabuzima cya Mukura batanga n’ inama ku baturage b’ uyu murenge.


Umuyobozi mukuru w’ Ibitaro bya CHUB Dr Augustin Sendegeya

Dr Sendegeya yagize ati “Mitiweri nibwiraga ko abari hano bose bayifite ariko imibare nahoze mbaza bambwiye ko hari nka 25% batarayibona…mwabonye nk’ abadamu batwite kiriya cyuma babashyiragaho, buriya udafite mitiweri ni amafaranga menshi cyane. Amafaranga wanga kugura mitiweri ukayatanga uri kwa muganga kandi yakagombye kugufasha muyindi mibereho”

Umuyobozi w’ Akarere ka Huye ushinzwe imibereho myiza y’ abaturage, Kankesha Annociata , yashimye CHUB uruhare ikomeje kugaragaza mu guhindura imibereho y’ abaturage ba Huye.

Kankesha yasabye abahawe inka kuzifata neza, bakirinda kurarana nazo mu nzu ahubwo bakazubakira ibiraro abibutsa ko ari izabo.

Ati “Ndashaka kugaruka ku ruhare rwanyu, ejo ntabwo tuzahamagara CHUB tubabwira ngo ya nka yanyu, baturage beza mubinyemerere ntabwo ari inka ya CHUB ni inka yawe, baguhaye ngo ubashe kubaho, baguhaye ngo ubashe gutera intambwe burya iyo umuntu akugabiye aba anagukunda”

Ngendahimana Pascal wavuze mu izina ry’ abahawe inka yabwiye itangazamakuru ko bagiye kwishyira hamwe bagakora ikimina kugira ngo inka yarwaye bage babona amafaranga yo kuyivuza.




INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...