konka coffee
KONKA

AMAKURU

UKWEZI

Gicumbi na Huye : Inkuba zakubise abantu, batatu barapfa abandi bajyanwa mu bitaro

Gicumbi na Huye : Inkuba zakubise abantu, batatu barapfa abandi bajyanwa mu bitaro
20-04-2018 saa 12:14' | By Vincent Nsengiyumva | Yasomwe n'abantu 3377 | Ibitekerezo 1

Ku gicamunsi cyo kuri uyu wa Kane tariki 19 Mata 2018, mu bice bitandukanye mu gihugu haguye imvura nyinshi yumvikanagamo inkuba, aho zakubise abantu mu turere twa Gicumbi na Huye , batatu bitaba Imana abandi barakomereka bajyanwa mu bitaro.

Abantu bahuye n’izi nsanganya ni abo mu murenge wa Kageyo ho mu Karere ka Gicumbi ndetse no mu mirenge ya Mukura na Kinazi yo mu karere ka Huye mu Ntara y’Amajyepfo.

Umunyamabanga Nshingwabikorwa w’umurenge wa Kageyo muri Gicumbi, yemeje amakuru y’abantu babiri bishwe n’inkura muri uyu murenge mu mvura yaguye kugicamunsi cyo kuri uyu wa Kane tariki ya 19 Mata 2018.

Yagize ati “Ku gicamunsi cyo ku munsi w’ejo kuwa Kane mu murenge wacu haguye imvura yari irimo inkuba, aho zakubise abantu batatu, babiri muri bo bahita bitaba Imana.”

Abo babiri bitabye Imana ni uwitwa Jean Bosco Ntawurushimana w’imyaka 47 wo mu mudugudu wa Gicumbi mu Kagali ka Kabuga na Jean Lambert Kamana w’imyaka 19 wo mudugudu wa Kampumba.

Ibi bibaye muri uyu murenge nyuma y’iminsi micye na none inkuba ikubise uwari umukozi wa Compassion ubwo yari mu kazi maze ahita yitaba Imana.

Uretse aba babiri bakubiswe n’inkuba muri uyu murenge wa Kageyo muri Gicumbi, mu mvura yo ku mugoroba w’ejo inkuba yakubise abantu mu mirenge ibiri uwa Kinazi n’uwa Mukura yo mu Karere ka Huye, umuntu umwe ahasiga ubuzima abandi barakomereka bajyanwa mu bitaro.

Uwahasize ubuzima ni umwana w’umuhungu wo mu kigero cy’myaka 12 wo mu Mudugudu wa Rwinuma Umurenge wa Mukura wari uvuye kwahira amatungo.

Muri iyi mvura kandi mu Murenge wa Kinazi na ho inkuba yakubise abakozi babiri b’umuryango Compassion, bari ku kazi umwe ntiyagira icyo aba undi ajyanwa kwa muganga nk’uko byatangajwe n’ Umunyamabanga nshingwabikorwa w’uyu Murenge wa Kinazi, Prosper Rwamucyo.

Uretse aba bantu bakubiswe n’inkuba bakahasiga ubuzima, iyi mvura kandi yangije byinshi birimo amazu y’abaturage ndetse n’amashuri byasenyutse kubera umuyaga n’amahindu.

Ministeri Ishinzwe Impunzi n’Imicungire y’Ibiza mu Rwanda (MIDIMAR) iherutse gusohora itangaza rivuga ko kuva muri Mutarama kugeza tariki 16 Mata 2018, mu gihugu hose abantu 51 bamaze guhitanwa n’ibiza barimo 31 bishwe n’inkuba na 11 bahitanywe n’imvura y’amahindu irimo umuyaga.

Iyi Minisiteri yasabye abanyarwanda muri rusange badakwiye kujya impaka ku ngingo yo gushyira imirindankuba ku nyubako ihurirwamo abantu benshi nk’urusengero, ivuriro, ishuri, inzu y’ubuyobozi n’ahandi, dore ko inkura ari zo ziri ku isonga mu biza biri guhitana umubarte munini w’abantu..


INKURU ZA :
Tanga Igitekerezo
Ibitekerezo 1
HITUTUMA Kuya 23-04-2018

Nihanganishije ababuze ababo, ba nyakwigendera baruhukire mu mahoro, kandi ndagira ngo nkangurire abantu kubahiriza amabwiriza yo kwirinda inkuba: Harimo kutavugira kuri telefone imvura igwa, kutugama munsi y’ibiti mu gihe imvura irimo kugwa, kutagenda mu mvura, ndetse by’umwihariko gushyira imirindankuba ku mazu abantu batuyemo!!

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
Ibitekerezo
IZINDI NKURU WASOMA
Loading...