konka coffee
KONKA

AMAKURU

UKWEZI
Minijust

Kigali: Hafashwe uwibiraga abaturage umuriro yiyita umukozi wa REG

Kigali: Hafashwe uwibiraga abaturage umuriro yiyita umukozi wa REG
7-03-2019 saa 19:30' | By Chief Editor | Yasomwe n'abantu 4419 | Ibitekerezo 1

Abantu babiri aribo Hagenimana Janvier na Tuyishime Françoise bafungiye kuri sitasiyo ya Police Kicukiro aho bakurikiranyweho ibikorwa bijyanye no kwiba umuriro w’amashanyarazi, umwe muri aba akaba yari amaze igihe kirekire akora ibyo bikorwa yiyita umukozi w’ikigo cy’igihugu gishinzwe ingufu (REG)

Hagenimana Janvier watawe muri yombi n’Urwego rw’Ubugenzacyaha RIB. yiyemerera ko yari amaze imyaka isaga itandatu yiyita umukozi wa REG hanyuma agakora ibikorwa bigamije kwiba amashanyarazi aho yafashaga abantu batandukanye muri ubwo bujura, akaza gufatirwa mu cyuho nyuma yo gufasha uwitwa Tuyishime Françoise kwiba umuriro, uwo nawe bakaba bafunganywe.

Nk’uko ahandi henshi babigenza, uyu Hagenimana yari yafashije Tuyishime bakoresha umuriro udaciye muri mubazi, kuburyo bawukoreshaga ariko batawushyuye. Hagenimana uretse kuba akurikiranyweho icyaha cy’ubujura, anakurikiranyweho icyo kwiyitirira umurimo adakora, mu gihe mugenzi we Tuyishime bafunganywe we akurikiranyweho icyaha cyo kwiba umuriro.

Tuyishime uvuga ko asanzwe ari umucuruzi, avuga ko mu mwaka ushize wa 2018, Cashpower ye yagize ikibazo akajya kuri EUCL akahasanga umuntu wamuhaye nimero za telefone z’uwamufasha hanyuma akamuhamagara, akahagera ari mu modoka ya EUCL ndetse anafite ibikoresho by’icyo kigo, akamubwira ko ibyiza yagira mubazi ebyiri, imwe muri zo akamubwira ko hari umuriro ayiguranye bityo amusaba amafaranga ibihumbi 70 arayamuha nyuma amuha andi y’ibikoresho ibihumbi 150. Avuga ko yabonaga nta kabuza uwo ari umukozi wa REG.

JPEG - 37.7 kb

Uyu Hagenimana wanafatanywe mubazi nawe arabyemera. Yahoze ari umukozi wa REG kugeza muri 2013 ariko ngo yakomeje gukorana n’abakozi ba REG barimo abamutizaga imodoka n’ibikoresho akagera ku baturage babona ko ari umukozi w’icyo kigo,

Mu magambo ye ati: “Yarabinsabye nanjye mbikora kuko nari umushomeri muri iyi minsi. Umuntu wamuhaye nimero zanjye ntabwo muzi, numvise ampamagarara ambwira ko amashanyarazi ari guturika ngenda nk’umuntu ugiye kuyamukorera, ndahagera mugira inama yo gushaka urusinga tukamushyiriraho ‘triphase’ akajya abona uko ahindura. Birangiye yarambwiye ati reka tubikore turebe ko hari icyo bitanga, yampaye ibihumbi 28Frw, mpamagara kuri EUCL bazana imodoka n’umukozi ubishinzwe barabimanika hashize nk’iminsi arampamagara ambwira ko bya bintu bamukoreye bitari gukora neza.””

JPEG - 46.3 kb

Umuvugizi wa RIB, Mbabazi Modeste, yavuze ko guhanahana amakuru no gukorana hagati y’abaturage n’izindi nzego bazakomeza kurwanya ubujura bw’amashanyarazi hirya no hino mu gihugu.

Nkubito Stanley ushinzwe ishami ryo kurwanya ibihombo byose aho byaba bikomoka muri REG, avuga ko uko abantu bakaza umurego mu kwiba amashanyarazi ari nako bakaza ingamba zo kubihashya. Yemera kandi ko mu bakozi ba REG naho hari abiba umuriro ndetse hari abagiye bafatwa.

Yagize ati: “No mu kigo hashobora kubamo abajura, hari abo twagiye dufata mu myaka yashize tukabirukana abandi tukabashyikiriza inzego zibishinzwe bagahanwa. N’ubu rero hashobora kuba harimo n’abandi bashobora kuba bakorana nabo, abo nabo bazakurikiranwa kimwe n’uriya bashyikirizwe inzego zibishinzwe bakurikiranwe nk’abandi bajura bose.”

Ingingo y’166 mu Itegeko riteganya ibyaha n’ibihano muri rusange, ivuga ko Umuntu wese uhamijwe n’urukiko icyaha cyo kwiba, ahanishwa igifungo kitari munsi y’umwaka umwe (1) ariko kitarenze imyaka ibiri (2), ihazabu y’amafaranga y’u Rwanda atari munsi ya miliyoni imwe (1.000.000 FRW) ariko atarenze miliyoni ebyiri (2.000.000 FRW), imirimo y’inyungu rusange mu gihe cy’amezi atandatu (6) cyangwa kimwe gusa muri ibyo bihano.

Si ibyo bihano gusa kuko no muri REG hari ibihano biteganyirijwe uwiba amashanyarazi, aho ufashwe iyo ari umuturage usanzwe acibwa ihazabu ya miliyoni imwe y’amafaranga y’u Rwanda, ibigo bito by’ubucuruzi bigacibwa miliyoni eshatu naho ibinini bigacibwa miliyoni 10 ariko abo bose bongeraho no kwishyura umuriro wose bakoresheje udaciye muri mubazi.


INKURU ZA :
Tanga Igitekerezo
Ibitekerezo 1
Munezero Kuya 8-03-2019

Nimubaze ubwo mujura wiyita umukozi ababwire nabandi Bose yabikoreye buriya no benshi nano bahanwe.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...