konka coffee
KONKA

AMAKURU

UKWEZI
Minijust

Rwamagana: Hatashywe gare igezweho yuzuye itwaye asaga miliyoni 670 Frw

Rwamagana: Hatashywe gare igezweho yuzuye itwaye asaga miliyoni 670 Frw
12-02-2019 saa 07:30' | By Vincent Nsengiyumva | Yasomwe n'abantu 1329 | Ibitekerezo 1

Gare y’Akarere ka Rwamagana yari imaze igihe kitari gito yubakwa yuzuye itwaye akayabo ka miliyoni zisaga 670 z’amafaranga y’u Rwanda. Iyi gare yubatswe mu buryo bugezweho ifite n’umuyoboro wa Internet, yatashywe ku mugaragaro kuri uyu wa Mbere tariki 11 Gashyantare 2019.

Iyi gare yubatswe mu buryo bugezweho, yatashywe n’abayobozi batandukanye ndetse n’abaturage ba Rwamagana bayakiranye ibyishimo bidasanzwe.

Abaturage bo mu Karere ka Rwamagana bakoresha iyi gare umunsi ku munsi bavuga ko bayakiranye urugwiro nyuma y’uko bari bamaze igihe batagira aho bafatira imodoka hameze neza.

Uwitwa Mukamana yagize ati “ Twahuraga n’imbogamizi z’uko imodoka zadusigaga ahantu hatameze neza tugatega amagare cyangwa moto kugira ngo tugere kuri kaburimbo. Imvura yagwaga ikatunyagira ndetse n’izuba ryaba ari ryinshi tukabura aho turyikinga.”

Kalinganire Hassan yavuze ko bari bamaze igihe bifuza gare nziza kandi igezweho, kuko ngo aho bategeraga imodoka hari habi cyane kandi ari kure bigatuma bavunika cyane.

Yagize ati “ Iyi gare tuyakiriye neza kuko urebye aho twategeraga imodoka hari ahantu hateye ubwoba, hari nko mu gishanga. Imvura yagwaga ntaho kugama ikatunyagira tukabura uko tubigenza mu by’ukuri cyari icyifuzo cy’abaturage.”

Umuyobozi w’akarere ka Rwamagana Mbonyumuvunyi Radjab yavuze ko abaturage bari banyotewe iyi gare kuko iyo bakoreshaga yababangamiraga bitewe n’imiterere yayo ndetse n’aho yari yubatse.

Yagize ati “ Abayobozi n’abaturage twese dufite ibyishimo bitagira ingano byo kuba dutashye ibikorwa bya gare twari tumaze igihe dutegereje. Abaturage ba Rwamagana bari bafite gare idafite aho bashobora kugama izuba cyangwa imvura. Mu gihe cy’imvura urwondo rwabaga ari rwinshi mu gihe cy’izuba ivumbi rikaba ari ryose. ”

Meya Mbonyumuvunyi yakomeje avuga ko iyi gare banayitezeho kuzazamura imigenderanire n’utundi turere ndetse n’ibihugu by’ibituranyi.

Umuyobozi wa Jali Holdings yafatanyije n’akarere kubaka iyi gare, Col.Twahirwa Dodo, yavuze ko iyi gare izafasha abaturage ba Rwamagana kwagura ibikorwa byabo birimo n’ubucuruzi.

Yavuze ko hamaze kuzura icyiciro cyayo cya kabiri ngo hakaba hasigaye ikindi cyiciro kigizwe n’inzu y’igorofa y’ubucuruzi,aho ibikorwa byayo byose bizatwara akayabo k’asaga Miliyari imwe na Miliyoni Magana atatu na Mirongo icyenda (1,390,000,000).

Yakomeje avuga ko iyi gare fite akarusho ko kuzaba harimo umuyoboro wa internet yihuta izajya ikoreshwa n’abaje gutega, inzu abazajya baza gutega imodoka bazajya baruhukiramo mu gihe bategereje ko imodoka zihaguruka ndetse na televiziyo za rutura bazaba bareba mu gihe batarahaguruka.

Yagize ati “Iyi gare ikoranye ubuhanga cyane. Hazaba harimo internet buri wese ayikoresha, hazaba harimo amateleviziyo abagenzi bareba amakuru ku buryo nta mugenzi uzicwa n’irungu mu gihe ategereje ko isaha igera agahaguruka muri gare.”

Col. Dodo akomeza asaba abakoresha iyi gare kuyigirira isuku no kuyibungabunga cyane ko aribo baza ku mwanya wa mbere mubo izagirira akamaro.

Umunyamabanga wa leta muri Minisiteri y’ibikorwa remezo ushinzwe gutwara abantu n’ibintu, Uwihanganye Jean de Dieu, yashimiye ubuyobozi bw’akarere na Jali Holdings bafatanyije mu kubaka iyi gare, asaba abaturage kuyifata neza.

Ati “Abaturage turabasaba kuyifata neza mukayibyaza umusaruro, ntimukemere ko hari uwayihungabanyirizamo umutekano kandi ibikorwa remezo biyirimo mubifate neza.”

Iyi gare iherereye mu mujyi wa Rwamagana rwagati, mu murenge wa Kigabiro, yubatswe ku bufatanye bw’akarere na Jali Holding.

Iyi gare ifite umwihariko wo kubamo umuyoboro wa internet yihuta

Icyiciro cya 2 cy’iyi gare cyuzuye itwaye asaga miliyoni 670 z’amafaranga y’u Rwanda

Yatashywe ku mugaragaro n’abayobozi banyuranye barimo n’Umunyamabanga wa leta muri Minisiteri y’ibikorwa remezo ushinzwe gutwara abantu n’ibintu, Uwihanganye Jean de Dieu


INKURU ZA :
Tanga Igitekerezo
Ibitekerezo 1
Fanette Kuya 12-02-2019

Rwamagana iwacu nanjye nejejwe no kuba tubonye gare nziza
ndanezerewe rwose

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...