konka coffee
KONKA

AMAKURU

UKWEZI

Rwankuba: 18 bahitanwe n’ibiza byatewe n’imvura yo ku Cyumweru bashyinguwe

Rwankuba: 18 bahitanwe n’ibiza byatewe n’imvura yo ku Cyumweru bashyinguwe
8-05-2018 saa 16:37' | By Vincent Nsengiyumva | Yasomwe n'abantu 5343 | Ibitekerezo 2

Mu ijoro ryo ku cyumweru rishyira ku wa Mbere tariki ya 5 Gicurasi 2018, mu bice binyuranye mu gihugu haguye imvura idasanzwe ihitana abantu mu bice binyuranye ariko mu murenge wa Rwankuba muri Karongi ho ihakora amarorerwa kuko abagera kuri 18 bo mu tugari 3 bahaburiye ubuzima.

Ku gicamunsi cyo kuri uyu wa Kabiri nibwo abaturage bo muri uyu murenge wa Rwankuba, imiryango yabuze ababo ndetse n’abayobozi batandukanye barimo n’abaturutse mu nzego nkuru z’igihugu bashyinguye abantu 18 bahitanwe n’imvura yo mu ijoro ryo ku Cyumweru.

Aba bahitanwe n’iyi mvura ni abo mu tugari dutatu twa Rubazo, Gasata ndetse na Bisesero two mu murenge wa Rwankuba, abenshi bakaba baragwiriweho n’amazu bitewe n’imisozi yamanutse igatwara amazu yabo dore ko bari banaryamye kuko yaguye ari nijoro.

Ubwo abaturage bo muri uyu murenge ndetse n’ubuyobozi bari mu gikorwa cyo gushakisha abari bagwiriwe n’amazu mu muganda wo kuri uyu wa mbere, Umunyamabanga Nshingwabikorwa wa Rwankuba, Kuzabaganwa Vedaste,yatangarije Ukwezi .com ko uretse abagera kuri 18 bapfuye, hari abandi bantu 8 bajyanwe mu bitaro bakomerekejwe bikomeye n’inkangu.

Umuhango wo gushyingura abahitanwe n’imvura witabiriwe n’abayobozi bakuru barimo Minisitiri w’Intebe,Dr Ngirente Eduard, Minisitiri w’Ubutegetsi bw’igihugu Francis Kaboneka, Minisitiri w’Imicungire y’Ibiza n’Impunzi Jeanne d’Arc de Bonheur, Guverineri w’Intara y’Iburengerazuba, Alphonse Munyentwari ndetse n’ abayobozi b’ingabo na Police.

Mu butumwa Minisitiri w’Intebe yagejeje ku mbaga y’abantu bari bitabiriye umuhango wo gushyingura ba nyakwigendera, yibanze cyane mu gufata mu mugongo imiryango yabuze ababo ndetse anasaba abaturage batuye ahantu habateza ibyago ko bahimuka vuba na bwangu mu rwego rwo kwirinda amahano nk’ayabaye kuri bagenzi babo.

Si aba bantu 18 gusa bahitanwe n’imvura yo ku Cyumweru, kuko no mu murenge wa Mubuga muri Karongi haguye undi muntu ndetse no mu kagali ka Giti cy’Inyoni mu murenge wa Nyarugenge naho umukingo wagwiriye inzu y’umuryango w’abantu 8, abagera kuri 3 bagahita bitaba Imana.

Mu turere twa Rubavu, Rulindo, Nyabihu, Nyamasheke na Nyamagabe ho habaruwe abantu batanu bitabye Imana.

Guhera tariki 01 Mutarama 2018 kugeza tariki 30 Mata 2018 ibi biza byari bimaze guhitana abantu 183, iyi mibare mishya y’i Karongi na Kigali ndetse n’utu turere tundi twabaruwemo abaguye mu nkangu zatewe n’imvura yo mu ijoro ryo ku Cyumweru, iigaragaza ko abasaga 200 bamaze guhitanwa n’izi nkangu.

Abaturage bo mu murenge wa Rwankuba baherekeje bagenzi babo bahitanwe n’ibiza mu ishavu ryinshi n’agahinda


INKURU ZA :
Tanga Igitekerezo
Ibitekerezo 2
Maniraguha Kuya 9-05-2018

twihanganishije imiryango yabanyakwigendera,kd ubuyoboz bukomeze kwongera ingufu mugukangurir abaturage kuva mumanegeka.murakoze hano uganda turabakurikira!!!!

bimawuwa Kuya 8-05-2018

Hama rero abantu bakanga kwimurwa kugirirwa neza kugirango birinde ibyo bibazo nkibyo bakanga reta ishireho itegeko rikomeye ryo kubimura udashaka ajye gushaka ihandi wenyine yubaka akituza ntanguzanyo ahawe.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...