konka coffee
KONKA

AMAKURU

UKWEZI

Ubuhamya bwa Mukandayisenga wari indaya ruharwa ubu akaba amaze kwiteza imbere

Ubuhamya bwa Mukandayisenga wari indaya ruharwa ubu akaba amaze kwiteza imbere
31-05-2018 saa 09:51' | By Vincent Nsengiyumva | Yasomwe n'abantu 3736 | Ibitekerezo

Mukandayisenga Esther w’imyaka 26 y’amavuko wakoraga umwuga w’uburaya akanabifatanya n’ubusinzi ndetse no kunywa itabi, yarabiretse byose ayoboka imishinga iciriritse none ubu amaze kwiteza imbere nk’uko abishimangira mu buhamya atanga.

Mukandayisenga Esther avuka mu Murenge wa Rusororo, akarere ka Gasabo mu mujyi wa Kigali, akaba afite umwana we yabyariye mu mwuga w’uburaya.

Mukandayisenga Esther yayobotse umwuga w’uburaya afite imyaka 17, ubwo yari amaze kubona ibibazo by’amakimbirane yo mu muryango bimaze kumurenga agafata umwanzuro wo kubahunga ajya kwicuruza.

Ibi Mukandayisenga yabigarutseho mu buhamya yatangiye mu biganiro nyunguranabitekerezo umuryango ‘Humanite & Inclusion’ wahoze ari Handicap International wagiranye n’abanyamakuru, kuri uyu wa 30 Gicurasi 2018, bigamije gukumira ihohoterwa rikorerwa mu ngo.

Mukandayisenga yavuze ko mu rugo iwabo hahoraga amakimbirane, ndetse ngo ababyeyi be bahoraga bamusiganira umwe avuga ko atari uwe, maze biza kumurenga ubwo yari afite imyaka 17 maze ayoboka inzira y’uburaya.

Avuga ko uku kumusiganira kw’ababyeyi be kwatewe n’uko ngo nyina yamubyariye mu rwahukaniro, aza gusubira mu rugo afite uruhinja. Yagize ati “Natangiye ubuzima bw’uburaya kubera ubuzima bw’amakimbirane y’ababyeyi banjye. Nabonye iwacu ubuzima bunaniye kubera ko iteka ababyeyi banjye uko bwije uko bucyeye bansiganiraga.”

Yafashe gahunda yo kujya mu mujyi gushaka ubuzima, ahageze atangirira ku kazi ko mu rugo, ahamaze ukwezi kumwe abona akazi yakoraga katamukwiye maze yihuza na bagenzi be bikodeshereza inzu batangira uburaya kuva ubwo.

Yakomeje kwikorera uburaya nyuma y’imyaka ibiri bamutera inda, abona ubuzima burakomeye yigira inama yo gusubira iwabo, ariko akigerayo nibwo amakimbirane mu rugo yafashe indi ntera, maze abonye bikomeye arahava ajya kwikodeshereza.

Ati “ Nyuma y’imyaka ibiri nkora uburaya, ubwo nari mfite imyaka 19 mba ntwaye inda. Numvise ubuzima burangiye maze nigira inama yo gusubira iwacu, nkihagera mama akimbona aravuga ngo ishyano riraguye noneho amakimbirane ariyongera. Kuko ntari nzi aho mva n’aho njya byarancanze mfata gahunda yo kujya gukodesha kuko nabonaga na mama atakiryama kubera njye.”

Ubwo yaragiye abyarira muri iyo nzu, maze akomeza umwuga w’uburaya. Ati“Nagiye muri iyo nzu maze kubyara nikomereza ubuzima bw’uburaya. Ubwo umwana namusigaga aho nkigendera kuko numvaga ubuzima bwanjye n’ubw’umwana ntacyo bivuze. Ubwo naragendaga umpaye igihumbi, umpaye bibiri, umpaye menshi ntayo nasubizaga inyuma. Ninyweraga inzoga, ndetse nari maze kugera ku rwego rwo kunywa itabi kuko numvaga ubuzima narabuhaze.

Nyuma y’imyaka itari micye Mukandayisenga yibera mu buzima bw’uburaya, yaje kubwirwa ko hari umuryango witwa Handicap International uri kwandika abakobwa bakora umwuga w’uburaya, abitera utwatsi kuko we yahise akeka ko ari abashaka kubakusanya kugira ngo babajyane kubafunga.

Gusa ngo yaje kwigira inama yo kujya kureba uwo muryango uwo ari wo, agezeyo ahasanga abandi bahuriraga muri uwo mwuga, maze nawe ariyandikisha batangira guhabwa amasomo atandukanye, arimo ay’isanamitima, abakangurira kureka uburaya n’ibiyobyabwenge, abyinjiramo gutyo ariko yumva atazabishobora kubera imibereho ye n’umwana we.

Ati “Ubundi naricaraga nkibaza nti nimva mu buraya nzatungwa n’iki? Uyu mwana se we azabaho ate, nzamugaburira iki? Gusa uko bampuguraga nagendaga numva ihohoterwa icyo ari cyo, nza no kumva ko gukora uburaya mfite umwana ko naryo ari ihohoterwa mba mukorera.”

Avuga ko amahugurwa bahawe na Handicap yabagiriye umumaro, kuko byaje kurangira avuye mu buraya burundu, areka ibiyobyabwenge n’inzoga maze atangira imishinga yo kwiteza imbere.

Ati “ Ibya Handicap byagiye binyinjiramo, mva mu buraya, twishyira mu matsinda baduha umuhuza aratwigisha, duhera ku giceri cy’ijana tuza kugera ku mafaranga menshi igihe kiza kugera twiga umushinga banadutera inkunga ubu umaze gukomera.”

Mukandayisenga ubu ni umucuruzi w’ihene, yigishijwe gukora imyenda, ndetse akaba yaranatorewe kuba umujyanama w’ubuzima. Asigaye agira inama abo yasize mu buraya ndetse ngo yaranakijijwe aho asigaye aririmba muri Korali.

Mukandayisenga ahamya ko abenshi mu bakora uburaya babiterwa n’ibibazo bishingiye ku makimbirane byo mu miryango

Ashimira Handicap International yamukuye mu buzizma bubi, nawe akaba afite icyizere cy’ejo hazaza


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...