konka coffee
KONKA

AMAKURU

UKWEZI

Umunyamakuru Sandrine Isheja ashengurwa n’uko atazi aho Se wishwe muri Jenoside yashyizwe

Umunyamakuru Sandrine Isheja ashengurwa n’uko atazi aho Se wishwe muri Jenoside yashyizwe
23-04-2018 saa 10:49' | By Vincent Nsengiyumva | Yasomwe n'abantu 6954 | Ibitekerezo 1

Umunyamakuru umaze kwamamara cyane mu biganiro by’imyidagaduro kuri amwe mu maradiyo akomeye mu Rwanda, Sandrine Isheja, n’intimba nyinshi, yagaragaje ko azahora yibuka umubyeyi we wishwe muri Jenoside yakorewe Abatutsi muri Mata 1994, anagaragaza ko umuryango we ugiterwa agahinda no kuba bataramenya amakuru y’aho abamwishe bamujugunye ngo bahamukure maze bamushyingure mu cyubahiro.

Kuwa Gatandatu tariki 21 Mata nibwo Umunyamakuru Sandrine Isheja ukora kuri Radio Kiss FM, yanditse amagambo yuzuye ishavu n’agahinda ku rubuga rwa Instagram, aho yibukaga Se umubyara witwa Dr Butera Guillaume wishwe muri Jenoside yakorewe Abatutsi ku itariki nk’iyi muri Mata 1994.

Mu magambo ye, Sandrine Isheja yavuze ko umubyeyi we witwaga Dr Butera Guillaume yiciwe i Nyanza ya Butare aho yari yahungiye, gusa ngo umuryango we ukaba ugishengurwa bikomeye n’uko kugeza magingo aya utarabona aho umubiri we wajugunywe ngo nabo bamushyingure mu cyubahiro baruhuke.

Yagize ati “Uyu munsi ndibuka data wambyaye , Dr Butera Guillaume, wishwe muri Jenoside yakorewe Abatutsi. Yiciwe i Nyanza ya Butare aho yari yahungiye. Kugeza ubu ntiturabona umubiri we ngo tumushyingure mu cyubahiro turuhuke.”

Sandrine yakomeje avuga amagambo asa n’uri kuganira n’umubyeyi we aho yamubwiraga ko abo yasize bameze neza kandi ko bakuze, anamusezeranya ko aho atari bazahamubera.

Ati “ Papa, iruhukire mu mahoro.Twarakuze…turubatse…twarabyaye. Amashami yarashibutse. Izina ryawe ntirizibagirana. Dukomeje kusa ikivi wasize. Intimba tugendana ku mutima ntizashira gusa ubuzima burakomeje.”

Dr Butera Guillaume wabyaraga Sandrine Isheja yishwe muri Jenocide yakorewe Abatutsi muri Mata 1994

Sandrine Isheja yasoje ubutumwa bwe ahumuriza abasigaye ari incike babigizwe na Jenoside yakorewe Abatutsi mu 1994, abatarabashije gushyingura ababo ndetse n’abacitse ku icumu muri rusange, abasabira gukomeza kubaho kandi neza.

Ati “Impore wowe wasigaye wenyine. Ihorere wowe utarabashije gushyingura abawe, Komera wowe wacitse ku icumu, duharanire kubaho kandi neza. Kongera kubaho nibwo butwari.”


INKURU ZA :
Tanga Igitekerezo
Ibitekerezo 1
jojo joliji Kuya 23-04-2018

Ihangane intimba yacu tuzahumurizwa n’Imana. Isheja we komera dukomerane.

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...