konka coffee
KONKA

AMAKURU

UKWEZI

Abafite ubumuga bwo kutabona barashinja abatwara ibinyabiziga kutaborohera igihe bambuka imihanda

 Abafite ubumuga bwo kutabona barashinja abatwara ibinyabiziga kutaborohera igihe bambuka imihanda
24-10-2018 saa 16:08' | By Jean Claude Habimana | Yasomwe n'abantu 593 | Ibitekerezo

Abafite ubumuga bwo kutabona mu Rwanda bavuga ko bagihangayikishijwe n’abatwara ibinyabizina batabaha umwanya igihe bambuka umuhanda nyamara baba babona ko bafite Inkoni Yera.

Ibi byagarutsweho kuri uyu wa Gatatu tariki ya 24 Ukwakira 2018 Ubwo hizihizwaga umunsi mpuzamahanga w’Inkoni Yera ku nshuro ya cumi mu Rwanda, mu muhango wabereye mu Murenge wa Ndora mu Karere ka Gisagara.

Uyu muhango watangijwe n’urugendo rw’ibihumbi by’abantu bifatanyije n’abafite ubumuga bwo kutabona rwatangiriye ku biro by’Umurenge wa Ndora rusorezwa ku biro by’Akarere ka Gisagara.

Bamwe mu bafite ubumuga bwo kutabona baganiriye n’ikinyamakuru Ukwezi.com bavuga ko aho u Rwanda rugeze mu gushyigikira abantu bafite ubumuga bwo kutabona ari heza nubwo hakiri imbogamizi.

Uwambayeneza Eugenie wagize ubumuga bwo kutabona ageze mu mwaka wa Gatatu w’amashuri yisumbuye avuga ko Inkoni Yera yamubereye amaso n’umutima, ariko akaba ababazwa n’abatwara ibinyabiziga batareka umuntu ufite Inkoni Yera ngo yambuke atabanje kurindira ko imodoka zirangira.

Yagize ati “Muri iki gihe ibinyabiziga byabaye byinshi ku buryo bigorana kwambuka umuhanda nubwo waba ufite inkoni yera. Abashoferi nta mpuhwe bagirira umuntu ufite ubumuga bwo kutabona iyo ashaka kwambukaumuhanda.”

Umutesi Liliane nawe wagize ubumuga bwo kutabona afite imyaka icumi, yagize ati “Iwacu mu karere ka Kicukiro umubare munini w’abatwara ibinyabiziga nta gaciro baha umuntu ubana n’ubumuga bwo kutabona niyo yaba afite inkoni yera.”

Ingabire Severin, Umujyanama muri komite nyobozi y’Ubumwe Nyarwanda bw’Abatabona(RUB), yavuze ko ubusanzwe abafite ubumuga bwo kutabona ntaho babasha kubona izi Nkoni hirya no hino mu Rwanda nkuko izindi nsimburangingo ziboneka kwa muganga hifashishijwe Mituelle de Sante.

Ubusanzwe Inkoni Yera igura amafaranga y’u Rwanda ari hagati ya 25000 na 30000

Mu Rwanda habarurwa abafite ubumuga bwo kutabona bagera 57312 nk’uko bigaragazwa n’ibarura ryakozwe mu mwaka wa 2012, nubwo iyi mibare ngo ishobora kuba irenga bitewe n’ababyeyi cyangwa imiryango igikomeje guhisha abana babo mu mazu ndetse n’abakomeje kugira ubumuga bwo kutabona bitewe n’impamvu zitandukanye.

Umuyobozi Mukuru w’Ubumwe Nyarwanda bw’Abatabona (RUB);Dr Suubi Patrick, akaba n’umwalimu muri Kaminuza y’u Rwanda, avuga ko muri bimwe umuryango uri gukora harimo no gushishikariza abatwara ibinyabiziga gusobanukirwa n’iyi Nkoni Yera ku bufatanye n’inzego z’umutekano.

Umudepite uhagarariye abafite ubumuga mu Nteko Ishingamateko, Musolini Eugene, avuga ko nyuma yo kubona akamaro k’iyi nkoni, ngo hari icyo leta y’u Rwanda iri gukora kugira ngo ziboneke mu gihugu hose kandi bicishijwe muri Mituelle de Sante.

Ku kibazo cy’abambuka imihanda bigoranye, uyu mudepite yavuze ko hari ingamba zashyizweho zizajya zituma abafite ubu bumuga boroherezwa kwambuka umuhanda bitagoranye.

Umunsi mpuzamahanga w’inkoni yera wizihizwa tariki ya 15 Ukwakira ku isi hose. Mu Rwanda uyu munsi ukaba utegurwa n’Umuryango w’Ubumwe Nyarwanda bw’Abatabona, aho uyu mwaka bahisemo kuwizihiza tariki ya 24 Ukwakira 2018.

Abafite ubumuga babanje gukora urugendo

Depite Eugene Musolini uhagarariye abafite ubumuga mu Nteko


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...