AMAKURU

UKWEZI
ubumwe

Abasigajwe inyuma n’ amateka b’ ababumbyi iterambere ryabo ryaragonze bakeneye dépannage

Abasigajwe inyuma n’ amateka b’ ababumbyi iterambere ryabo ryaragonze bakeneye dépannage
9-10-2019 saa 20:05' | By Nsanzimana Ernest | Yasomwe n'abantu 1422 | Ibitekerezo

Abasigajwe inyuma n’ amateka bakora akazi ko kubumba imbabura, ibibindi n’ inkono muri iki gihe bugarijwe n’ ikibazo cyo kubura abakiriya b’ ibyo bakora bigatuma imibereho yabo irushaho kuba mibi.

Abaganiriye na UKWEZI batuye mu midugudu itandukanye mu karere ka Huye. Icyo bahurizaho ni uko iterambere ryo kuba Abanyarwanda basigaye batekera kuri gaze cyangwa ku mbabura z’ ibyuma, bakanatekera mu masafuriya aribyo bituma inkono n’ imbabura babumba bitakibona abakiriya nka mbere.

Barasaba Leta ko yabafasha kongera ubumenyi mu bijyanye no kubumba bagakora ibikoresho bijyanye n’ iterambere igihugu kigezeho, abandi bakayisaba ko yabafasha kwiga indi myuga itari ukubumba.

Nyiransabimana Joselyne utuye mu mudugudu wa Nyanza Akagari ka Rukira mu murenge wa Huye amaze igihe kinini akora umurimo wo kubumba ariko ngo muri iyi myaka abakiriya barabuze kubera iterambere ry’ amasafuriya.

Agira ati “Impamvu imbabura n’ inkono dukora bitakibona abakiriya abenshi bifitiye amasafuriya. Hanabayeyo ikintu cy’ ubucuzi bafite Imbabura z’ ibyuma”

Uyu mubyeyi w’ abana babiri yifuza ko yakongererwa ubumenyi akagira ubushobozi bwo gukora imbabura z’ ibyuma n’ ibumba. Avuga ko imbabura z’ ibumba gusa iyo bazijyanye mu isoko baraziriranwa ntibabone ubagurira.

Imbabura y’ icyuma n’ ibumba igura 1500 mu gihe Imbabura ikoze mu ibumba gusa igura amafaranga 200 cyangwa 150.

Nyiransabimana Yvonne we avuga ko akazi kabo ari imvune gusa kuko kugira ngo abumbe inkono z’ amafaranga 1000 bimutwara icyumweru cyose bitewe n’ uko aho bakura ibumba ari kure cyane.


Ibumba rirabavuna cyane kuko barikura kure

Yagize ati “Kugira ngo inkono iboneke uragenda ukazana ibumba ukaripfuka, bugacya mu gitondo ugasubirayo ukazana itsibo(imicanga bavanga n’ ibumba), ugakata, hari n’ igihe ubibumba nk’ uku bigaturagurika ugatahira imvune ntakintu ukuyemo cyakagutunze. Nk’ ubu iyo ngiye I Mbazi nkazana ibumba rivamo inkono ebyiri zihwanye na 400, ejo ngasubirayo nkazana irindi rikavamo imbabura 2 za 400 hari igihe mbyotsa bigaturagurika. Nkazagira igihe cyo kubumba, no gutegereza bikuma nkabona kubitwika”

Uyu Munyarwandakazi avuga ko kugira ngo azane ibumba akora urugendo amasaha 3. Ku munsi wo kugurisha ngo hari igihe azikorera akirirwa azizengurukana ntihagire umugurira akongera akazitahana cyangwa akazibitsa. Icyo gihe ngo abana baraburara.

Mutungirehe Emmanuel avuga ko abumba inkono yizeye ko azabonamo ubwisungane mu kwivuza yazazitwika zigaturagurika, izisigaye zikabura abaguzi. Uyu mugabo w’ imyaka 36 asaba Leta yo yamufasha akiga umwuga w’ ubusuderi.

Ati “Nk’ inkono 30 ndazotsa zigaturagurika singire n’ igiceri cy’ atanu nkuramo. Nkiyotsa nkiyokora ya mituelle nazigamaga nkayibura, umwana wange akaburara uwo munsi, umugore wange akaburara.”

Akomeza agira ati “Leta nimfashe mbone umwuga w’ ubusuderi, kuko umwuga wo kubumba inkono ntacyo uzangezaho. Kuva na kera kose ntacyo wigeze utumarira”.


Emmanuel Mutungirehe avuga ko imyaka bamaze babumba nta terambere babikuyemo

Aba baturage basigaye inyuma bavuga ko Leta ibafashije kwiga imyuga cyangwa bagafashwa kugira ubumenyi bwo kubumba ibikoresho bigezweho batakomeza gutegera Leta amaboko ko ahubwo nabo bagira uruhare mu kwiteza imbere.

Umuyobozi w’ akarere ka Huye Ange Sebutege ashima ko aba baturage bagize ishyaka ryo kugaragariza itangazamakuru icyo babona bakorerwa imibereho yabo igatera imbere babigizemo uruhare.

Yagize ati “ Ni igitekerezo kiza kuba barabagejejeho ubutumwa ko bumva hari ibindi byakorwa byabateza imbere, ngira ngo muri iki gihugu hari gahunda zitandukanye ziteza imbere abaturage kandi zitanga amahirwe angana kuri buri muturage wese, inshingano z’ubuyobozi n’ukwegera abaturage barimo n’abo muri icyo kiciro no kureba icyo twafatanya na bo.”

Uyu muyobozi avuga ko umwaka ushize bakoze igenzura aho basuraga buri rugo bareba uko abaturage babayeho abaturage bakagaragaza icyo bumva bakorerwa kugira ngo bagere ku iterambere, amakuru batanze akaba azaherwaho mu kubasha.

Yagize ati “ Ntekereza ko aya makuru niba barayatanze nk’uko namwe babibabwiye bakagaragaza inyota ya buri muntu wese icyo azafashwa, muri uyu mwaka w’imihigo dufite abantu bari mu bukene bukabije tuzafasha muri iki gikorwa tukagenda tureba icyo buri wese yagiye yifuza noneho akaba yafatanya n’abandi Banyarwanda kwiteza imbere.”

Yvonne Musabyimana , Umuyobozi w’ umuryango nyarwanda utari uwa Leta uharanira inyungu n’iterambere ry’ababumbyi yatangarije UKWEZI ko bagiye bakora za Koperative noneho bagahugura abanyamuryango ku bubumbyi bwa kijyambere. Avuga ko mu ma koperative bahunguye harimo iya Kacyiru, Muhanga,Rulindo ,Nyaruguru,Nyanza.

Ati"[Koperative zafashijwe zarakomeye ubu binjiza amafaranga menshi bakabasha kwikemurira iby’ ibanze nko kwishyurira abana amashuri,kurya kwiyambika n’ ibindi"

Uyu muyobozi avuga ko barimo gushaka abaterankunga kugira ngo babashe guhungura andi makoperative batarabasha kugeraho.


Mbere yo gutwika ibyo babumbye barategereza bikuma

Byinshi mu byo baba babumbye iyo babitwitse biraturika


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...