konka coffee
KONKA

AMAKURU

UKWEZI

Abimuwe ahari guhingwa icyayi ntibavuga rumwe n’ubuyobozi ku mibereho yabo

Abimuwe ahari guhingwa icyayi ntibavuga rumwe n’ubuyobozi ku mibereho yabo
21-09-2018 saa 18:56' | By Vincent Nsengiyumva | Yasomwe n'abantu 1646 | Ibitekerezo 1

Abaturage bo mu murenge wa Rugabano, akagari ka Gitega mu Karere ka Karongi, bimuwe aho bari batuye hakaba hari guhingwa icyayi, baravuga ko ubuzima butameze neza nyuma yo gutuzwa mu midugudu bakaba batakigira ahantu bahinga imyaka ibatunga. Ibi ariko siko ubuyobozi bubibona, aho bugaragaza ko abimuwe bahawe ingurane y’inzu zo kubamo n’amafaranga.

Bamwe muri aba baturage baganiriye n’ikinyamakuru Ukwezi.com bavuga ko batishimiye ubuzima babayemo nyuma yo kwimurwa mu masambu yabo, ngo kuko kubaho badafite aho bahinga ibibatunga bigoranye cyane.

Bavuga ko bagomba kurya ari uko bafite amafaranga mu gihe mbere baryaga kumyaka babaga bejeje mu mirima yabo.

Uwitwa Mukamurenzi watujwe muri uyu mudugudu avuga ko ubuzima bwatangiye kubagora mu mezi agera kuri ane bamaze muri uyu mudugudu.

Yagize ati “ Natungwaga n’ibyo nahingaga mu murima wanjye, none ubu wabaye uwa leta bari kuwuhingamo icyayi.Ibyo kurya ubu ni ibibazo.”

Akomeza avuga ko n’ubwo badafite aho bahinga, ngo barashima aho bimuriwe ngo kuko babakuye mu manegeka babatuza mu mazu agezweho arimo amazi n’umuriro.

Uwitwa mubyeyi w’abana 5 avuga ko batarimurwa bari bafite aho guhinga, badasabwa guhaha byinshi kuko bimwe babaga barabyejeje.

Yagize ati “Ubu buzima ntabwo ari bwiza, Leta yadushakira imirimo nk’ abadamu kuko iyo ntagiye mu cyayi nirirwa nicaye nabuze icyo nkora.Mbere nibwo nari mbayeho neza ngifite isambu yanjye nanone barayijyanye”

Abaturage bimuriwe mu mudugudu w’icyerekezo ni abakuwe mu gace kari gukorerwamo umushinga w’icyayi, ahari ibice bibiri,ikiri kubakwamo uruganda ruzajya rutunganyirizwamo icyayi ndetse n’igice kizahingwamo icyayi.

Uhagarariye ibikorwa by’uyu mushinga wiswe Rugabano Tea Company, Frank Rwubuzizi yavuze ko uyu mushinga ugamije kuzamura ubuhinzi bw’icyayi ndetse no gutanga akazi ku baturage ba nyakabyizi, aho abagera ku bihumbi bine bakora muri uyu mushinga.

Umuyobozi w’ Akarere Ka Karongi Ndayisaba Francois avuga ko aba baturage batazicwa n’ inzara kuko bahawe ingurane y’amafaranga n’amazu meza yo kubamo, kandi hakaba hari hegitari 40 basigiwe ngo banyirazo bakomeze bazihinge

Yagize ati “Ariya mazu yubatswe ku bufatanye bw’akarere na NAEB, abaturage bahabwa ingurane z’ubutaka abari bafite hanini bahabwa n’amafaranga. Muri kiriya gice, hari n’ubutaka buzasigara ari ubw’abaturage. Hegitari zigera muri 40 bazajya bahinga ndetse hari na gahunda yo kuzabaha inka,"

Akomeza avuga ko kandi muri uwo mushinga w’icyayi hatangwamo imirimo, bikaba biri mu bizafasha aba baturage kubona akazi kazabafasha mu mibereho yabo.

Izi nzu zahawe abaturage bimuwe ahari guhingwa icyayi, buri imwe ifite agaciro k’amafaranga y’u Rwanda miliyoni 12.

Abamaze kwimurirwa muri uyu mudugudu w’icyitegererezo ni imiryango 140, hakaba hari icyiciro cy’imiryango 40 cy’abazimurwa vuba aha ndetse n’icyiciro cya gatatu cy’abandi bazubakirwa amazu ageretse (etage) ku buryo abantu 328 bose bazahabwa amazu yo kubamo.

Aha niho himuwe abaturage ubu hari guhingwa icyayi

Inzu abaturage bimuriwemo

Umuyobozi w’ Akarere Ka Karongi Ndayisaba Francois avuga ko abaturage bazabyungukiramo kuko bahawe ingurane ndetse bakaba bafite amahirwe yo kubona akazi mu mushinga w’icyayi wabegerejwe


INKURU ZA :
Tanga Igitekerezo
Ibitekerezo 1
yeah Kuya 22-09-2018

simbona murimumidugudu igezweho muzarya ayo mazu ahari ariko leta kiba ishaka inyungu zayo nubwo ituvugira wagizengo harimpuhwe itugirira ntazo icyambere nukubaho ifite imieire naho ayomaterambere amaze iki inzara inuma abaturage inzara igiye kuturangiza ngamaterambere

English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...