AMAKURU

UKWEZI
ubumwe

Aborozib’ingurube bahangayikishijwe no kubura ibyo bazigaburira

Aborozib’ingurube bahangayikishijwe no kubura ibyo bazigaburira
17-11-2019 saa 11:38' | | Yasomwe n'abantu 856 | Ibitekerezo

Bamwe mu borozi bibumbiye mu ishyirahamwe RPFA(Rwanda Pig Farmers Association), bavuga ko bahangayikishijwe n’ uko mu Rwanda nta nganda zikora ibyo kurya by’amatungo bihagije, bigatuma ufite ingurube nyinshi ahura n’ikibazo cyo kuzibonera ibiryo.

Ibi byagarutsweho ubwo abagize iri shyirahamwe ryakoraga urugendo shuri risura aborozi b’ingurube bo mu karere ka Rubavu, hagamijwe kurebera hamwe uko ubworozi bw’ingurube bwakongererwa agaciro binyuze mu gucuruza inyama z’ingurube yaba mu gihugu imbere no hanze yacyo

Umwe mu borozi bo mu murenge wa Ntarama Akarere ka Bugesera Niyoyita Peace, yavuze ko isoko ry’ingurube rihari ariko ngo kubera ko ibiryo bigihenze biragoye kugira ngo umworozi yorore umubare w’ingurube yifuza.

Yagize ati: “ Kugeza ubu mfite ingurube zisaga 300 kandi n’isoko riraboneka cyane,ariko kuri ubu turacyahendwa cyane n’ibiryo byazo , ikindi abakomisiyoneri nibo bakishyiriraho ibiciro. Nshingiye ko nka njye ingurube imwe ihagaze ikilo bampa amafaranga 1400, bagera hano Rubavu bakagurisha 2200, twifuza ko ishyirahamwe ryacu ryazashyiraho amategeko, kuko ibiryo kuri ubu byazamutse, aho ubu ibyitwa ‘buranda’ cyavuye ku mafaranga 110, ubu kikaba kigeze kuri 280, kandi igiciro cy’inyama z’ingurube ntikizamuka,Leta nidufashe ishyireho amategeko agena ibiciro bihamye ku musaruro w’ingurube nk’uko byagenze ku mata”.

Mutangana Jean Baptiste umaze imyaka 4 yoroye ingurube mu karere ka Rubavu avuga ko korora ingurube ubusanzwe ari umushinga wunguka, gusa ngo ikibazo gihari ni uko ibiryo byazo byahenze.

Agira ati “Mu by’ukuri ni umushinga wunguka kuko isoko rirahari n’iyo nashaka kugurisha ingurbe 20 ku munsi nabona abazigura ariko ikibazo tugifite kugeza ubu ni ikibazo cy’ibiryo byazo, kuko mbere twaguraga ibyo kurya ikilo ku 150 ariko ubu kigeze kuri 300 cyangwa 350. Urumva rero ko bigenda bizamuka cyane kandi nabwo ntitubibone bihagije. Dukeneye ba rwiyemezamirimo bashyiraho inganda zikora ibyo kurya by’amatungo cyangwa natwe ishyirahamwe ryacu tukazareba uko twakwishyiriraho uruganda rubitunganya".

Ukuriye ishyirahamwe ry’aborozi b’ingurube mu Rwanda RPFA Shilimpumu Jean Claude, avuga ko batangiye kuganira na zimwe mu nganda zikora ibiryo by’ingurube hagamijwe gukemura iki kibazo, anasaba aborozi kwibumbira mu mashyirahamwe y’aborozi kugira ngo bajye bamenya amakuru.

Yagize ati “Byagaragaye ko ingurube ari itungo ritanga umusaruro vuba kandi risaba urwuri ruciriritse, ubu rero twiyemeje kwishyira hamwe kugira ngo koko dukemure ibibazo bitwugarije , tubone uruvugiro, nk’ubu dufite ikibazo k’ibiribwa byazo bigenda biba bike, turimo kuganira n’inganda zibikora kugira ngo bagabanye ibiciro, ariko tunasaba aborozi kwibumbira mu mashyirahamwe y’aborozi kugira ngo bajye bamenya amakuru ku biciro, ikindi ni ikibazo cy’amasoko, kugira ngo duhangane n’abamamyi”.

Kugeza ubu mu gihugu hose habarurwa ingurube 1.700.000 , iyi mibare ikaba itangwa n’ishyirahamwe RPFA ,aho rivuga na none ko kugeza ubu uyu mubare ukiri muto cyane, bagasaba ko nibura buri muryango wakwiye kugira nibura ingurube zigera kuri eshanu kugira ngo bahaze isoko.

Isoko rinini ry’ingurube mu Rwanda riri mu gihugu cya Kongo Kinshasa aho hinjira buri munsi ingurube zisaga 100 zimaze ku bagwa. 99% by’inyama u Rwanda rwohereza mu mahanga byose bijya mu gihugu cya Kongo , ni ukuvuga inyama z’inka , ingurube , ihene , inkoko n’ibindi.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...