konka coffee
KONKA

AMAKURU

UKWEZI

Dr Byamungu n’abana be bane basezeweho bwa nyuma mu gahinda n’ishavu ryinshi

Dr Byamungu n’abana be bane  basezeweho bwa nyuma mu gahinda n’ishavu ryinshi
12-01-2019 saa 13:22' | By Nsanzimana Ernest | Yasomwe n'abantu 7056 | Ibitekerezo 8

Ni agahinda n’amarira menshi ku mbaga y’abasezeye bwa nyuma no gushyingura Dr Byamungu Livingstone n’abana be bane baguye mu mpanuka mu mpera z’umwaka ushize ubwo bari batashye ubukwe muri Uganda.

Umuhango wo kubasezeraho wabaye ku wa 12 Mutarama 2019. Watangiriye mu rugo rwe ruri mu Murenge wa Kimironko mu Bibare, ukomereza mu rusengero rwa St. Peter i Remera.

Dr Byamungu Livingstone wari Umuyobozi w’Ishami rishinzwe Ishoramari muri BRD n’abana be baherekejwe n’abantu benshi harimo n’abayobozi mu nzego za Leta n’abikorera ku giti cyabo.

Baguye mu mpanuka yashegeshe benshi, yabaye mu ijoro ryo ku wa 30 Ukuboza 2018, mu Karere ka Lwengo mu muhanda Masaka-Mbarara ahitwa Cyazanga, ubwo bari batashye ubukwe bw’umuvandimwe.

Abari muri iyi modoka ni Dr Byamungu Livingstone, umugore we Mukagatare Dorcas n’abana babo ndetse na musaza w’umugore we akaba ari nawe wari uyitwaye.

Dr Byamungu n’abana be Ngabo, Nziza, Manzi n’umukobwa wari bucura witwa Uwera bahise bitaba Imana, umugore we Mukagatare na musaza we barayirokoka ariko barakomereka bikomeye.

Muri aba bana harimo impanga Nziza Caleb na Ngabo Calvin bavutse ku wa 17 Mata 2001; Manzi Carl wavutse tariki 14 Mutarama 2003 na mushikiwabo wabo Uwera Bless wabonye izuba tariki 13 Mutarama 2014.

Mukagatare ubu uri kugendera mu kagare kubera imvune yagize ari mu baherekeje umugabo we Dr Byamungu n’abana babo bane.

Abaguye mu mpanuka bashyinguwe mu irimbi rya Rusororo.

Dr Byamungu n’abana be bose basezeweho bwa nyuma

Amwe mu mateka ya Dr Byamungu

Dr Byamungu yavukiye Uganda tariki 2 Gicurasi 1968. Amashuri abanza n’ ayisumbuye yayigiye muri Uganda. Icyiciro cya mbere cya Kaminuza yacyigiye muri Kaminuza ya Makerere mu Ishami ry’Ubuvuzi bw’Amatungo akomereza mu Bwongereza muri Kaminuza ya Cardiff mu bijyanye n’Ubukungu n’Ishoramari.

Tariki 21 Kanama 1999 nibwo yashakanye na Mukagatare Dorcas mu birori byabereye mu Mujyi wa Kigali.

Dr Byamungu yakoze imirimo itandukanye kuva mu 1994 harimo mu rwego rw’abikorera n’urwa Leta. Yari umugabo witangira umuryango we kandi agakunda akazi.

Basomewe misa yo kubasabira


INKURU ZA :
Tanga Igitekerezo
Ibitekerezo 8
dada Kuya 13-01-2019

Baravuga ngo akaje karemerwa,ariko kubyakira biragoye nibaza kumubyeyi wasigaye arincike bikandenga

karekezi john Kuya 13-01-2019

RIP my dear friend Byamungu.Ababanye nawe twese dushenguwe n’agahinda gakomeye.Yali inshuti yanjye,twarabanye kandi twarakoranye.Yagiraga umutima mwiza cyane.Ntabwo ari ukumurata,niko bimeze.Jyewe nk’umukristu,mwifurije kuzazuka ku munsi wa nyuma Imana ikamuha ubuzima bw’iteka.Ni Yesu ubwe wabivuze muli Yohana 6:40 yuko abizera Imana kandi bakayishaka izabazura.Tujye dushaka Imana cyane tugihumeka,ntitugahere gusa muli shuguri,akazi,politike,etc…Turapfa tukabisiga.

Hadjat Asiya Kuya 13-01-2019

Allah akbar

claudine Kuya 12-01-2019

Nukuri uretse kwibuka abacu bashize muri genocide y’abatutsi ya 94, nubwa mbere nabashije kugira umubabaro ungana gutya, nubwo kuva le 30/12/018 tuwusangiye n’umuryango, inshuti nabandi bose bakundaga dr Livingstone family. Nyagasani Imana atubabarire aho ibi byago byaduteye gucumura kdi igikuru abe hafi ya Dorcas usigaye ari inshike, anakire mube uyu mu papa ujyanye n’abana be bose

fifi Kuya 12-01-2019

Ibi bintu biragoye kubyiyumvisha kuko birarenze.Jye ubwanjye byarandenze.Imana ibakire mu bayo kandi ihe uyu munyeyi kwihangana nubwo bigoye.Imana yaramusize ngo azabare inkuru yanga ko kwa Dr Byamungu hazima burundu.Tujye duhora twiteguye kuko tutazi umunsi n’isaha.Izahanagura ikitwa amarira cyose ku maso yabo n’urupfu rwoye kuzongera kubaho ukundi.Icyunamo,amaganya n’imibabaro ntibizongera kubaho ukundi,kuko ibya kera byose birangiye.Dore ingoro y’Imana mu bantu,izabana na bo, bazaba abantu bayo,Imana na yo ibane na bo.

Dad Kuya 12-01-2019

Imana yo mwijuru ikomeze absigaye.
Dorcus kurusebngero yahabonetse rwose yafashe n’ijambo ryo gusezera ku bana numugabo we.

Imana ishimwe ko ikimwambitse imbaragazo gukomera.

Dad Kuya 12-01-2019

Imana yo mwijuru ikomeze absigaye.
Dorcus kurusebngero yahabonetse rwose yafashe n’ijambo ryo gusezera ku bana numugabo we.

Imana ishimwe ko ikimwambitse imbaragazo gukomera.

rosa Kuya 12-01-2019

Mana yo mwijuru ibibintu biragoye kubyakira pe gusa Imana ibakire mubayo

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...