AMAKURU

UKWEZI
ubumwe

Abavuga ko babujijwe kugeza ikibazo kuri Perezida Kagame bati ‘naturenganure Rwandatel igiye kudutwara amasambu’

Abavuga ko babujijwe kugeza ikibazo kuri Perezida Kagame bati ‘naturenganure Rwandatel igiye kudutwara amasambu’
28-09-2019 saa 15:25' | By Nsanzimana Ernest | Yasomwe n'abantu 4161 | Ibitekerezo

Ni imiryango itanu yo mu murenge wa Tumba akarere ka Huye, yarezwe na Rwandatel ivuga ko abo baturage bigabije ubutaka bwayo. Mu nkiko zibanza aba baturage batsinze Rwandatel ikomeza kujurira igera mu rukiko rw’ ikirenga rwanzura ko abaturage batsinzwe.

Abaturage bavuga ko nta ngingo igaragaza impamvu batsinzwe kuko ubutaka Rwandatel ibashinja kwigabiza ari ubwo barazwe n’ ababyeyi babo. Hakiyongera ko kuba Rwandatel itagaragaza urwandiko rw’ ubugure ahubwo ikerekana icyagombwa ‘titre de propriete’ yatanzwe muri 2003.

Abaturage bafite impungenge kuri iyi titre de propriete kuko batumva ukuntu Rwandatel yaba yarabonye icyangombwa kigagaza kandi itagaragaza uko yabubonye.

Muri 1982, nibwo Minisiteri y’ ubwikorezi n’ itumanaho ‘MINITRANSCO’ yashyize umunara w’ itumanaho muri uyu murenge wa Tumba. Mu 1993 Leta y’ u Rwanda yashyizeho ikigo cy’ itumanaho Rwandatel, gihabwa gucunga uwo munara wubatswe mu 1982.

Muri 2002 Rwandatel yari ikigo cya Leta y’ u Rwanda yeguriwe abikorera ku giti cyabo banahabwa ibyo icyo kigo cyari gitunze. Nyuma Rwandatel iza guhagarara.

Habyarimana Vincent , Umuhungu wa Ntugugu André avuga ko mu 1982 MINITRANSCO yaguze na se ahantu bari batuye aho iguze ihashinga borune zigaragaza ko habaye mu butaka bwa Leta. Uyu muhungu ngo yatunguwe n’ uko muri 2010 Rwandatel yavuze ko n’ inyuma y’ izo borune zigaragaza ubutaka bwa Leta ari ahayo.

Ati “Ikigaragaza ahabo ni uko bahakorotiriye bahashinga na borune. Nyuma naje gutangazwa n’ uko bavuga ngo n’ inyuma y’ uruzitiro ni ahabo kandi hatarigeze haba ahabo kuko iyo haza kuba ari ahabo baba barakorotiriye hose”.



Rwandatel ivuga ko kuva ku munara kugera ahashinze ibyumba bifashe umunaro hose ari ahayo, abaturage nabo bati ’aya masambu ni gakondo yacu kandi ntabwo Rwandatel yigeze ihagura

Musabyemariya Jeannette,umwe mubo Rwandatel yashoye mu manza avuga ko mu 1982 Rwandatel yaje aho batuye mu kagari ka Gitwa igura agasambu gato igashingamo umunara, ifata imigozi miremire ifite metero zirenga ijana iyicisha mu kirere iyifatisha mu mirima y’ abaturage kugira ngo ifate uwo munara utazahirima.

Ati “Rwandatel yashoje urubanza rwo kuterega muri 2010 ngo twayitwariye ubutaka kandi twebwe ubutaka ni kavukire. Mu 1982 baraje bagura akantu gatoya bashinzemo anteni, imigozi bagenda bayitera impande n’ impande, baratubwira ngo ubutaka nta kibazo tuzakomeza duhinge nk’ uko twari dusanzwe duhinga kandi koko twakomeje guhinga. Muri 2010 dushiduka Rwandatel yatureze”.

Musabyemariya yibaza impamvu Rwandatel yareze abantu bafite amasambu inyuma y’ uruzitiro rw’ umunara ivuga ko aho imigozi ifashe hose ari ahayo , yarangiza ntirege abaturage bafite ingo zishizemo ibyuma biziritseho imigozi ifashe umunara.

Abarezwe ni imiryango 5: Ntugugu André uhagarariwe n’ umuhungu we Habyarimana Vincent, MAHEREZO Rosalie uhagarariwe n’ umukobwa we NYIRAMINANI Claudine, Dufitumuvugizi Gerard uhagarariwe na Niyonteze Marie Claire, KAVUMBUTSE Jacques uhagarariwe na Murara Jaques ndetse n’ umuryango wa MUSONERA Jean Damascene(waguze isambu n’ umuturage).


Aha Musonera Jean Damascene yerekanaga ahashinze borune avuga ko ariho ubutaka bwa Rwandatel bugarukira

Abaregwa bavuga ko Rwandatel yaguze agasambu gato, irangije ishinga imigozi mu masambu yabo ku gahato.

Habyarimana avuga avuga ko ikindi kintu kigaragaza ko aho iyo migozi inyura n’ aho ishinze atari mu isambu ya Rwandatel ari uko nyirasenge KANKINDI yatwitse iyo migozi kuko Leta yayishinze mu isambu y’ umuryango nta bugure bubayeho.

Habyarimana avuga ko atazi niba Rwandatel yarandikiranye na se ku gasambu ka metero kare nk’ 10 yaguze kuko byabaye akiri muto.

Avuga ko agasambu Rwandatel yaguze ari agashizemo umunara gusa. Ahashinze umunara niho se wa Habyarimana Vincent yari atuye. Leta yamaze kuhagura yimukira hepfo yaho none n’ aho yimukiye uyu munsi Rwandatel ivuga ko ari ahayo.



Aba ni bamwe mu baregwa

Akibaza ati ‘Niba Rwandatel yari yaguze inyuma y’ ahashinze umunara ni gute yemereye Papa kwimukira mu isambu yayo?’.

Abarezwe na Rwandatel bavuga ko nyuma gato ya 2010, Perezida Kagame yasuye akarere ka Huye, ubuyobozi bw’ akarere bwariho icyo gihe bumenya ko aba baturage barageza iki kibazo kuri Perezida Kagame.

Icyo gihe ngo uwari Umunyamabanga Nshingwabikorwa w’ umurenge wa Tumba n’ uwari Umuyobozi w’ akarere bababujije kugeza iki kibazo kuri Perezida babizeza ko Rwandatel igiye kubagurira bakimuka ikibazo kigakemuka.


Ibyuma bifashe uyu munara bishinze no mu ngo z’ abaturage

Niyonteze Marie Claire, wasigaye mu isambu y’ umubyeyi witabye Imana avuga ko Rwandatel yabareze ivuga ko bigabije ubutaka bwayo, akarere kagashaka kubumvinakisha ariko ntibamenye aho ibyo kubumvikanisha byahereye.

Akarere kohereje umukozi ushinzwe ubutaka arapima, babara amafaranga Rwandatel yagomba kubishyura ndetse n’ uwari ahagarariye Rwandatel yasinye kuri izo mpapuro yemera ko Rwandatel igiye kugura ubwo butaka.

Ibi siko byagenze ahubwo aho kwishyura Rwandatel yahise itanga ikirego mu rukiko rwa Huye abaturage baratsinda, Rwandatel ijurira mu rukuko rukuru I Nyanza naho abaturage baratsinda, urukiko rutegeka Rwandatel kwishyura abaturage, aho kubishyura ijuririra mu rukiko rw’ ikirenga.

Imyanzuro y’ urukiko rw’ ikirenga igaragaza ko abaturage batsinzwe gusa bo bavuga ko batazi ingingo yabatsinze.

Niyonteze ati “Nta kintu bagaragaza kigaragaza ko ari ahabo, ngo wenda baba baratuguriye. Ntabwo berekana impapuro z’ uko twaguze. Nkumva rero ari akarengane”.

Aba baturage bafite ibyangombwa by’ ubu butaka babonye mu buryo bukurikije amategeko. Nubwo bimeze gutya ariko icyangombwa UKWEZI dufitiye ko kigaragaza ko Rwandatel ifite ‘Titre de Propriete’ yatanzwe muri 2003 igaragaza ko ayo masambu irega abaturage ari ayayo.

Iyi titre de propriete ya Rwandatel abaregwa barayikemanga

Abaregwa bibaza ukuntu Rwandatel yabonye iki cyagombwa mu gihe itagaragaza impapuro yaguriyeho ubu butaka. Mu iyndikisha ry’ ubutaka abaturage nibo babwibarujeho banahabwa ibyangombwa byabwo.

Nyiraminani Claudine we avuga ko isambu Rwandatel imushinja kwigabiza ababyeyi be bari babutuyemo mu 1994, inzu yabo igasenywa muri Jenoside yakorewe abatutsi. Jenoside ihagaritswe bakomeje guhinga iyi sambu n’ ubu baracyayihinga. Akibaza ukuntu Rwandatel yaba yaraguze ubu butaka mu 1982 ababyeyi be bagakomeza kubuturaho Rwandatel ntibirukane.

Ati “Rwandatel yadushoye mu manza amafaranga amaze kudushiraho, icyo nsaba ni uko twarenganurwa”.

Nyiraminani iyo abajijwe niba Rwandatel itaraguze isambu y’ ababyeyi we akaba atabizi agira ati “Ntabwo yigeze ibagurira kuko icyo gihe uyu munara ushingwa nari umwana uzi ubwenge. Baraje aho baguze hashinze umunara hateye na borune hari n’ uruzitiro ruhagaragaza”.


Aba baturage bavuga ko uru ruzitiro narwo rugaragaza aho ubutaka bwa Rwandatel bugarukira

Nyiraminani avuga ko ikirego cyabo na Rwandatel cyatangiriye mu kagari, abaturage baratsinda, kigera ku murenge abaturage baratsinda, no mu bunzi ngo abaturage baratsinze.

Akomeza agira ati “Paul Kagame aza I Huye muri 2013 akarere niko kabwiye Rwandatel ngo ize yumvikanye n’ abaturage, bagurire abaturage. Nabo biyemerera ko hano inyuma y’ imbago mu mirima yacu atari ahabo. Icyo gihe batubuza kujya kwibariza ikibazo cyacu, dutegereza ko baza kutugurira ntibaza dushiduka ahubwo batujyanye mu manza”.

Umwanzuro w’ urukiko rw’ ikirenga usaba abaturage kugura ubu butaka. Nyiraminani ati “Ubu butaka tubugura gute kandi ari ubwacu. Paul Kagame niwe mubyeyi dutura ibibazo byacu, nibiba ngombwa azamanuke aze kuri terrain adukemurire ikibazo, naho ubundi twebwe abaturage turarengana pe”.

Mu bo Rwandatel yareze harimo Musonera Jean Damascene waguze n’ umuturage isambu iri munsi y’ umunara i Tumba. Avuga ko yakurikiranye imikirize y’ uru rubanza agasanga urukiko rw’ ikirenga aho kugekemura ikibazo ahubwo rwarateje urujijo.

Abishingira ku mwanzuro wa 51, n’ uwa 52 uvuga ko ‘badashaka guteza impagaragara, no gusenyera abaturage ahubwo ko Rwandatel izagurira abaturage ubutaka’


Musonera uri mu baregwa na Rwandatel we asanga imyanzuro y’ urukiko rw’ ikirenga yarateje urujijo aho gukemura ikibazo

Akomeza agira ati ‘Ntangazwa n’ uko urukiko ruhindura rukavuga ngo abaturage nabe aribo bagurira Rwandatel. Ese abaturage nibishyurwa Rwandatel bazatwara n’ umunara?, kandi bakavuga ngo umunara ntutandukanywa n’ ubutaka. Ese umuntu yishyuye ubutaka agashaka kubaka etage yaca ya migozi?

Musonera nawe yemeza ko ubu butaka yaguze ari ubw’ umuturage atari ubwa Rwandatel, akabishingira ku kuba agura ubu butaka mu bagabo bamusinyiye harimo umukozi wa Rwandatel Emmanuel Murara wari ushinzwe kwita ku munara wamusinyiye mu bagabo bemeza ko aguze ubutaka n’ umuturage.

Ati “Emmanuel Murara yari umukozi wa Rwandatel, iyo ubutaka buza kuba ari ubwa Rwandatel yari kuvuga ngo ubutaka bwa Rwandatel bwagurishijwe cyangwa ati hari umuntu wabwigabije”.

Amaze kugura ubu butaka ngo yagiye ku karere arabwandikisha ahabwa ibyangombwa byabwo yubakamo inzu abakozi ba Rwandatel bareba.

Ati “Aha niho nshingira mvuga ko ubutaka ari ubw’ abaturage...Uko mbona byarangira Perezida wa Repubulika nk’ uko ahora arengera abariho barengana mbona ariwe kizere cy’ abaturage b’ I Tumba kuri antene”.

Umutangabuhamya Vestine Nyiraminani w’ imyaka 56 avuga ko azi amavu n’ amavuko y’ ishingwa ry’ uyu munara w’ I Tumba kuko washinzwe ari mukuru, ndetse ngo we n’ abandi bo mu rungano rwe icyo gihe bazaga gushungera uko abazungu bariho bashinga uyu munara.


Vestine Nyiraminani wari ufite imyaka 19 ubwo Leta yashingaga umunara i Tumba avuga ko amasambu ari inyuma y’ uruzitiro rw’ umunara ari ay’ abaturage atari aya Rwandatel

Ati “Baje gushinga icyuma hano, abaturage babanje gusakuza, bamwe baranafungwa barimo marainne wange witwaga Kankindi, n’ umusaza witwa Kavumbutse. Bati ibi ntibishoboka kuko nta n’ ikintu bari babahaye nta n’ ikiganiro bari babanje kugirana”.

Uyu mutangabuhamya avuga ko iyo iza kuba ariyo nyiri aya masambu iba yaraje kwishyuza imitungo muri Gacaca kuko amazu y’ abaturage yari muri iyi sambu amwe yasenywe muri Jenoside yakorewe abatutsi.

Mukesha David , umunyamategeko w’ icyahoze ari Rwandatel yatangarije UKWEZI ko ntacyo yavuga kuri iki kibazo ati “Ntabwo ndi umuvugizi wa Rwandatel”.

Umuyobozi w’ Akarere ka Huye Ange Sebutege wageze kuri uyu munara akareba uko iyo sambu iteye, avuga ko kuba iki kibazo cyarageze mu rukiko rw’ Ikirenga rukanzura ko abaturage batsinzwe, bitarangiriye ko ahubwo abaturage bageza ikibazo ku nzego zirimo n’ iz’ ubuyobozi zigakora ubusesenguzi hakarebwa impamvu urukiko rw’ ikirenga rwanzuye ko abaturage batsinzwe.


Meya Sebutege avuga ko aba baturage b’ i Tumba ku munara baramutse bakeneye inama mu bijyanye n’ amategeko bakwegera MAJ ikabafasha

Abajijwe niba hari uwagira icyo arenza ku mwanzuro wafashwe n’ urukiko rw’ ikirenga yagize ati “Ngira ngo habaye harimo kurengana ntabwo biba birangiye. Ubuyobozi ni cyo bubereyeho n’ inzego abantu bajya inama. Ngira ngo bagiye ku rwego rw’ umuvunyi hari inama babagiriye, icya mbere ni ugusesengura ishingiro ryabyo. Uko urubanza rwagiye ruzamuka ku buryo umuntu yavuga ngo ese kurengana ni hehe byabereye. Ese ni mu bimenyetso byirengagijwe, hari ibitabahawe agaciro? Ese ni amasezerano yabuze? Ni icya ngombwa batumwe ntibagitanga?”

Akomeza agira ati “Ibyo bose bikongera bigasuzumwa n’ urukiko. Inyungu z’ umuturage zigomba kubahirizwa ariko nanone amategeko agakurikizwa”.

Tariki 2 Nzeri 2019, aba baturage bandikiye Perezida Kagame bamumenyesha ikibazo cyabo. Tariki 3 Nzeri 2019 nibwo uru rwandiko banditse bagaha kopi Akarere ka Huye, Intara y’ amagepfo na Minisiteri y’ Ubutabera rwageze mu biro bya Perezida wa Repubulika.


Iyi niyo baruwa bandikiye Perezida Kagame bamugezaho iki kibazo

Magingo aya aba baturage bategereje igisubizo kizava ku mukuru w’ igihugu cyane ko bavuga ko ariwe ushobora kubarenganura.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...