konka coffee
KONKA

AMAKURU

UKWEZI
ubumwe

Col. Byabagamba, Brig Gen Rusagara na Kabayiza barongera kugezwa imbere y’ urukiko

Col. Byabagamba, Brig Gen Rusagara na Kabayiza barongera kugezwa imbere y’ urukiko
22-05-2019 saa 07:12' | By Nsanzimana Ernest | Yasomwe n'abantu 3172 | Ibitekerezo

Kuri uyu wa Gatatu tariki 22 Gicurasi 2019 biteganyijwe ko Urukiko rw’ Ubujurire ruburanisha urubanza ruregwamo abasirikare batatu bahamijwe ibyaha birimo gusebya Leta y’ u Rwanda.

Tariki 31 Werurwe 2016, nibwo Col Tom Byabagamba yahamijwe icyaha cyo gukwiza nkana ibihuha agomesha rubanda, arwangisha ubutegetsi, icyaha cyo gusebya leta; icyaha cyo guhisha nkana ibintu byagombye gufasha kugenza icyaha gikomeye hamwe n’icyaha cyo gusuzugura ibendera ry’igihugu cyangwa ibimenyetso biranga ubwigenge, ahanishwa gufungwa imyaka 21.

Brig Gen Frank Rusagara yahamijwe kwamamaza nkana ibihuha no kugomesha rubanda abangisha ubutegetsi buriho, gukora igikorwa kigamije gusebya Leta ari Umuyobozi, ndetse no gutunga imbunda binyuranije n’amategeko. Ahanishwa gufungwa imyaka 20.

Rtd Sgt Francois Kabayiza yahanaguweho icyaha cyo gutunga imbunda mu buryo bunyuranyije n’amategeko ariko ahamwa n’ubufatanyacyaha mu guhisha ibimenyetso bigamije gutahura icyaha gikomeye ahanishwa gufungwa imyaka itanu n’ihazabu y’ibihumbi 500.

Aba basirikare bakimara gusomerwa ibihano bose bahise bavuga ko batemeranya n’umwanzuro w’urukiko barajurira, kuri uyu wa Gatatu bakaba bongera kuburana kuri ibi byaba bashinjwa.

Tom Byabagamba yarezwe kuvuga amagambo asebya ubutegetsi nko kwemeza ko ubutegetsi bw’U Rwanda ari ubw’abicanyi, ko bufata ibyemezo bihubutse ndetse ngo bukaba bufungira abantu ubusa.

Ibi byaha bivugwa ko yakoreye i Kigali ndetse no mu gihe yari mu butumwa bw’amahotro muri Sudan y’Epfo abishinjwa na bamwe mu basirikare bemeza ko yabibwiye.

Gusa uregwa we ahakana ko atigeze avuga nabi ubutegetsi kandi ko nta nyungu yagira mu gusuzugura ibendera ry’igihugu avuga ko yarwaniye. Mu gihe cyose cy’urubanza, uyu musirikare yakomeje kwikoma ubushinjacyaha avuga bumurega ibyaha by’ibihimbano.

General Rusagara we utakiri mu gisirikare yahamijwe icyaha cyo kubiba ibihuha bigamije gutera intugunda mu gihugu, gusebya ubutegetsi kandi ari umwe mu bayobozi ndetse no gutunga intwaro bitemewe n’amategeko.

Rusagara nawe ashinjwa na bamwe mu basirikare bavuga ko bamwumvise avuga nabi ubutegetsi buriho mu Rwanda.

Ngo yemeje ko ubutegetsi bw’U Rwanda budakunzwe, ko Perezida Kagame ayoboza igitugu, kandi ngo yanumvikanye ashimagiza ishyaka rya RNC ritavuga rumwe n’ubutegetsi bw’U Rwanda .

Uru rubanza rwumvikanyemo cyane ibibazo by’amasano dore ko aba baregwa umwe ari muramu w’undi.

Ikindi ngo bafitanye amasano na bamwe mu bayobozi b’ishyaka rya RNC, iyi ikaba ari yo mpamvu ngo baba barashishikarizaga abantu kumva amatwara yaryo.

Tom Byabagamba yahoze ari umuntu ukomeye kuri Perezida Kagame, akaba yarabaye umukuru w’ingabo zimurinda mu gihe kitari gito.

Nyuma yaje koherezwa mu butumwa bw’amahoro muri Sudan y’Epfo ayoboye umutwe w’ingabo z’U Rwanda zari yo.

Na ho General Rusagara yabaye umujyanama mu bya gisirikare mu biro bihagarariye u Rwanda mu Bwongereza, akaba ndetse yarigeze no kuyobora uru rukiko rwamukatiye gufungwa.

Ni umwe mu basirikare b’U Rwanda bafatwaga nk’impuguke, akaba yarakunze kugaragara mu mpaka z’abanyabwenge zibanda ku mateka n’ubumwe n’ubwiyunge.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...