AMAKURU

UKWEZI
ubumwe

G.S. Gafumba hari abanyeshuri bicara ari 5 ku ntebe, abatabishoboye bakicara hasi

G.S. Gafumba hari abanyeshuri bicara ari 5 ku ntebe, abatabishoboye bakicara hasi
30-08-2019 saa 13:57' | By Nsanzimana Ernest | Yasomwe n'abantu 1784 | Ibitekerezo

Mu ishuri rya Groupe Scholaire Gafumba ryo mu murenge wa Rusatira akarere ka Huye abanyeshuri babangamiwe no kuba hari ubwo bicara ari 5 cyangwa 6 mu gihe batakagombye kurenga 2 ku ntebe nk’ uko bitangazwa n’ ubuyobozi bw’ ishuri.

Ibi bituma abanyeshuri bamwe bahitamo kwiyicarira hasi kuri sima kuko kwandika bicaye babyinaga bibagora.

Akarere ka Huye iki kibazo karakizi ndetse harimo gushakwa uko cyakemurwa binyuje mukongera ibyumba by’ amashuri.

Ubwo Ikinyamakuru UKWEZI cyasuraga iri shuri kuri uyu wa Kane tariki 29 Kanama 2019 twasanze iki kibazo kigaragara cyane mu myaka itatu ibanza y’ amashuri abanza.

Mu mwaka wa mbere hari ishuri twasanze abana bicaye ari bane ku ntebe izindi zicayeho batanu. Iri shuri ryarimo abanyeshuri 41, abanyeshuri 19 bose basibye.

Muri iri shuri nta munyeshuri wari wicaye hasi ariko uko bigaragara iyo abanyeshuri 19 bari basibye baza kuba baje ntabwo bari kubona aho bicara.



Aba bicaye ari batanu kandi hari bagenzi babo 19 basibye

Abarimu bigisha mu mashuri yo kuri iki kigo arimo ubucukike bavuga ko ubu bucukike bugira ingaruka ku myigire y’ abanyeshuri zirimo no gushyamirana bakarwana nk’ uko byemezwa na Mwarimukazi Mukeshimana Francoise wigisha isomo ry’ Ikinyarwanda muri aya mashuri.

Yagize ati “Ngewe ku ruhande rwange uretse ko na bagenzi bange ariko bimeze ubucukike buratubangamira mu gutanga isomo, iyo ari benshi kugira ngo ubone uko wita kuri buri wese biragorana”

Akomeza agira ati “By’ umwihariko mu isomo ry’ Ikinyarwanda buri wese aba afite igitabo cye iyo barambuye babyigana igitabo kigapfuka icya mugenzi we barabipfa ukabona bari kurwana ukajya gukiza”.


Mwarimukazi Mukeshimana Francoise avuga ko hari ubwo abona abana barwanye bitewe n’ uko bari kubyiganira ku ntebe

Uyu mwarimukazi atekereza ko ubucukike bushobora kuba imwe mu mpamvu zituma abanyeshuri basiba ishuri kubera ko iyo bari mu ishuri baba batisanzuye.

Ati “Birashoboka ko hari uvuga ati ‘runaka yankubise kubera ko twarimo tubyina, sinsubirayo kubera ko andusha imbaraga ejo yakongera akankubita”.

Mbonigaba Alex , Umuyobozi wungirije wa G.S.Gafumba ushinzwe amasomo avuga ko ikibazo cy’ ubucucike mu mashuri ahanini giterwa n’ uko intebe bafite ari nkeya.

Ati “Ubundi abanyeshuri bakagombye kwiga bicaye neza, ninabwo umwana yiga yisanzuye ariko iyo urebye hari ikibazo cy’ intebe. Twatanze ikifuzo cy’ uko badufasha kubona izo ntebe amakuru mfite ni uko hari intebe zaba ziri hafi kugera hano”.


Mbonigaba Alex ushinzwe amasomo kuri iki kigo avuga ko habonetse intebe iki kibazo cy’ ubucucike cyagabanuka

Mbonigaba akomeza avuga ko kuba abana bicara bacucitse ku ntebe bifite ingaruka zirimo kuba umwarimu ashobora kwibwira ko umunyeshuri bamenye kandi ari uko yarebye ibyo mugenzi we yanditse nawe akaba aribyo asubiza.

Ange Sebutege , Umuyobozi w’ Akarere ka Huye mu kiganiro yagiranye n’ abanyamakuru kuri uyu wa Gatanu tariki 30 Kamena 2019 yavuze ko kugira ngo ikibazo cy’ ubucucike gikemuke mu karere kose hakenewe ibyumba by’ amashuri 400, hagiye kubakwa ibyumba 121 bizaba byuzuye bitarenze tariki 30 Kanama 2020.

Sebutege avuga ko muri uyu mwaka w’ ingengo y’ imari aribwo bagiye kubaka ibyumba byinshi 121 kuko umwaka ushize bari bubatse 55. Avuga kandi ko impamvu yateye ubucucike mu mashuri ari uko kuri ubu abanyeshuri basigaye bitabira kwiga ugereranyije no mu myaka yashize.


Sebutege yavuze ko ikibazo cy’ ubucucike kizaba cyarakemutse mu myaka itatu iri imbere

Yagize ati “Ibyo byumba 47 bizaba ari ibyo gusimbuza ibyumba bishaje ari nk’ ibyo 74 bizaba ari ibyo gukemura ikibazo cy’ ubucucike”.

Sebutege avuga ko amashuri yasuwe n’ abayobozi bareba uko ubucucike buhagaze hanyuma hashyirwaho umurongo w’ uko iki kibazo kigomba gukemurwa.

Bamwe mu banyeshuri twasanze bayisemo kwiyicarira hasi kugira ngo babone uko bandika batabyigana na bagenzi babo

Iri shuri rya G S Gafumba rifite abiga mu mashuri yisumbuye, bo bicara ari batatu ku ntebe mu gihe iyi ntebe idakwiye kwicaraho abarenze babiri nk’ uko bivugwa n’ umuyobozi ushinzwe amasomo


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...