konka coffee
KONKA

AMAKURU

UKWEZI

Gen. Kabarebe yatumwe n’ urubyiruko gusaba ko Perezida Kagame yagirwa Intwari akiriho

Gen. Kabarebe yatumwe n’ urubyiruko gusaba ko Perezida Kagame yagirwa Intwari akiriho
31-01-2019 saa 20:03' | By Nsanzimana Ernest | Yasomwe n'abantu 4012 | Ibitekerezo 5

Urubyiruko rw’ abakorerabushake mu gukumira no kurwanya ibyaha mu ntara y’ amagepfo rwasabye ko Perezida w’ u Rwanda Paul Kagame yagirwa Intwari akiriho kuko umuntu agirwa intwari n’ abariho.

Hari mu ihuriro ry’ urubyiruko ryabereye mu karere ka Huye kuri uyu wa 31 Mutarama 2019, aho uru rubyiruko rwiganjemo abanyeshuri bo mu mashuri yisumbuye na za Kaminuza baganirijwe k’ ubutwari bw’ Abanyarwanda mu mateka yabo.

Nyuma yo kumva ubutwari n’ uruhare Perezida Kagame yagize mu kubohora Abanyarwanda babibwiwe na Gen. James Kabarebe wari mu rubyiruko rwabohoye u Rwanda basabye ko Paul Kagame yagirwa Intwari akiriho.

Munyaneza Joseph, umwe mu rubyiruko rw’ abakorerabushake mu gukumira no kurwanya ibyaha yavuze ko bagenzi be bamutumye ngo abasabire Gen. James Kabarebe , Umujyanama wa Perezida Kagame mu by’ ingabo n’ umutekano ko abajyanira ubutumwa bw’ uko Perezida Kagame yagirwa Intwari akiriko.

Munyaneza yavuze ko nta kibazo afite ngo yari kuba afite ikibazo iyo ingabo za RPA ziba zitarabohoye u Rwanda.

Akomeza avuga ko umuntu agirwa intwari n’ abariho we yarapfuye ariko bagashingira ku bikorwa yakoze, gusa birashoboka ko umuntu yagirwa akiriho hashingiwe ku bikorwa by’ ubudashyikirwa yakoze.


Munyaneza Joseph

Yagiye ati “Nyakubahwa mushyitsi mukuru ngiye ku kwitumira, ngiye kugutuma no mu izina ry’ urundi rubyiruko rw’ abakorerabushake. Twe nk’ urubyiruko tukimara kubona ibikorwa Nyakubahwa Perezida wa Repubulika yakoze, ubwitange yagize n’ umurava, twumvaga yashyirwa mu Ntwari kuko n’ ubundi umuntu agirwa intwari n’ abariho”

Iki gitekerezo cyakirijwe amashyi n’ urubyiruko rwari muri Sitade ya Huye, ruganirizwa k’ ubutwari bw’ Abanyarwanda mu gihe habura amasaha make ngo u Rwanda rwizihize umunsi w’ Intwari ku nshuro ya 25.

Gen. James Kabarebe yabwiye urubyiruko ko ubuhanga n’ ubushishozi bya Perezida Kagame wari uyoboye urugamba rwo guhagarika Jenoside aribyo byatumye ingabo za RPA zibohora u Rwanda.

Urwego rw’ Igihugu rushinzwe Impeta z’ Ubutwari n’ Imidari by’ ishimwe ruvuga ko kugira ngo umuntu agirwe Intwari uru rwego rubanza kugira izina rye k’ urutonde rw’ abakorwaho ubushakashatsi, nyuma y’ ubushakashatsi rukazemeza niba ibikorwa uwo muntu yakoze bimugira intwari. Ngo kugira ngo umuntu age mu bakorwaho ubushakashatsi abantu bajyana izina rye kuri uru rwego rikongerwa ku mazina akorwaho ubushakashatsi.

Umunsi w’ Intwari wizihizwa buri mwaka tariki 1 Gashyantare. Uyu mwaka icyumweru cy’ ubutwari cyatangiye tariki 25 Mutarama cyasojwe none tariki 31. Insanganyamatsiko y’ uyu mwaka iragira iti ‘Dukomeze Ubutwari mu Cyerekezo Twahisemo’.

Intwari ni umuntu ukurikirana ibyo yiyemeje kugeraho bikavamo igikorwa cy’ikirenga gifitiye abandi akamaro, akabikora mu bupfura, mu kwihangana no mu bwitange buhebuje kandi akirinda ubugwari mu migirire ye, ntagamburuzwe n’ amananiza.

Kugeza ubu , ibyiciro by’ intwari z’ u Rwanda ni bitatu: Imanzi, Imena, Ingenzi. Mu kiciro cy’ Imanzi harimo Umusirikare utazwi, na Gisa Fred Rwigema, Mu kiciro cy’ Imena harimo MUTARA III RUDAHIGWA, RWAGASANA Michel, Agathe UWIRINGIYIMANA, n’ Abanyeshuri b’ I Nyange batewe n’abacengenzi banga kwitandukanya tariki ya 18/03/1997 mu ijoro.

Ikiciro cy’ Ingenzi kugeza ubu nta ntwari irashyirwamo ziracyakorwaho ubushakashatsi. Ikiciro cy’ Imena nicyo kirimo abantu bagizwe Intwari bakiriho.


Perezida w’ u Rwanda Paul Kagame


INKURU ZA :
Tanga Igitekerezo
Ibitekerezo 5
Mr. B Kuya 2-02-2019

Icyifuzo cy’uru rubyiruko ni kiza, Kandi birashoboka rwose kwitwa intwari ukiriho. Gusa hano uwagisabiwe, sicyo gihe cyo kumugena nk’Intwari kuko aracyari mu kazi asohorezamo ibikorwa bye, bizamugira cyangwa se ntibimugire Intwari.

Niba rero nyirubwite nawe ashaka gu celebrating ubutwari bwe akiriho, BIRASHOBOKA CYANE, Gusa birasaba ko abanza agasoreza aho ageze. Kugirango haboneke umwanya wo gupima ikigero cy’ubutwari bwe, hato mutazanamugira Imena kandi yari Imanzi. Mu gihe ibikorwa bye bihamije ubutwari ndakuka, azitwa INTWARI. Azakorerwa ibirori byo kwishimira uwo umurage asigiye igihugu. Ndetse, namwibutsa ko arinako kanya keza yaba abonye ko gushimangira legacy ye.

Ibitari ibyo, amahirwe ashobora kuzagenda amubana make, kugeza ubwo ashobora no kuzasanga challenges ziri imbere zimwangirije isura agatahira aho, (n’ubwo ntabimwifuriza). Niba hari uwo tutabitekereza kimwe ntanyumve nabi, gusa iyi niyo reality.

Umusanzu rero nasaba abanyarwanda bakwiye kumuha, ni ugushyigikira uwo bifuriza ubutwari muri urwo rugendo. Akazarusozanya amahoro n’ibyishimo. Kandi byaba bishimishije cyane igihugu kigize Intwari ikiriho.

sezikeye Kuya 2-02-2019

Ni byiza cyane ko INTWARI zihabwa "imidali".Ziba zarakoze ibintu bidasanzwe.Urugero ni Major-General Rwigema wacyuye abanyarwanda bari baraheze ishyanga.Mandela watumye Appartheid ivaho.Luther King waciye irondabwoko muli Amerika.Ariko Intwari iruta izindi zose(the greatest man who ever existed),ni YESU KRISTO wadupfiriye kugirango abantu bumvira Imana bazahabwe "ubuzima bw’iteka muli paradizo".Yerekanye ko asumba abandi bose azura abantu,akiza abamugaye n’abahumye batabarika,agenda hejuru y’amazi,etc...
Ibyo byahamijwe n’abantu benshi,harimo abo babanye nka Petero,Yakobo na Yohana.Aho kubihakana cyangwa gushidikanya,shaka Imana cyane,ubifatanye n’akazi gasanzwe,kugirango uzabeho iteka muli Paradizo.
Abashidikanya cyangwa ababihakana,ntabwo bazaba muli paradizo.Iyo bapfuye biba birangiye batazazuka ku munsi wa nyuma nkuko bible ibyerekana.

Yakobo Kuya 1-02-2019

Birakwiye.H.E ajye mu Manzi kabisa.Burya abantu beza kandi bakoze ibyiza baba bakwiye gushimwa no gushimirwa bakiriho.

Izina rye turaritanze

munyaneza innocent Kuya 1-02-2019

Nukuri ibyo urubyiruko rw’abakorerabushake rwasabye bifite ishingiro kuko ibyo Paul kagame yakoze bigaragaza ubutwari n’ubwitange buhebuje mbonereho no gushimira ingabo zahoze ari iza FPR inkotanyi

Muhabura Kuya 1-02-2019

Ntampamvu n’imwe H.E yamubuza kutubera intwali y’urwanda kuko Aho yakuye u Rwanda ni ubutwari budasanzwe.

English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...