AMAKURU

UKWEZI
ubumwe

Gisagara: Umuhanda warabasenyeye batinda guhabwa ingurane none n’ ay’ ubukode bemerewe yaraheze

Gisagara: Umuhanda warabasenyeye batinda guhabwa ingurane none n’ ay’ ubukode bemerewe yaraheze
7-10-2019 saa 11:21' | By Nsanzimana Ernest | Yasomwe n'abantu 1177 | Ibitekerezo 1

Imiryango 8 ituye mu isantere ya Duwane mu murenge wa Kibilizi mu karere ka Gisagara irasaba ubuyobozi kuyikemurira ikibazo kimaze umwaka cyo kudahabwa ingurane kuko ibayeho nabi.

Aba baturage mu kwezi gushize tariki 2 batewe n’ amazi yaturutse ku ikorwa ry’ umuhanda yinjira mu mazu yabo ari munsi y’ umuhanda. Aya mazu n’ ubusanzwe yari yarasataguritse biturutse ku gutigiswa n’ imashini zikora umuhanda.

Magingo aya imwe muri iyi miryango 8 yagiye gushaka aho ikodesha kuko ushinzwe ubutaka mu karere yari yageze muri aya mazu agasanga ashobora gushyira ubuzima bwabo mu kaga.

Nubwo ariko uyu muyobozi yarebye amazi n’ ibyondo byari byuzuye muri aya mazu akababwira kujya gushaka aho bakodesha, abizeza ko akarere kazabishyurira nabyo ntibyakozwe.

Tegiryejo Aimant aganiraga na UKWEZI yavuze ko tariki 2 Nzeri 2019 , Umuyobozi w’ Akarere ka Gisagara ushinzwe ubutaka yababwiye ngo bage gushaka aho bakodesha amazu yo kubamo akarere kazabishyurire ubukode.

Ubwo umuyobozi mu karere ushinzwe ubutaka yababwiraga kujya gushaka aho bakodesha hari haguye imvura nyinshi amazi yuzura mu nzu barara bahangaze n’ ibikoresho byabo birangirika. Amazi n’ isayo byuzuye mu nzu zabo byatewe n’ ikorwa ry’ umuhanda uca mu isanteri ya Duwane.

Tegiryejo ati “Turasaba ko niba badashaka no kudukodeshereza batwishyura ingurane zacu kuko ntabwo twubatse duteganya kuzakodesha. Baratubwira ngo mu byumweru 2, mu byumweru 2 none dore amezi arashira ashyira”.

Iyi miryango 8 ivuga ko tariki 2 Nzeri 2019 bari babwiwe ko amafaranga yabo y’ ingurane bamaze umwaka bategereje abageraho bitarenze ibyumweru 2 none hashize bitanu bategereje.

Abagiye mu mazu y’ ubukode bizezwa ko akarere kazabishyurira ukwezi kwarashize bategereza ko akarere kishyura baraheba. Ba nyiri amazu ntibaboroheye nk’ uko babivuga.

Ngirungize Vincent avuga ko yasinyiye 5 480 000 nk’ ingurane y’ inzu n’ ikibanza bigeze hagati barahindura bamubwira ko bazishyura urubaraza gusa barwishyura miliyoni 1.

Akomeza avuga ko iyo miliyoni imwe yayubatsemo inzu mu gikari none nayo ngo imashini zikora umuhanda zaratigishije iragwa.

Ati “Inzu yasenyutse turi hanze twese n’ umuryango wange ntabwo mfite ahantu ndi”.

Tariki 2 Ukwakira 2019, Umuyobozi w’ Akarere ka Gisagara Rutaburingoga Jerome yabwiye abanyamakuru ko bagiye kureba iki kibazo.

Yagize ati “Itariki ebyiri ni uyu munsi turaza kubikurikirana kugira ngo turebe ko amafaranga atabagezeho. Turaza kubireba. Nge numva ibyiza twabonana n’ abo baturage kugira ngo tumenye uwabemereye kubakodeshereza kuko hari benshi twishyuriye. Twabikurikirana kugira ngo tumenye uwabahaye iryo sezerano abishyure”.

Nubwo Meya Rutaburingoga tariki 2 Ukwakira 2019, yizeje aba baturage ko agiye kubakurikiranira ikibazo, mu gitondo cyo kuri uyu wa Mbere tariki 7 umwe muri aba baturage batangarije Ukwezi ko iki kibazo kitarakemuka ndetse ko nta muyobozi w’ akarere wigeze abasura.

Mu mpera za Kamena 2019 , Meya Rutaburingoga yari yavuze ko hari amafaranga agera kuri miliyoni 70 ateganyijwe yo kwishyura ingurane z’ abagirijwe n’ ikorwa ry’ umuhanda Huye – Gisagara.

Avuga ko dosiye yo kwishyuriza aba baturage ingurane iri mu kigo cy’ igihugu gishinzwe ikorwa ry’ imihanda RTDA.

Uyu muhanda watangiye kubakwa Kanama 2018. Ikibazo cy’ abaturage basenyewe n’ uyu muhanda batarahawe ingurane cyatangiye kumvikana mu nta ngiriro z’ uyu mwaka kugeza uyu munsi ntibarishyurwa.








Aya mafoto agaragaza ibyondo mu nzu ni aya tariki 2 Nzeri 2019


INKURU ZA :
Tanga Igitekerezo
Ibitekerezo 1
uhorasenga Kuya 13-10-2019

ibyobyose byerekana ubuyobozu bubu

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...