AMAKURU

UKWEZI
ubumwe

Gisagara: Inkoko zirenga 700 zapfuye mu masaha 30, barasaba ubwishingizi

Gisagara: Inkoko zirenga 700 zapfuye mu masaha 30, barasaba ubwishingizi
10-09-2019 saa 12:56' | By Nsanzimana Ernest | Yasomwe n'abantu 2403 | Ibitekerezo 1

Umworozi w’ inkoko wo mu karere ka Gisagara yahombye miliyoni zirenga ebyiri z’ amafaranga y’ u Rwanda kubera icyorezo cy’ indwara y’ inkoko cyadutse mu nkoko ze.

Gashema Victor wo mu murenge wa Gikonko, akagari ka Gikonko , Umudugudu wa Gahabwa yatangarije UKWEZI ko inkoko ze zafashwe ku Cyumweru tariki 8 Nzeri 2019.

Uyu mworozi w’ inkoko ubimazemo imyaka 5 avuga ko izi nkoko 720 zageze mu Rwanda tariki 8 Kanama 2019 bivuze ko yari azimaranye ukwezi kose.

Saa moya za mu gitondo ku Cyumweru nibwo izi nkoko zafashwe ariko byageze saa munani inkoko zirenga 300 zamaze gupfa, zikomeza gupfa kugeza ubwo byageze ku wa mbere nimugoroba zose zapfuye. Izi nkoko zafashwe na diarrhea zitotora ibintu by’ umweru.

Gashema avuga ko izi nkoko yari yarazikuye mu Bubiligi abifashijwemo na Agrotech. Avuga ko izi nkoko zapfuye buri imwe yari ifite agaciro k’ amafaranga 2000 rwf.

Agira ati “Mbariyemo n’ ibyo nari maze kuzitakazaho byose zampombeje amafaranga y’ u Rwanda atari munsi ya 2 600 000”

Uyu mworozi avuga ko nubwo inkoko ze zapfuye yari yarazikingiye icyorezo cya Gumboro cyazihitanye.

Gashema asaba ko Leta yashyiraho ubwishingizi bw’ inkoko ku buryo umworozi w’ inkoko uhuye n’ ikibazo nk’ iki cyo gupfusha inkoko bitunguranye yajya yishyurwa n’ ubwishingizi kugira ngo umushinga we ukomeze.

Ati “Birababaje kuba inka y’ ibihumbi 300 iri gushakirwa ubwishingizi ariko umuntu akaba afite inkoko ziri muri miliyoni 5 zikaba nta bwishingizi zifite. Icyo nacyo ni ikintu kitubabaje nk’ aborozi. Kugira ngo nongere gutangira umushinga nk’ uyu, umwishingizi bw’ inkoko mu gihe bwaba butaraboneka ntabwo nakongera kujya mu bworozi bw’ inkoko”.

Nteziryayo Vedaste Viterineri w’ Akarere ka Gisagara yatangirije UKWEZI ko yasuye uyu mworozi witwa Gashema agasanga izi nkoko 720 zose zazize icyorezo cya gumboro.

Gumboro ni icyorezo gikwirakwizwa na virusi, inkoko zamaze gufatwa ntabwo ishobora kuvurwa, umutwi wo kwirinda iyi ndwara ni ugukingira inkoko hakiri kare.

Undi mworozi w’ inkoko wo mu murenge wa Gikonko yadutangarije ko atewe ubwoba n’ iki cyorezo cyahitanye inkoko za mugenzi we kuko ngo Gumboro ari icyorezo gikwirakwira mu buryo bworoshye. Asaba Minisiteri y’ ubuhinzi n’ ubworozi ko yafasha abororozi b’ inkoko bakabona ubwishingizi bwazo.

Viterineri Nteziryayo avuga ko icyo aborozi b’ inkoko bo muri aka karere bagomba gukora cya mbere ari ugukingiza neza inkoko zabo.
Ati “Aborozi turabakangurira gukingiza, hari gahunda yashyizweho yo gukingira kuva ziturazwe kugeza zigiye ejuru, ubwo rero icyo aborozi baba basabwa ni ugukurikiza iyo ngengabihe yo gukingira.”

Ku kifuzo cy’ uko hajyaho ubwishingizi bw’ inkoko , Nteziryayo avuga ko ari igitekerezo Minisiteri y’ ubuhinzi n’ ubworozi yakwigaho.

Ati “Ubwishingizi bw’ amatungo ni ibintu ubona bikiri bishyashya, assurance yatangiriye ku nka ariko hari icyizere ko nandi matungo azagerwaho”

Nteziryayo yavuze ko bagiye gusesengura neza bakareba niba kuba inkoko za Gashema zapfuye nta burangare yabigizemo, basanga ntabwo yagizemo bakareba icyo bamufasha.

Ati “Ntabwo arinjye ufata umwanzuro ku kibazo cy’ umworozi wapfushije inkoko nka ziriya, ariko nanone ni ukureba ku mpande zose niba umworozi hari uburangare yagize urumva ko ni ikibazo. Nubwo ari icyorezo ni icyorezo gishingiye kukudakurikiza amabwiriza. Abayobozi n’ inzego twabiganira tukareba icyo twakora ariko kugeza ubu ng’ ubu ntacyo ndamenya”

Mu karere ka Gisagara habarurwa inkoko zirenga ibihumbi 80 zorowe n’ aborozi batandukanye.

Clementine U


INKURU ZA :
Tanga Igitekerezo
Ibitekerezo 1
DUFITEYEZU J Paul Kuya 11-09-2019

Hakeiye kubaho ubwishingizi kubijyanye nubwozi bwinkoko, kuko ni umushinga usaba igishoro Kiri hejuru cyaneee!!!
Kandi koko nkuko dushaka kwigira, ntiwakora umushinga nkuriya ngo
Wangirike kuriya ngo ubure gucika intege.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...