konka coffee
KONKA

AMAKURU

UKWEZI

Gisagara: Abafite impugenge z’ isoko rya hegitari 15 z’ imyumbati ngo bihangayika

Gisagara: Abafite impugenge z’ isoko rya hegitari 15 z’ imyumbati ngo bihangayika
8-02-2019 saa 18:00' | By Nsanzimana Ernest | Yasomwe n'abantu 832 | Ibitekerezo

Amatsinda 19 yo mu murenge wa Kibilizi mu karere ka Gisagara yishyize hamwe bibakemurira byinshi mu bibazo birimo n’ ubwigunge ariko bafite impungenge z’ uko imyumbati yabo bahinze kuri hegitari 15 ishobora kutazabana isoko.

Koperative Abishyizehamwe Kibirizi Gisagara (KOABIKIGI) igizwe n’ abantu 570 barimo abagabo 15 n’ abagore 555 bose hamwe bahoze mu matsinda 19.

Hashize umwaka umwe bishyize hamwe bagasaba akarere kubashakira aho bahinga. Akarere ka Gisagara kabashakiye ubuso bungana na hegitari 15 ziri mu kagari ka Muyira bazihingaho imyumbati. Iyi myumbati isigaje amezi ane ikaba yeze.

Aba baturage bavuga ko CRADHO na Action Aid babahuguye bakabigisha uko ingengo y’ imari itegurwa n’ uko bakwiye kuyigiramo uruhare, bakanabakangurira kwishyira hamwe.

Umunyamuryango witwa Nyiransabimana Peteronille avuga ko intego yatumye bishyirahamwe ari ukugira ngo biteze imbere kandi barandure ikibazo cy’ imirire mibi.

Mukakalisa Francine avuga ko kubera kwishyira hamwe muri koperative byabakemuriye ibibazo bahuraga nabyo nk’ abahinzi birimo itinda ry’ imbuto n’ ifumbire.

Ati “Dufite abaduhagarariye mu nteko ubu ifumbire n’ imbuto tubibonera ku gihe”

Kantetere Anick, Umuyobozi wa KOABIKIGI avuga ko kwishyira hamwe byabafashije kwitinyuka no kwiteza imbere mu ngo zabo.

Ati “Kubera kuba muri koperative umugore yaritinyutse. Kuba mpagaze hano nsobanura ibintu ni uko nitinyutse. Mu rugo ntegura ingengo y’ imari, ntanga ibitekerezo bishyirwa mu ngengo y’ imari. Ntabwo umunyamuryango yabura Mitiweli, ahabwa imbuto atayiguze akabasha guhingira ku gihe mu gihe abandi baba batarabona imbuto kuko mu gihe cy’ ihinga iba ihenze”

Aba bagore bose nubwo bishimira ko hari byinshi kuba muri Koperative byakemuye bavuga ko bafite impungege z’ uko imyumbati yabo ishobora kuzabura isoko cyangwa bagahendwa.


Umuyobozi wa Koperative KOABIKIGI, Kantetere Anick

Kantetere ati “Imbogamizi dufite n’ imihindagukire y’ ibihe n’ ikibazo cy’ isoko ry’ umusaruro wacu”

Haganimana Jean Paul, Umuyobozi w’ Akarere ka Gisagara wungirije ushinzwe ubukungu n’ iterambere yabwiye UKWEZI ko inganda nto zitunganya imyumbati zari zarahagaze zigiye kongera gukora kandi ko hari n’ uruganda rwa Kinazi bityo ko iyi koperative idakwiye kugira impungenge.

Ku kibazo cy’ uko iyo imyumbati yereye rimwe igurishwa ku giciro gito banyirayo bakaba bashobora kugwa mu bihombo Visi Meya Hanganimana yavuze ko bagiye gusura iyi koperative bakareba igihe imyumbati yabo izerera.

Yagize ati “Icyo twabasezeranya ni uko tuzabasura tukareba igihe umusaruro uzabonekera tugatangira kubashakira aho bazerekeza umusaruro wabo utabapfiriye ubusa.”

Uyu muyobozi yizeje iyi koperative ko mu mezi ane ubwo iyi myumbati izaba yeze, akarere kabaza karabasuye karanababoneye isoko.

Muri iki gihe imyumbati mibisi mu karere ka Gisagara igurwa amafaranga 150 ku kilo, ubugari bukagurwa 200 ku kilo. Abagize KOABIKIGI bavuga ko bakurikije imbaraga n’ igishoro bashoye mu myumbati yabo basanga ikilo cy’ imyumbati mibisi bakigurisha 250F kugira ngo badahomba.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...