konka coffee
KONKA

AMAKURU

UKWEZI

Hagaragajwe amahirwe ku rubyiruko rwinjiye mu mirimo y’ubuhinzi

Hagaragajwe amahirwe ku rubyiruko rwinjiye mu mirimo y’ubuhinzi
15-05-2018 saa 16:44' | By Akayezu Jean de Dieu | Yasomwe n'abantu 1391 | Ibitekerezo

Bamwe mu rubyiruko rukora mu mirimo y’ubuhinzi by’umwihariko abashoye imari mu buhinzi bw’ibinyabijumba bavuga ko bagenzi babo bakwiye gutekereza ku mahirwe menshi ari mu gushora imari mu buhinzi cyane ko abahinzi bakiri bake mu gihugu kandi nabo abenshi akaba ari abo mu bice by’icyaro badafite ubumenyi n’ubushobozi.

Giriwanyu Paola usanzwe akora ibijyanye n’ubutubuzi bw’imbuto y’ibijumba avuga ko yize iby’ubuhinzi muri kaminuza nyuma aza gufata uwo mwanzuro nyuma yo kuguma yibaza impamvu abahinzi ari abakene. Akomeza avuga ko ubwo yarimo yimenyereza ibijyanye n’amasomo yize aribwo yaje kubona abatubura imbuto babonamo amafaranga menshi bimutera imbaraga zo kwinjira muri iyi mirimo.

Akomeza avuga ko ubuhinzi ari hamwe mu hasigaye amahirwe ku rubyiruko kuko benshi bataramenya amahirwe abamo aho kuri ubu usanga abahinzi ari bamwe bo mu cyaro ahanini usanga batanafite ubumenyi ku byo bakora ari nayo mpamvu usanga batabasha kubona umusaruro n’inyungu mu buhinzi, ahamya ko urubyiruko rukwiye kureba uburyo rwabyaza umusaruro ayo mahirwe.

Umugiraneza Regis ufite kompanyi y’urubyiruko ikora ibijyanye no gutunganya ibijumba ikabikoramo ibintu bitandukanye birimo imigati avuga ko impamvu ubuhinzi bwo mu Rwanda butakunzwe kwitabirwa n’urubyiruko ari amateka y’igihugu cyacu atuma abantu bagitekereza ko ubuhinzi ari ubukorwa n’abakuze gusa.

Yagize ati “Twakuze tuzi ko ubuhinzi ari wo mwuga wonyine utunze abanyarwanda, umuntu yabaza undi ati ukora iki? undi akamubwira ko ari umuhinzi n’undafite icyo akora cyose akavuga ngo ni umuhinzi bigatuma abantu bumva ko ubuhinzi ariwo mwuga uciriritse, ayo mateka atuma dukura twumva ko ubuhinzi aricyo kintu kibi gikwiriye gukorwa n’ababyeyi bacu ariko ubu siko bikiri”

Yakomeja avuga ko ubuhinzi bw’uyu munsi butandukanye no kuba umuntu ahinga ngo abone icyo kurya ahubwo kuri ubu ubuhinzi ari ahantu washora imari ukitwa rwiyemezamirimo mu buhinzi cyane ko abantu bose ku isi bakenera umuhinzi.

Dr Jan Law, Uhagarariye ubushakashatsi bw’ibinyabijumba ku isi yavuze ko mu buhinzi bw’ibinyabijumba harimo amahirwe menshi ku buryo urubyiruko rwayifashisha mu kubyaza umusaruro iki gice kinini benshi bataramenya ibyiza byacyo. Dr Jan Law, Uhagarariye ubushakashatsi bw’ibinyabijumba ku isi
Dr Charles Bucagu, Umuyobozi mukuru wungirije ushinzwe ubushakashatsi n’ikoranabuhanga mu buhinzi mu kigo cy’igihugu cy’ubuhinzi (RAB), yabwiye itangazamakuru ko kugeza ubu mu Rwanda hari abakiri bato bamaze kumenya akamaro ko gushora imari mu buhinzi aho yavuze ko imishinga myinshi iza gukorera mu Rwanda igamije guteza imbere ubuhinzi n’ubworozi ahanini bayikangurira gukorana cyane n’urubyiruko.

Dr Charles kandi yavuze ko mu myaka yo ha mbere wasangaga urubyiruko rufite imyumvire y’uko ubuhinzi bukorwa n’abakuze ariko kuri ubu ngo hari n’abana b’abakobwa binjiye mu buhinzi n’ubworozi aho hari n’umukobwa kuri ubu ufite uruganda rwe rutubura imigozi y’ibijumba.

Ati “Biriya rero ni ibintu bigaragaza ko bishoboka kandi bituma n’abandi bari inyuma mu mashuri babona ko ayo mahirwe ahari kandi bishoboka ko bashobora gushora imari muri ibi, icyo kintu rero kizakomeza gushyirwamo ingufu ninayo mpamvu n’iyi mishinga yose tuyikangurira gukorana n’urubyiruko ari urwarangije amashuri ari no mu mashuri kugira ngo umunyeshuri natangira kugira igitekerezo cy’ibyo azakora abashe kuwunoza abifashijwemo n’iyi mishinga ikorana na RAB na MINAGRI"

Kuri ubu I Kigali hateraniye inama y’iminsi itatu (Kuva tariki 14 Kugeza 17 Gicurasi 2017), ibaye ku nshuro ya 9 ikaba ihuje abagera kuri 50 baturutse mu bihugu bitandukanye aho bari kwiga ku buryo bwo kubyaza umusaruro amahirwe ari mu buhizi bw’ibinyabijumba.

Dr Charles Bucagu, Umuyobozi mukuru wungirije ushinzwe ubushakashatsi n’ikoranabuhanga mu buhinzi mu kigo cy’igihugu cy’ubuhinzi (RAB),
Umugiraneza Regis , Akangurira bagenzi be b’urubyiruko gushora imari mu buhinzi

Giriwanyu Paola usanzwe akora ibijyanye n’ubutubuzi bw’imbuto y’ibijumba
I Kigali hateraniye inama iri kwiga ku buryo bwo kubyaza umusaruro ibikomoka ku binjyabijumba


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
konka Monaco
IBARUWA ZA JORIJI
ora
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...