AMAKURU

UKWEZI
ubumwe

Huye: Imiryango 11 irasaba kurenganurwa, ngo yatwariwe ubutaka nta ngurane

Huye: Imiryango 11 irasaba kurenganurwa, ngo yatwariwe ubutaka nta ngurane
22-06-2019 saa 17:21' | By Nsanzimana Ernest | Yasomwe n'abantu 1046 | Ibitekerezo 1

Mu karere ka Huye hari imiryango 11 isaba ubuyobozi kuyifasha mu kibazo cy’ akarengane ivuga ko yakorewe n’ uwari burugumesitiri wa komine Ngoma mu 1997.

Bavuga ko batwariwe amasambu atuzwamo abatari bafite aho baba, banizezwa kuzahabwa inzu mu mudugudu washyizwe mu masambu yabo ntibazihabwa, ntibanahabwa ingurane y’ ubutaka bwabo.

Aba baturage bavuga ko ubu butaka Leta yatujeho abantu, ari ubutaka bwabo bwa gakondo. Ngo ikibazo cyabo bakigejeje ku nzego zitandukanye ariko babura ubarenganura.

Iyi miryango 11 yo mu Mudugudu Nyagisenyi Akagari ka Cyeru, Umurenge wa Mukura mu karere ka Huye ntizi impamvu idahabwa ubutabera.

Kabagwira Cecile yabwiye UKWEZI ko ikibazo cyabo bakigejeje ku nzego zitandukanye ariko babura ubarenganura.

Yagize ati “Njyewe ikibazo mfite ubutaka barabutunyaze babushyiramo ibikorwa by’ abadafite aho baba. Ntaho tutageze no ku karere twagiyeyo, nuko nabuze intege ahubwo zingeza I Kigali”

Avuga ko ubwo ubutaka bwabo bwakatwagamo ibibanza, Deo Twagirayezu wari konseye wa segiteri yabo yababwiye ngo bagende abandike nabo bazahabwe amazu.


Kabagwira Cecile

Ati “Ku munsi wo gutanga haje abaturage b’ iyo I Kigali tutazimo n’ umuturage w’ ino wa kamere, bagenda bahamagara buri muntu bamuha imfunguzo, bahamagara undi bamuha imfunguzo, umudugudu barawutanga barawurangiza. Tubaza Deo , ese ko watwanditse utubwira ko bazaduha inzu, kandi isambu ko ari iyacu, kuki mutaduhayemo amazu? Ati ‘urebe ko hari iyo mfashemo?’”

Uwizeyimana Deogratias, umwe mu basaza bavuga ko batwariwe amasambu ati “Ikibazo dufite ni amasambu yacu batwaye ntibaduhe ingurane, bagatuzamo abantu, abatuyemo kandi bo bava hano bakajya kugurisha iwabo bakongera bakagaruka bakagura amasambu. Twebwe ubu twabuze amerekezo ntitugira hepfo no haruguru”

Uwizeyimana avuga ko iki kibazo bakigejeje ku buyobozi basanga uwo barega niwe baregera. Ngo aya masambu yatanzwe na konseye Deo Twagirayezu afatanyije n’ uwari bourgmestre wa Komine Ngoma witwa Terrence bavuga ko ayo masambu ba nyirayo badahari kandi bahari.

Ati “Turagenda bakatugura ntitubone n’ aho tujya”

Aba baturage bavuga ko badafite aho bahinga kuko isambu yabo uwari burugumesitiri yayihaye umuryango Rotary Club ukayubakiramo abatari bafite aho baba.

Mundanikure Marie Goreth avuga ko kuba isambu y’ ababyeyi be yaratanzwe byamugizeho ingaruka. Ati “Nta hantu nahamwe mfite mpinga ndya nshiye inshuro. Imyaka maze yose nyimaze nshya inshuro singira aho mba, ndararaguza, na hano naharara n’ abana banjye batanu(yerekana mu rutoki)”.

Mu ijwi ryumvikanamo ikiniga Mundanikure yagize ati “Icyo nsaba Leta ni uko yampamo inzu nanjye ngashyiramo utwana twanjye nta kindi”.

Mukamana Theodette wahawe inzu mu mudugudu wubatswe mu masambu y’ aba baturage avuga ko nawe ikibazo cyabo kimubabaza kuko babayeho nabi.

Yagize ati “Bano bavandimwe nanjye barambabaza pe! Aya masambu bavuga nyafitemo inzu, naje ino muri 2001 nkimara kuza nasanze amazu bamaze kuyubaka, bamwe bakavuga ngo ayo masambu beneyo barahari, ngo bayubatsemo bazabahamo amazu, nabashije kubonamo inzu”

Mukamana avuga ko muri ba nyiri amasambu abantu 2 gusa aribo babonyemo amazu akemeza ko abandi ntaho bafite baba.

Ati “Icyo njyewe nshaka kubasabira ni uko babona amazu yo kubamo nk’ uko natwe twayabonye. Natwe twari tubabaye pe! Uburyo ayo masambu bayatanze bavugaga ko ayo masambu batayabamo, abandi ngo bayabasohoyemo twe ntabwo tubizi twaje mu byuzuye uretse ko babiduhora”.

Nubwo aba baturage bavuga ko iki kibazo bakigejeje ku nzego z’ ubuyobozi , Umunyamabanga Nshingwabikorwa w’ Umurenge wa Mukura avuga ko iki kibazo atakizi. Yizeje aba baturage ko agiye gukurikira iki kibazo bakarenganurwa.

Ngabo Fidèle yabwiye UKWEZI ati “Ariya mazu yubatse ko nziko ari mu butaka bwa Leta? Ni ubwa mbere mbyumvise n’ ubu ng’ ubu hari amazu agera muri 13 tuhujuje tuhakorera umuganda kenshi nta muntu urambwira icyo kintu. Ndaza kubaza numve ariko rwose icyo kibazo ni ubwa mbere cyumvise”.

Uyu mudugudu wubatswe na Rotary Club ugizwe n’ amazu 100. Ba nyiri amasambu bahawemo inzu ni babiri indi miryango 11 yose nta mazu yahawe nta n’ ingurane.


INKURU ZA :
Tanga Igitekerezo
Ibitekerezo 1
ndusengimana fidel Kuya 23-07-2019

vip MINANI

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...