AMAKURU

UKWEZI

Huye: Umusore yishe mugenzi we amuhondaguye ubuhiri mu mutwe

Huye: Umusore yishe mugenzi we amuhondaguye ubuhiri mu mutwe
12-09-2018 saa 07:33' | By Vincent Nsengiyumva | Yasomwe n'abantu 2680 | Ibitekerezo

Umusore witwa Uwiringiye wo mu Kagali ka Sovu mu Murenge wa Huye mu Karere ka Huye yatawe muri yombi akekwaho icyaha cyo kwica umugabo witwa Sindikubwabo Yohani amukubise ubuhiri mu mutwe.

Aya mahano yabaye ku mugoroba wo ku wa mbere tariki ya 10 Nzeri 2018 mu aba bagabo bombi bari batuye.

Bivugwa ko aba bagabo babanje kurwanira mu rugo barimo basangiriramo inzoga, abantu barabakiranura, Uwiringiye ntiyashyirwa aza gukurikira nyakwigendera amuhondagura ubuhiri kugeza amwishe.

Abaturage bo muri aka kagali ka Sovu batangaje ko uyu Sindikubwabo wari umukozi w’irondo ry’umwuga, ngo yari asanzwe azwiho ubusinzi no gukoreesha ibiyobyabwenge, aho yakundaga gufatirwa mu bikorwa by’urugomo.

Umwe yagize ati “ Barimo basangira inzoga baza kugirana amakimbirane bararwana turagenda turabakiza ariko dusanga Uwiringiye yakubise Sindikubwabo ikintu agwa agaramye.Twatesheranyije turamwegura maze aragenda. Ubwo Uwiringiye yaje kumukurikirana amusanga iwe amuhondagura ubuhiri kugeza amumazemo umwuka.”

Undi yagize ati “Barwaniye kwa Bizimana aho barimo basangirira inzoga.Uwiringiye yahagurutse agiye kunyara, asigira inzoga Sindikubwabo, asomyaho umuntu, Uwiringiye agarutse ahita atangira intambara.Babakiranuye Sindikubwaho aramuhunga, icyo gihungu (Uwiringiye) cyamukurikiranye kimwicira mu rugo rwe kimuhondaguye ubuhiri cyari gifite.”

Umuvugizi w’Urwego rw’igihugu rw’Ubugenzacyaha (RIB), Mbabazi Modeste yatangaje ko uru rugomo rwateje ubwicanyi rwatewe n’ibiyobyabwenge. Yavuze ko ukekwaho ubwicanyi yatawe muri yombi ubu akaba ari mu maboko y’Ubugenzacyaha.

Yagize ati “Amakuru dufite ni uko hari abasore babiri barwanye, umwe afata umuhini akubita mugenzi we. Uyu wakubiswe yahise ajyanwa kwa muganga aza kugwayo. Ukekwaho ubwicanyi yafashwe ari gukurikiranwa n’Ubugenzacyaha.”

Yunzemo ati “Bishobora ko icyateye ubwo bwicanyi ari ikoreshwa ry’ibiyobyabwenge cyane ko ucyekwaho icyaha yasanganwe urumogi mu mufuka w’imyenda yari yambaye.”


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...