AMAKURU

UKWEZI
ubumwe

Ibyamamare bikoresha ibiyobyabwenge ngo bikwiye guhanwa by’ intangarugero

Ibyamamare bikoresha ibiyobyabwenge ngo bikwiye guhanwa by’ intangarugero
10-01-2020 saa 04:17' | By Nsanzimana Ernest | Yasomwe n'abantu 848 | Ibitekerezo

Imwe mu miryango itari iya Leta ikorera mu karere ka Nyanza isanga impamvu ikomeye ituma ibiyobyabwenge bidacika burundu kandi abaganga bagaragaza ububi bwabyo, Leta igafunga ababikoresha, n’abanyamadini bakigisha ko kubikoresha ari icyaha ari uko bikoreshwa n’ibyamamare.

Byatangajwe kuri uyu wa 9 Mutarama 2020 ubwo amadini n’ amatorero akorera mu karere ka Nyanza yatangiraga ubukangurambaga bwo kurwanya ibiyobyabwenge mu rubyiruko.

Umuhuzabikorwa wa Compassion International mu karere ka Ruhango n’aka Nyanza Bahati Yusufu avuga ko ibiyobyabwenge babibona nk’icyorezo.

Bahati asanga impamvu ibiyobyabwenge bidacika burundu ari uko hari ababyeyi babikoresha bigatuma abana babo nabo babikoresha hakiyongeraho kuba hari abasitari babikoresha kandi abasore n’ inkumi babafatiraho urugero.

Yagize ati “Iri terambere dufite rituzanira ibyiza ariko rikatuzanira n’ibibi. Abantu bitwa ngo ni abasitari baba ari abo mu gihugu cyangwa se n’ abo hanze bose usanga barimo abakoresha ibiyobyabwenge. Amaradiyo yirirwa yamamaza runaka bamufunze kubera urumogi, runaka bamufunze kubera iki, abana bacu abo nibo babona nk’ibyitegererezo”.

Avuga ko hari abana bumva ko kudakora ibyo umusitari yakoze ari uguhomba.

Ati “Nitunarwanya ibiyobyabwenge abafite ubushobozi bakwiye guhera ku ba role models bakabahana rwose bakareka kutwangiriza abana babajyana mu biyobyabwenge kuko icyo akoze icyo aricyo cyose, arara yogoshe inyogosho igakwira igihugu cyose yanywa urumogi kuri radiyo bakabivuga ubwo urumogi rugakwira muri bose”.

Mugema Dieu Donné , Pasiteri mu itorero methodiste Lible mu Rwanda paruwasi ya Nyanza avuga ko kwigisha abayoboke kwirinda ibiyobyabwenge ariyo yakabaye intego y’ abanyamadini kuko roho nzima itura mu mubiri muzima.

Akomeza agira ati “Impamvu bidacika bipfira mu muryango, umwana atarabonye uburere shingiro buriya bwo hasi ngo akure akunzwe, akure yitaweho, akure yerekwa ikibi n’ icyiza, yange ikibi akunde icyiza, icyo gihe ntabwo tuzabona abantu bazima niyo mpamvu turi aha kugira ngo dufatanye na Leta n’ inzego z’ umutekano turebe ko twarokora umuntu uzaba muzima muri iki gihugu cyacu”.

Pasiteri Mugema avuga ko iyo abana bakoresheje ibiyobyabwenge bibagiraho ingaruka zirimo no kuba batwara inda imburagihe kuko ubwenge bwabo buba bwayobye.

Pasiteri Kabayiza Louis Pasteur, ukuriye amadini n’ amatorero mu karere ka Nyanza avuga ko karitsiye zibamo ibiyobyabwenge bazizi. Izo karitsiye ngo ni ahitwa Mugonzi, Bleu Blanc, Kavumu, na Mukoni.

Avuga ko iyo umuntu yatangiye kujya mu biyobyabwenge haba hakenewe ko abanyamadini bamusanga bakamwigisha inkuru nziza ya Yesu Krisito imubatura muri ibyo biyobyabwenge akaba umuntu utanga umusaruro ku gihugu no mu itorero.

Past. Kabayiza asanga impamvu ya mbere ikomeye ituma ibiyobyabwenge bidacika ari uko bibamo amafaranga. Ati “Birimo bisinesi ikomeye, bigatuma abantu bagenda bakurikiyemo amafaranga, icya kabiri ni ikigare. Mu rubyiruko iyo umwe yabinyoye akabwira mugenzi we ko harimo swingi bagenda babyanduzanya gutyo gutyo”.

Muri ubu bukangurambaga bwo kurwanya ibiyobyabwenge bwateguwe n’ abanyamadini ku nkunga ya compassion international isanzwe ifatanya n’ abanyamadini habaye urugendo rwo kubyamagana, bazasura abaturage mu ngo bababwire ububi bwabyo, bakoreshe n’ibiterane abazihana bazakomeze bage mu madini babatizwe.

Mu rwego rwo guhashya ibiyobyabwenge Leta y’ u Rwanda yakajije ibihano aho bishobora kugera ku gifungo cya burundu ku muntu ufatanywe ibiyobyabwenge nka kanyanga n’ urumogi.

Intego bihaye ni ukugera ku bantu ibihumbi 3 babasanze mu ngo bibanze mu bibonekamo ibiyobyabwenge kurusha ibindi. Akarere ka Nyanza ni kamwe mu turere 8 tugize Intara y’Amajyepfo. Gatuwe n’ abaturage 323 719.


INKURU ZA :
Tanga Igitekerezo
Ibitekerezo
English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...