AMAKURU

UKWEZI
pax

Kabuga aragezwa imbere y’urukiko, ngo inzira yatumye afatwa yanyuze ku mwana we

Kabuga aragezwa imbere y’urukiko, ngo inzira yatumye afatwa yanyuze ku mwana we
19-05-2020 saa 10:48' | By Nsanzimana Ernest | Yasomwe n'abantu 12540 | Ibitekerezo 3

Umunyemari Kabuga Félicien uherutse gufatirwa I Paris mu Bufaransa nyuma y’imyaka 26 yari amaze yihishahisha ubutabera bumukurikiranyeho uruhare rukomeye muri Jenoside yakorewe Abatutsi mu 1994, aragezwa imbere y’Urukiko rwo muri iki gihugu yafatiwemo.

Biteganyijwe ko kuri uyu wa Kabiri tariki 19 Gicurasi 2020, I Paris aribwo Kabuga agezwa imbere y’Urukiko kugira ngo hafatwe umwanzuro ujyanye n’aho azaburanishwa niba azajyanwa i Arusha muri Tanzania cyangwa niba azoherezwa i Hague mu Buholandi.

Umunyamategeko Emmanuel Altit, uri ku ruhande rw’abunganira Kabuga, yabwiye Reuters ko kuri uyu wa Kabiri aribwo umukiliya wabo aza kwitaba Urukiko.

Urukiko rugomba kumumenyesha ibyo aregwa, ikirego kigashyikirizwa abacamanza bazagikurikirana mu gihe kitarenze iminsi umunani.

Nibo bazafata umwanzuro niba Kabuga yoherezwa Rwego rwasigariyeho Inkiko Mpuzamahanga Mpanabyaha, IRMCT i Arusha.

Mu gihe Kabuga yaba ajuririye imyanzuro yarwo, ikirego kizoherezwa mu rukiko rusesa imanza arirwo rufata umwanzuro.

Kabuga yafatiwe ahitwa Asnieres-sur-Seine mu Bufaransa tariki 16 Gicurasi, asanzwe mu nzu yo guturamo ikodeshwa ‘apartment’.

Eric Emeraux,Umuyobozi wa Jandarumori centrale mu ishami rishinzwe kurwanya ibyaha bibasira inyoko muntu avuga ko bakurikiranye umwana wa Kabuga basanga akodesha muri iyo apartment bakeka ko nawe ariho aba bamennye urugi bamusangamo.

Ati “Twavumbuye ko umwe mu bana be akodesha hariya. Dufata icyemezo cyo gufungura urugi tutazi neza ikirimo imbere. Ntabwo nasinziriye mu ijoro ryabanje”.

Umunyarwanda Kabuga Félicien akekwaho ibyaha birimo gutera inkunga interahamwe zakoze Jenoside yakorewe abatutsi, igahitana abarenga miliyoni.

Kabuga ngo yabaga mu igorofa rya gatatu kuri uyu muturirwa. Abari baturanye nawe bavuga ko mbere y’uko guma mu rugo itangira uyu musaza w’imyaka 84 yajyaga asohoka agatembera hanze.

Bavuga ko babonaga ari umusaza uvuga make cyane. Bikekwa ko Kabuga yaba yari amaze imyaka 4 cyangwa 5 aba muri iyi nzu.

Kugeza ubu ntacyo Kabuga aratangaza ku byo aregwa, n’umunyamategeko Emmanuel Altit uri mu itsinda rizamuburanira ntacyo aravuga.

Uyu munyamategeko Emmanuel Altit yanaburaniye Laurent Gbagbo yahoze ari Perezida wa Cote d’Ivoire wari ukurikiranyweho n’urukiko mpuzamahanga mpanabyaha ibyaha byibasiye inyoko muntu.


INKURU ZA :
Tanga Igitekerezo
Ibitekerezo 3
Daniel Kuya 21-05-2020

Nakurikiranwe nubutabera batitaye ko arumusaza

MABANO ROMEO Kuya 20-05-2020

Bamukurikirane kbsa kndi bazamuhane bivuyinyuma batitayeko arumusaza ikibabaje nuko afashwe arumusaza iyobamufata akigifite nkimya yubusore niho byarikubs byiza akumva uburibwe bwabo yiciye, arkubundi uki umuntu nkuwo batamwica koko ?

Omben no west huber Kuya 19-05-2020

Koko mubyukuri urwanda rwanyuz mubikomey mugih cya jenocide yakorew abatuts muri mata nasabaga ko kabuga yazanw kuburanishw mu rwanda kbs

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...