AMAKURU

UKWEZI

Kigali: Imvura yahitanye umuryango w’abantu 4 bari baryamye mu nzu

Kigali: Imvura yahitanye umuryango w’abantu  4 bari baryamye mu nzu
24-04-2018 saa 12:07' | By Akayezu Jean de Dieu | Yasomwe n'abantu 6122 | Ibitekerezo 2

Mu ijoro ryo kuwa Mbere rishyira kuwa Kabiri tariki 24 Mata 2018, mu mudugudu wa Dusenyi, akagari ka Kagugu, umurenge wa Kinyinya mu karere ka Gasabo ho mu Mujyi wa Kigali, imvura idasanzwe yaraye iguye muri aka gace ihirika inzu yari iryamyemo umuryango w’abantu bane bose bahita bitaba Imana.

Abaguye muri iyi mpanuka ni uwitwa Mbonyemwita Selvator w’imyaka 34 n’umugore we Mutezimana Jean Darc w’imyaka 31 y’amavuko.

Iki gikuta cy’inzu kandi cyabagwiriye bari kumwe n’abana babo babiri harimo Danny w’imyaka 5 ndetse na Dennayat w’imyaka 3 y’amavuko aho aba bose uko ari bane bahise bitaba Imana.

Ubuyobozi bw’umurenge wa Kinyinya buvuga ko iyi nzu yagushijwe n’imvura itari ikomeye dore ko ngo ari zimwe ziba zarubakishijwe amatafari ya rukarakara akenshi aba adakomeye. Ikindi kandi ngo ni za nzu ziba zarubatswe rwihishwa nta burenganzira ba nyir’ukuzubaka bahawe.

Umunyamabanga Nshingwabikorwa w’Umurenge wa Kinyinya, Umuhoza Rwabukamba yabwiye Ukwezi.com ko iyi nzu yaraye igwiriye uyu muyango ahagana saa Cyenda z’urukerera rwo kuri uyu wa Kabiri.

Igikorwa cyo gukura imibiri yabo muri aya mabuye yari yabagwiriye kikaba cyabaye muri iki gitondo ndetse bakaba bahise bajyanwa kwa muganga gukorerwa isuzuma hanategerejwe igihe abo mu muryango wa ba nyakwigendera baza kwemeza ibijyanye n’ishyingurwa ryabo.

Mu itangazo ryasohowe na Minisiteri Ishinzwe Impunzi n’Imicungire y’Ibiza, MIDMAR yavuze ko imvura yaraye iguye mu ijoro ryakeye yahitanye abantu 18 mu turere dutandukanye tw’igihugu turimo Rulindo na Gasabo.

Mu karere ka Rulindo abapfuye bazize iyi mvura ni 7 naho akarere ka Gasabo abahasize ubuzima ni 8 mu gihe akarere ka Gatsibo ko abapfuye bazize iyi mvura ari 3. Iyi Minisiteri yakomeje ivuga ko imibare y’ibindi byangijwe n’iyi mvura ikiri kwegeranywa.


INKURU ZA :
Tanga Igitekerezo
Ibitekerezo 2
gakuba Kuya 25-04-2018

imana ibakire ,bijye bisobanuka ntabwo izo nzu zubakwa rwihishwa zubakwa kubufatanye ni nzego zi midugudu nu tugari niko kuri*

dada Kuya 24-04-2018

Biruhukire mumahoro biteyagahinda.nonese barasuzumwiki niba bagwiriwe ninvura.

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...