AMAKURU

UKWEZI

Kigali: Umunyamakuru ahangayikishijwe n’umukire wamwanditseho imodoka za miliyoni 347

Kigali: Umunyamakuru ahangayikishijwe n’umukire wamwanditseho imodoka za miliyoni 347
15-10-2018 saa 16:28' | By Chief Editor | Yasomwe n'abantu 12424 | Ibitekerezo 13

Niyonsenga Dieudonne, umunyamakuru wakoreye ibitangazamakuru bitandukanye mu Rwanda, avuga ko yabujijwe amahoro n’umunyemari witwa Twagiramungu Jean Marie wamwanditseho imitungo igizwe n’imodoka zifite agaciro k’amafaranga y’u Rwanda akabakaba miliyoni 400, ibi ngo bikaba byaratumye kugeza ubu arimo umwenda munini w’imisoro kandi nta bikorwa by’ubucuruzi yigeze, kandi ngo nta mutuzo afite kuko uwamwanditseho iyo mitungo ahora yigamba ko azamugirira nabi.

Mu kiganiro kirambuye cy’amajwi n’amashusho Niyonsenga yagiranye n’Ikinyamakuru Ukwezi, yadutangarije ko Twagiramungu Jean Marie bafitanye isano kuko ba se bava inda imwe, ikigeretse kuri byo ngo yanamubereye umubyeyi wa batisimu (Parrain). Avuga ko yabaye igihe kirekire mu rugo rwa Twagiramungu ndetse akajya anamufasha mu bikorwa bitandukanye by’ubucuruzi bwe, nyuma akaza gutungurwa n’uko yasanze uyu yafataga nk’umubyeyi we yaramwanditseho ubucuruzi bw’imodoka zigera kuri 16 zifite agaciro k’amafaranga y’u Rwanda 347.000.000.

Niyonsenga avuga ko yahaye indangamuntu ye Twagiramungu Jean Marie amubeshya ko agiye kuyikoresha mu kumushakira ibyangombwa byo kujya kwiga mu mahanga, ariko akaza kumenya ko yashakaga kuyikoresha mu kumwandikaho imodoka no kuzigurisha mu mazina ye akanamusinyira kugirango amanyanga no kudatanga imisoro bizabe ari we bibarwaho.

Uretse kuba ngo Twagiramungu yaragurishaga imodoka mu mazina ya Niyonsenga, ngo n’amafaranga yazigurishaga si yo yagaragazaga ku kigo cy’imosoro n’amahoro, kuburyo ngo izi modoka zose yagurishije kuri 347.000.000 z’amafaranga y’u Rwanda, we yagaragarije ikigo cy’imisoro n’amahoro ko yazigurishije amafaranga y’u Rwanda 194.000.000 bivuga ko agera ku 153.000.000 yo atayasoreye ku bw’uburinganya nk’uko Niyonsenga abishimangira. N’ubwo yabikoze gutya ngo umusoro ugabanuke ariko nabwo ngo ntiyawutanze kuko yari azi ko bitanditse ku mazina ye.

REBA VIDEO UKO NIYONSENGA ABISOBANURA BYOSE HANO:

Niyonsenga avuga ko amaze kumenya iby’uko Twagiramungu yamwanditseho imodoka, yamusabye ko yakwishyura imisoro kugeza ubu ibarirwa muri miliyoni 20 z’amafaranga y’u Rwanda hanyuma bakabona gufungisha inomero iranga usora (TIN Number), ariko ibi ngo ntiyigeze abyemera ahubwo yamugiraga inama yo kwemera akamuha amafaranga y’u Rwanda 2.000.000 akabiceceka kuko yamwizezaga ko ikigo cy’imisoro n’amahoro nikibona nta mitungo afite cyafatira ntacyo kizamutwara azaba ahejeje iyo misoro burundu.

Niyonsenga akomeza avuga ko Twagiramungu yanateranyije inama y’umuryango ababwira ko uwo afata nk’umuvandimwe ashaka kwirengagiza isano ngo igihugu cyunguke umuvandimwe ahombe, ibi ariko nabyo abo mu muryango ntibabyumvikanyeho kuko ababyeyi ba Niyonsenga bemeje ko imisoro yakwishyurwa ntazirengere ingaruka z’amanyanga yakozwe na Twagiramungu Jean Marie.

Niyonsenga avuga ko ibimenyetso bihari, by’uko ubucuruzi Twagiramungu yamwanditseho atigeze abukora na rimwe mu buzima bwe

Ibi byose ariko Niyonsenga avuga ko yagerageje kubivuga mu kigo cy’igihugu gishinzwe kwinjiza imisoro n’amahoro, ibaruwa dufitiye kopi yabandikiye muri Gashyantare uyu mwaka akaba atarayibonera igisubizo gihamye, dore ko avuga ko uwitwa Bayingana Frank ukora muri iki kigo yahawe inshingano zo gukurikirana iki kibazo ariko ngo aho bigeze ntacyemera no kwitaba telefone ya Niyonsenga, kuburyo byatumye akeka ko Twagiramungu yaba yaratanze amafaranga ngo iyo dosiye ye gucukumburwa, cyane ko ngo na Twagiramungu ubwe yagiye amwibwirira kenshi ko amafaranga afite azayakoresha mu guhangana nawe.

Niyonsenga kandi yanandikiye urwego rushinzwe ubugenzacyaha (RIB) yishinganisha anarumenyesha amakuru y’uko Twagiramungu ashaka kumugirira nabi, aho ngo yagendaga ashakisha aho Niyonsenga atuye hose anaha abantu amafaranga ngo bazamunekere aho Niyonsenga aba banakurikirane ibikorwa aba arimo byose, ibi bikaba byaratumye uyu munyamakuru ahora yimuka kuko ahangayikishijwe n’umutekano we. Niyonsenga anavuga ko ubu nta kazi afite kuko Twagiramungu yagiye mu kigo cy’itangazamakuru uyu Niyonsenga yakoragamo, akababwira ko bakwiye kumwirukana kuko ngo ari umugambanyi nabo azabagambanira, bigatuma bagira impungenge bakamuhagarika ku kazi.

Ibi ngo akeka ko Twagiramungu yabikoze agirango ubushomeri nibumara kumuzahaza, azace bugufi yemere amafaranga macye yamuhaga kugirango akunde yemere guceceka no kutagira icyo akora ku misoro yamugiyeho kubera kwandikwaho ubucuruzi bw’imodoka za Twagiramungu.

Uyu munyemari ucuruza imodoka n’ibikoresho byazo, ngo hari n’ubundi buryo bwinshi akoresha mu kunyereza imosoro dore ko hari n’abandi yagiye yandikaho imodoka bagera kuri batanu nk’uko Niyonsenga abihamya. Ngo akoresha amayeri menshi kandi arimo guhisha bimwe mu bicuruzwa bye mu rugo ngo adatanga inyemezabwishyu, akanajijisha mu kugaragaza iby’ubucuruzi bwe kuburyo n’abamwishyura bose aba afite amakonti menshi muri banki atanditse ku mazina ye akaba ari ho ashyira ayo mafaranga.

Ikinyamakuru Ukwezi.com cyabonanye na Twagiramungu Jean Marie tumubaza ku byo avugwaho byose, asubiza ko nta byinshi yabivugaho kuko ngo Niyonsenga Dieudonne yabijyanye mu nkiko bityo ngo bizakemurwa n’abacamanza. Nyamara ku rundi ruhande Niyonsenga we ahamya ko nta rukiko baragezamo icyo kibazo ahubwo ngo Twagiramungu yanze kubivugaho kuko azi neza amanyanga yakoze.

Umunyemari Twagiramungu Jean Marie ushinjwa kwandika imodoka ku bandi bantu ngo anyereze imisoro

Twagiramungu kandi yavuze ko ibyo ashinjwa bishingiye ku makimbirane yo mu muryango, anahamya ko nta mafaranga yacuruza imodoka zingana gutyo yakwibonera, arahira burundu iby’uko yaba ajya acuruza imodoka. Mu bucukumbuzi ikinyamakuru Ukwezi.com cyakoze, cyabonanye n’umuntu warangiwe imodoka yo kugura kwa Twagiramungu Jean Marie, anaduhamiriza ko iyo modoka itaragurwa ahubwo iparitse mu rugo kwa Twagiramungu hamwe n’izindi.

Umunyamakuru yabashije kugera kuri urwo rugo ruri mu murenge wa Kacyiru, abona zimwe mu modoka ziparitse aho mu rugo zirimo iyo uwo muntu yavugaga ko yarangiwe ariko ntibumvikane ku biciro, anashimangira ko asanzwe azi iby’uko uyu mugabo acuruza imodoka kandi abimazemo igihe kirekire.

Aha ni mu rugo kwa Twagiramungu Jean Marie, izi ni zimwe mu modoka abantu bemeza ko acuruza

Ubwo yakiraga indahiro y’abadepite bashya mu Nteko Ishinga Amategeko y’u Rwanda, Perezida Paul Kagame yagarutse ku banyereza umutungo wa Leta barangiza bakawandika ku bandi, aho yavuze ko abakora ibyo bazashakishwa bakabyishyuzwa kandi bakanafungwa.

REBA VIDEO Y’IKIGANIRO CYOSE HANO:


INKURU ZA :
Tanga Igitekerezo
Ibitekerezo 13
Tess Kuya 4-11-2018

Mari nzi abanyarwanda mwasobanutse none muracyari injiji mwese uyu Niyonsenga mwamwihaye kandi bifite ukuru .bamwe muri kwigira abahanga mukamwiha kuko muziranye nibyo gikire kigisambo bimwe nabavandimwe n’inshuti zacyo zirikubyandika ngo mukunde mumenase Niyonsenga Dieudonne Humura

Claude Kuya 18-10-2018

Aka kanyamakuru ni agaswa ahubwo!!niba se zikimwanditseho yazishyize recherche niba yumva arengana!!

John Kuya 17-10-2018

Wamusore ayo nayanda, kbsa ureke guharabika. Amakimbirane yo mumuryango ntogo akemurwa gutyo. Kdi ntago mpamyako ukunda igihu kurusha uriya mugabo kuko ndakuzi bihagije, uri umunyamanyaga. Uriya Mugabo yarakureze yakwishuriye ishuri, bakwirukana kukazi kawe wirengagije amanyanga wari wakoze. Shakishiriza ahandi nuko turakuzi neza, ureke gusebya umuntu.

Natasha Kuya 17-10-2018

Ibi bintu bibaho cyane. Jye mfite inshuti yanjye ubu yataye umutwe. Kuko nyirarumwe yamwanditseho business ye, undi akumva ko aruko amwizeye ko atamuhemukira, kuko iyo nshuti yanjye ifite akazi keza. Ubwo uncle we ntiyishyuye imisoro. None Rwanda revenue yafatiriye inzu ye yari arangije kubaka ya etage, igiye kuyiteza cyamunara. Ubu uwo mugabo ameze nk’uwasaze kuko yaburanye agatsindwa, kandi Yarambwiye ati ikimbabaza nuko uncle afite andi mazu,ati none RRA igiye guteza iyanjye kandi ari ngira yonyine. Mbese ni ibibazo mw’abantu mwe. Abapinga ibyo uyu muhungu avuga nimuceceke, ntimugashyigikire amafuti, Iyi si nta muvandimwe ukibaho. Bibilia ivuga ko abanzi b’umuntu ari abo mu rugo rwe.

MGH Kuya 16-10-2018

Ahubwo uramuhindutse wabwiwe niki itariki nigiciro yazigurishijeho mwarafatanyije uramuhindutse narebye uburyo uvuga usa nufite amanyanga we kwigira umuntu ukunda igihugu cyane wa mutekamutwe we se iyo ugikunda ko utabivuze bigitangira bagukande hubwo

Claude Kuya 16-10-2018

ine ni uko imiryango mbega ibibazo,,cha pole nyine imiryango ni uko isigaye yarabaye,,gusa ndumva ibi bintu bikomeye

Mukamana Kuya 16-10-2018

Nimwumva iyo vidio mwitonze Murabona ko akogahungu hari ibyo yari yagasezeranije ntabigahe kdi wasanga bariyabandi yavuze hari ibyo yabahaye k

Gruec Kuya 16-10-2018

Nubwo mutumva uyu munyamakuru, uwo bitarabaho ntashobora kubyumva, byambayeho muri 1996 aho umuvandimwe yakiye inguzanyo mu mazina yanjye ingana na 37000000 Frw atabimbajije ndetse no kubimenya naje guhamagarwa na oncle ambwira ko yabisanze mu kinyamakuru "UMUSESO". Icyo nshaka kubabwira nuko NIYONSENGA atariwe wenyine mu Rwanda. Abantu benshi baramaranye ngo barahishirana ntabyo guhishira umuntu uguhamba utarapfa kuko kukwandikaho de 400 million wowe utagira n’ibihumbi 50 in your own b’uburozi en soi kuko ntushobora kugira icyo uteganya gukora ni prison ya burundu. Niyonsenga humura ukorora acira aba agabanya naho wakwicwa ayo madeni ntayo uzajyana nyirayo nayasubirane.

Kalisa Edouard Kuya 16-10-2018

Iyi nkuru ni nziza,ariko uwo musore bigaragara ko aramakimbirane Reka tube amaso

kaka Kuya 16-10-2018

ibibigabo byose nibisambo

Lasss Kuya 15-10-2018

Sha Gusa uko byari kose nawe uri inyana ya ryatungo pe ese ikosa rikosozwa irindi? Ubwo rero wigize I NTWALI ahaha Sha ukuruta aba akuruta nubwo wakora iki uzaguma munsi ye ngo ntabyo wari uzi? Niba hari ibyo mutumvikanyeho iyo mubicoco mumuryango ntujye kuduhindura injiji abasomyi ubwonge bwawe burangana nibyo wakoze pe ubworero uziko imitate murwobo urimukase ubwo ayinzu yo urayafitera? Sha uwakunyereka cg akambwira nkaho wize ko utari imbwa yirirwa irega abandina ibyo bakoze kukazi siwe wakwirukanishije shakira mumutwe wawe urimo ubusa nuwaguha akandi ntiwagakora rwose

gakuba Kuya 15-10-2018

ubwo izo modoka zivugwa ko zagurishijwe hazagaragara abazitunze, hamenyekane amazina yuwari, nyirazo abazitunze berekane uwo baziguriye ni bigaragara ko aliwe wazigurishaga bizagaragaza, ko uwo uvuga alibyo uwo mubyo azabazwa, harimo ninyandiko mpimbano kuko yakoze ihinduranya kumazina, atari aye asinya, yiyita undi muntu,

HAVUGIMANA Kuya 15-10-2018

Nyuma yo gusoma iyi nkuru hari icyo mbivugaho;
1. Birashoboka ko aba bavandimwe batangiye bumvikana bose bagamije kunyereza imisoro ariko bakaza kugira ibyo batumvikanaho kura ko nubwo avuga ibyo yafunguje TIN number, icyo gihe niwe ufite ownership cg inshingano zo kwishyura imisoro, izo modoka zishobora kuba zaragiye zigurishwa kandi mutation ntishoboka uwo yanditseho atagaragaye, icyo gihe ntiyegeze abivuga, nubwo ntavugira RRA biragoye ko yakwimura imisoro iyishyira kuwo itanditseho nta cyemezo cy’urukiko, bivuze ko yaregera urukiko rugatanga umurongo wuko imisoro izamuvaho. Ngarutse kuwanditseho iyo mitungo, nawe yakoze fraud bimuhamye yagombye kubihanirwa kuko ni umuco wese aho abantu bakunze kunyereza umusoro bakorera mu kwaha kwabataragira ubushobozi. Gusa ubwo bigiye ahagaragara biraza gukemuka ibya rubanda bigaruzwe. Byari ibitekerezo byange

English
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA
Loading...