AMAKURU

UKWEZI
pax

Akarere ka Nyanza kazamara hafi umwaka wose kadafite Visi Meya Sociale

Akarere ka Nyanza kazamara hafi umwaka wose kadafite Visi Meya Sociale
2-07-2020 saa 19:44' | By Nsanzimana Ernest | Yasomwe n'abantu 2835 | Ibitekerezo

Umuyobozi w’ Akarere ka Nyanza Ntazinda Erasme yatangaje ko umwanya w’ umuyobozi w’akarere wungirije ushinzwe imibereho myiza y’abaturage uzagumana icyuho kugera mu kwezi kwa 12 manda ya komite nyobozi z’ uturere irangiye.

Mu ntangiro z’ukwezi kwa 2 uyu mwaka nibwo Umutesi Solange wari umuyobozi w’akarere ka Nyanza wungirije ushinzwe imibereho myiza y’ abaturage yagizwe Umuyobozi Nshingwabikorwa w’Akarere ka Kicukiro. Ibi byabaye nyuma y’ amavugurura yari aherutse gukorwa mu mitegekere y’uturere dutatu tugize uyu mujyi.

Meya Ntazinda mu kiganiro yagiranye n’abanyamakuru kuri uyu wa 2 Nyakanga 2020 yavuze ko icyorezo cya covid-19 cyaburijemo amatora yari gushyiraho visi meya sociale mushya wa Nyanza..

Iki cyorezo ngo cyageze mu Rwanda mu gihe abakandida kuri uyu mwanya bari batangiye kwiyamamaza, ariko kubera ko ingamba zo kucyirikirinda zahise zihagarika ibikorwa bihuza abantu benshi aya matora nayo yahise asubikwa.

Uko amezi yakomeje kwisunika, byahise bigera mu gihe bidashoboka gushyiraho umuyobozi w’akarere, cyangwa umuyobozi w’akarere wungirije.

Itegeko ngenga rigenga amatora rivuga ko iyo umuyobozi w’akarere cyangwa umuyobozi w’akarere wungirije avuye muri uyu mwanya asigaje igihe kitarenze amezi 6 ngo arangize manda adasimbuzwa undi wo kurangiza iyo manda.


Umutesi Solange wahoze ari Umuyobozi wungirije ushinzwe imibereho myiza y’abaturage mu Karere ka Nyanza

Niko byagenze kuri uyu mwanya w’umuyobozi w’akarere ka Nyanza wungirije ushinzwe imibereho myiza y’abaturage kuko gutinda kw’itora bitewe na covid-19 byatumye igihe cya manda ya komite nyobozi z’uturere zisatira cyane umusozo, zisigaje amezi atarenze 6 ngo zirangire kuko mu kwezi kwa 12 kwa 2020.

Meya Ntazinda avuga ko nubwo bitoroshye kuyobora akarere badafite umwe mu bayobozi bungirije ngo nta mpungenge bimuteye we na visi meya ushinzwe ubukungu bazafatanya n’abafatanyabikorwa b’akarere kurangiza intego batangiye.

Yagize ati “Kuba nta visi meya dufite nibyo kuko uwo twari dufite yagiye mu zindi nshingano ni za ngaruka za covid-19, twagiye muri gahunda ya guma mu rugo twamaze gutegura amatora hatangiye kwiyamamaza. Kuva icyo gihe uko byahagaze kugeza uyu munsi nta n’ubwo duteganya kongera kumubona kugeza manda irangiye kuko amategeko icyo avuga iyo hasigaye amezi 6 ntabwo asimburwa”.

Yakomeje agira ati “Manda izarangira mu kwezi kwa 12 ni ukuvuga inshingano zose tuzazikora tuzihuje. N’Abo dufatanya bose nta mpungenge (intego) tuzazigeraho, ntibivuga ko bitavunanye ariko birashoboka”.


Ntazinda Erasme, Umuyobozi w’Akarere ka Nyanza

Komite Nyobozi w’Akarere, igirwa n’Umuyobozi w’Akarere, hamwe n’abayobozi b’akarere bungirije babiri ushinzwe ubukungu n’ushinzwe imibereho myiza y’abaturage.

Manda y’abayobozi b’uturere izarangira mu kwezi kwa 12 uyu mwaka yatangiye mu kwezi kwa Gashyantare 2016. Manda ya komite nyobozi y’akarere ni imyaka 5 ishobora kongerwa inshuro imwe. Biteganyijwe ko amatora y’abayobozi bashya b’uturere azaba muri Gashyantare 2021.


INKURU ZA :
Tanga Igitekerezo
Ibitekerezo
IGURIRE
Reba Ibindi Byinshi
IBARUWA ZA JORIJI
URUKUNDO
INKURU ZIKUNZWE
English
Ibitekerezo
IZINDI NKURU WASOMA